VOSA VAKAIBALEBALE 12 - Ai Vola Tabu Ena Vakavakadewa Vou（FNV）

1Na tamata e gadreva na kila-ka ena vinakata me vakadodonutaki ni cala, ia o koya sa cata me vakadodonutaki sa tamata lialia.

2Sa taleitaki ira na tamata vinaka ko Jiova, ia sa na vakarusai ira na tamata ca.

3Na i valavala ca sa sega ni vakataudeitaka na bula ni tamata, ia na tamata yalododonu ga ena tudei.

4Na marama radinivale vinaka sa vu ni reki kei na dokai vua na watina; ia na radinivale sa kauta mai na madua vua na watina sa vaka na mate (kenisa) sa vakavuna na vuca ni nona sui.

5Na tamata yalododonu ena caka vinaka vei iko, ia na tamata ca ena gadreva tikoga me vakaisini iko.

6Na vosa ni tamata ca sa vu ni mate, ia na nodra vosa na yalododonu sa sereki ira era sa vakatotogani.

7Era na mate na tamata ca ka na sega ni vo bula e dua na nodra kawa, ia na nodra vuvale na yalododonu ena bula tikoga.

8Kevaka o sa vuku, o na vakacaucautaki; ia kevaka o lecaika tiko, era na beci iko na tamata.

9Sa vinaka cake me da vakataka ga e dua na lewenivanua sa cakacakataka na nona bula ni veisiga ka ca me da via la'ki vakataka voli e dua na tamata rogo ka kilai ia eda qai viakana tiko.

10Na tamata vinaka sa dauqarava vinaka na nona manumanu, ia na tamata ca sa dau vakalolomataki ira ga.

11Na dauteitei e daucakacaka vakaukauwa sa levu sara na kena kakana, ia sa ka lialia me da vakaoti gauna tiko ena veicakacaka eso sa sega ni yaga.

12Na ka ga e gadreva na tamata ca sai koya me raica na ka me cakava, ia na tamata yalododonu ena tudei ga.

13Na tamata ca ena tacori ga ena nona vosa, ia na tamata yalododonu ena vagalalataki koya mai na leqa.

14Na i sau ni ka o na rawata sa vakatautaki ga ena veika o sa tukuna kei na ka o sa cakacakataka; o na rawata ga na veika sa dodonu ga me kemu i sau.

15Na tamata lialia ena daunanuma ni sa dodonu tikoga o koya, ia na tamata yalomatua ena vakarogoca na i vakasala.

16Ni cudru na tamata lialia ena totolo na nona vakaraitaka, ia na tamata yalomatua ena sega ni kauwaitaka na veivakacacani.

17Ni o tukuna na ka dina, sa vakayacori na ka dodonu; ia na vosa lasu sa tini ga ena veivakaisini.

18Na vosa e sega ni vakasamataki vinaka e rawa ni vakavuna na mavoa titobu me vaka na mavoa e vu mai na i seleiwau, ia na vosa ni vuku sa vakadewataki vakayalomatua sa ia kina na veivakabulai.

19Sa sega ni bula dede na lasu, ia na ka dina sa bula tikoga ka tawa mudu.

20Sa kune na veivakaisini ena yalodra era nakita na ka ca, ia o ira era nakita na ka dodonu era na kunea na marau.

21Ena sega na ka ca ena yacova na tamata yalododonu, ia na ka ga e sota kaya na tamata ca na leqa.

22Sa cati ira na tamata lasulasu ko Jiova, ia sa taleitaki ira ga sa dau vakayacora dina na nodra vosa.

23Na tamata yalomatua ena dau galuvaka na ka e kila, ia o ira na lecaika era na dau tukuna na ka lialia.

24Na cakacaka vagumatua ena solia vei iko na kaukauwa, ia na vucesa ena vakayacori iko mo tamata bobula.

25Na lomaocaoca ena rawa ni butakoca na nomu marau, ia na vosa vinaka ena vakayaloqaqataki iko.

26Na tamata yalododonu sa dau dikeva lesu tikoga na nona i vakarau, ia o ira na tamata ca era sa lako sese ena nodra i lakolako.

27Na tamata vucesa ena sega sara ni rawata na ka e vakasaqara, ia na tamata cakacaka vakaukauwa ena kunea na nona kalougata.

28Na yalododonu sa gaunisala ki na bula; na muri ni kena sala sa sega sara kina na mate.