SAME 73 - Ai Vola Tabu Ena Vakavakadewa Vou（FNV）

Ai Katolu ni i Vola(Same 73—89)Na Lewa Dodonu ka Matau ni KalouA Same i Esava.

1Sa vinaka dina na Kalou ni Isireli,

Vei ira era sa yalosavasava!

2Ia oi au, au sa vakarau bale sobu;

Sa vakarau me tidara na yavaqu,

3Baleta ni'u a vuvutaki ira na viavialevu,

Ka raica ni ra vutuniyau na tamata ca.

4Era sa sega ni bau sota kaya na rarawa;

Era kaukauwa ka bulabula.

5Era sega ni bau leqa me vakataki ira na tamata tale eso,

Ka sega ni bau tauvi mate me vakataki ira na tani.

6Ia era sa taubena na dokadoka me vaka na salusalu,

kei na i tovo kaukauwa me vaka na i ubi balavu.

7Sa sovaraka mai na yalodra na ca,

Ka sa sinai na nodra vakasama ena veinaki ca.

8Era sa vakalialiai ira na tani ka veivosakitaka na veika ca;

Era sa dokadoka ka veivosakitaka na nodra vakacacani na tani.

9Era sa vosacataka na Kalou mai lomalagi,

Ka ra vakarota na veilewa viavialevu e vuravura,

10Me rawa ni ra gole mai kina vei ira na tamata ni Kalou

Ka ra vakabauta sara na ka era kaya.

11Era sa kaya, “Ena sega ni kila na Kalou,

Ena sega ni kunea o koya sa Cecere Sara.”

12Era sa vakaoqo na tamata ca,

Sa levu na ka e tu vei ira, ka ra sa kumukumuni tikoga.

13E sega li na kena yaga na noqu maroroi au me'u savasava,

Kei na noqu sega ni vakayacora na i valavala ca?

14Kemuni na Kalou, o ni sa vakavuna na noqu rarawa ena veisiga;

O ni sa totogitaki au voli ena veimataka.

15Kevaka au sa kaya na veika vaka o ya,

Au na sega sara kina ni vaka na nomuni tamata.

16Ni'u a tovolea vakaukauwa me'u walia na leqa oqo,

Ia, sa rui dredre ga vei au

17Me yacova na noqu a qai cabeta kina na nomuni Valenisoro.

Au sa qai kila kina na ka ena yacovi ira na i valavala ca.

18O ni sa biuti ira dina ki na vanua dravidravia

Ka vakavuna me ra bale ki na rusa!

19Sa sega ni bera na nodra vakarusai

Ka lako sobu yani ki na dua na i cavacava rerevaki.

20Era sa vaka ga na tadra ka sa yali tale yani ena mataka;

Ni o ni sa yadra cake, na Turaga, era sa takali ga yani.

21Ena gauna sa rarawa kina na yaloqu

Ka mosi vakalevu na yaloqu,

22Au a sa lialia ga me vaka na manumanu;

Ka'u sa sega ga ni kila rawa na lomamuni.

23Ia, au sa dau tiko raviti kemuni ga,

Ka o ni sa qumia tikoga na ligaqu i matau.

24O ni sa tuberi au ena nomuni i vakasala

Ka o ni na ciqomi au ena doka e muri.

25Na cava tale e noqu e tu mai lagi, ia oi kemuni ga?

Ni o ni sa noqu, na cava tale au se gadreva e vuravura?

26Na noqu vakasama kei na yagoqu ena malumalumu mai,

Ia, sa noqu vu ni kaukauwa ga na Kalou;

Ni sai koya ga ka'u sa gadreva ena vuravura taucoko.

27O ira kece era biuti kemuni era na rusa vakaidina;

O ni na vakarusai ira era sa sega ni yalodina vei kemuni.

28Ia vei au, sa ka talei duaduaga na tiko volekata na Kalou,

Ka vakararavi ki na veitaqomaki loloma ni Turaga ko Jiova,

Ka kacivaka voli na veika kecega sa vakayacora o koya!