1Sa digitaki Sairusi ko Jiova me tui!
A sa digitaki me vakamalumalumutaka na veimatanitu;
Sa talaki me luvata tani na i sulu ni veiliutaki vakatui;
Ena dolava vua ko Jiova na veimatamata ni koro.
A sa kaya ko Jiova vei Sairusi,
2“Au sa na vakarautaka na nomu sala,
Me'u na talaraka sobu na veiulunivanua.
Au na basuraka sobu na veimatamata parasa,
Ka musuka rua na kedra veibai kaukamea.
3Au na solia vei iko na i yau mai na veivanua e vunitaki tu kina
Ena veivanua butobuto;
O na qai kila kina ni sai au ko Jiova,
Ka sa digitaki iko na nodra Kalou na Isireli.
4Au sa digitaki iko mo vukei ira na noqu tamata na Isireli,
O ira na tamata au sa digitaka.
Au sa solia vei iko mo dokai vakalevu,
Dina ga ni o sega ni kilai au.
5Oi au ga ko Jiova; ka sa sega tale ni dua na Kalou.
Au na vakaukauwataki iko,
Dina ga ni o sega ni kilai au.
6Au sa cakava na ka oqo me ra kila kece kina
Mai na i cabecabe ki na i dromudromu ni siga
Ni sai au taudua ga ko Jiova,
Ka sa sega ni dua tale na Kalou keirau lewe rua kaya.
7Au sa bulia na rarama kei na butobuto;
Ka'u kauta mai na veivakalougatataki kei na veivakarusai.
Au sa cakava na ka kecega oqo oi au ko Jiova.
8Au na tala sobu mai lomalagi na qaqa me vaka na uca
Ka na tadola na vuravura me ciqoma,
Ena qai sereka mai na galala kei na dodonu.
Oi au ko Jiova au na vakavuna me yaco na ka oqo.”
Na Turaga ni Veika Buli kei na Veitabagauna9 Aisea 29.16; Roma 9.20 E bau dua li na kuro qele e via veileti kei koya e bulia
Se dua na kuro ena kedra maliwa na kena vo?
Ena taroga li vua na dautuli kuro qele dregadregata
Na cava e cakava tiko?
Sa bau kudruvaka li na kuro vua a buli koya ni tawa vuku?
10E dua li na tamata ena via kaya vei rau na nona qase,
“Na cava o drau buli au tu kina vaka oqo?”
11Ko Jiova na nodra Kalou na Isireli,
O koya a buli ira,
“Sa sega ni dodonu mo tarogi au ena vukudra na luvequ
Se mo tukuna vei au na ka me'u cakava!
12Oi au ka'u a bulia na vuravura,
Ka buli ira na tamata me ra tiko kina.
Ia ka'u sa tevuka na lomalagi ena noqu kaukauwa,
Ka'u sa lewa na matanisiga, na vula, kei na veikalokalo.
13Oi au ga au sa vakauqeti Sairusi ena yalododonu
Ka'u na vakadodonutaka na nona sala kecega.
Ena tara tale na noqu koro o Jerusalemi,
Ka sereki ira na noqu tamata era sa vesu tu.
Sa sega ni soli vua e dua na ka
Se saumi me cakava na ka oqo.”
Ni sai Jiova ga sa kaya vakaoqo.
14A sa kaya ko Jiova vei ira na Isireli,
“Ena nomuni na i yau nei Ijipita kei Eciopea
Ka ra na nomuni bobula na tamata balavu ni Sipa,
Era na vesu tu ena sinucodo ka muri kemuni.
Era na cuva sobu vei kemuni ka vakatusa,
‘Sa tiko kei kemuni na Kalou, ka sai
Koya taudua ga na Kalou.
15Na nodra Kalou na Isireli,
O koya sa vakabulai ira na nona tamata.
Sa sega ni dau vakaraitaki koya.
16O ira kece era dau buli matakau
Era na vakamaduataki
Ka vakalolovirataki kece sara.
17Ia sa vakabulai Isireli ko Jiova
Ena tawa mudu na nona qaqa,
Ka ra na sega ni vakamaduataki na lewena.’ ”
18Sa bulia na lomalagi ko Jiova,
Ka sai koya taudua ga na Kalou.
O koya ka a bulia na vuravura ka vakataudeitaka,
Sa sega ni bulia me vanua lala,
Ia me ra tiko ga kina na tamata.
“Sa i au ga ko Jiova,
Ka sa sega tale ni dua na kalou.
19Au sa sega ni vosa vuni,
Se vunia tiko na noqu i naki.
Au sega ni vinakata me ra vaqarai au na Isireli
Ena vanua sa sega ni vakaivakarau.
Oi au ko Jiova ka sa tukuna na ka dina;
Ka'u sa vakatakila na ka sa dina.”
Ko Jiova kei na Veimatakau ni Papiloni20A sa kaya ko Jiova,
“Ni lako vata kece mai na tamata ni veimatanitu,
Oi kemuni kece o ni bula mai na veivanua.
O ni sa rui lialia,
O ni sa kauta voli ga na nomuni matakau,
Ka masu tiko ki na kalou sa sega ni vakabulai kemuni rawa.
21Ni lako mai me mai rogoci
Na nomuni kisi ena mataveilewai;
Laiva me ra veivosaki kei ira na mai veitaqomaki.
O cei e a tukuna makawa na veika ena yaco,
Ka yalataka makawa sara?
E sega li ni oi au ko Jiova.
O koya sa vakabulai ira na nona tamata?
Sa sega tale ni dua na kalou, oi au taudua ga.
22Ni gole mai vei au mo ni vakabulai
Na tamata mai na veiyasa i vuravura kece.
Ni sai au taudua ga na Kalou ka sega
Ni dua me keirau lewe rua.
23 Roma 14.11; Fpai 2.10,11 Na veika kece au kaya ena yaco dina
Ka na sega sara ni veisau.
Au sa yalataka ga vakai au.
Era na lako kece mai na tamata ka mai cuva vei au
Ka yalataka me ra yalodina vei au.
24Era na kaya.
‘Sa rawa ga na qaqa kei na kaukauwa mai vei au
Ia o ira kece era cati au era na vakamaduataki.
25Oi au ko Jiova, au na sereki ira kece na kawa i Jekope,
Era na qai vakalagilagi au.’ ”
Who We AreWhat We EelieveWhat We Do
2025 by iamachristian.org,Inc All rights reserved.
