1Au a kaya, “Au na qarauna na ka au cakava,
Ka'u na sega tale ni laiva na yamequ me i valavala ca;
Au na sega ni kaya e dua na ka,
Ni ra tu volekati au na tamata ca.”
2Au na galu ka sega ni kaya e dua na ka vinaka.
Ia sa qai toro sobu ga na ka rarawa au sota kaya.
3Sa sinai na lomaqu ena nuiqawaqawa.
Na levu ga ni noqu vakasamataka, na levu ni noqu leqa,
Ka'u sa qai dolava kina na gusuqu, ka kaya:
4‘Kemuni Jiova, ena vakacava soti na dede ni noqu bula?
Au na mate li ena gauna cava?
Ni tukuna mada na kena rui lekaleka walega na noqu bula.’
5Sa lekaleka dina na bula o ni solia vei au!
Ni sa sega ni dua na ka e matamuni na noqu veiyabaki.
E dina sara, ni sa vaka ga e dua na i cegu cagi na tamata.
6E dina ga, ni sa lako voli na tamata
me vaka na i yaloyalo ga ni dua na ka.
Na veika kece e cakava sa ka wale ga;
Sa kumuna vata na i yau,
ia, sa sega ni kila se o cei ena taukena.
7Noqu Turaga, me'u na vakanuinui tale ena cava?
Au sa vakanuinui ga vei kemuni.
8Ni vakabulai au mai na noqu i valavala ca kecega,
Ka kakua ni laivi ira na lialia me ra vakalialiai au.
9Au na galu ka'u na sega ni kaya e dua na ka
Baleta ni o ni sa lewa me'u sota kaya na ka oqo.
10Ni kakua tale ni totogitaki au;
Au sa voleka ni mate ni sa mokuti au na ligamuni!
11O ni sa cudruva na neimami i valavala ca
mai na nomuni veivunauci,
Ka o ni sa vakacacana me vaka na sarasara
na ka sa talei vei keimami;
Sa dina sara, ni da sa vaka ga e dua na i cegu cagi!
12Ni rogoca na noqu masu i Jiova
Ka vakatudaliga mo ni rogoca na noqu kerekere,
Ni kakua ni galu ni'u tagi yani vei kemuni!
Au sa vakataki ira ga na noqu qase
Ni'u sa nomuni vulagi ga vakalekaleka.
13Ni laivi au taudua, me'u rawa ni bau marau mada
Ni bera ni'u qai lako tani yani ka sega ni kune tale.
Who We AreWhat We EelieveWhat We Do
2025 by iamachristian.org,Inc All rights reserved.
