VUNAU NI SORO 17 - Ai Vola Tabu Ena Vakavakadewa Vou（FNV）

Na Vakatabui kei na Bibi ni Dra

1A sa vakaroti Mosese ko Jiova

2me solia vei Eroni kei iratou na luvena kei ira taucoko na lewenivanua e Isireli na veivakaro oqo.

3Na kai Isireli e vakamatea e dua na bulumakau se sipi se me mai na dua tale na vanua me i madrali

4ka sega ni kauta mai ki na mata ni Vale ni Veitavaki e sa voroka na Lawa. E sa vakadave dra o koya ka sega ni wili tale me nona tamata na Kalou.

5Na i balebale ni vakaro oqo o ya me ra sa kauta mai ena gauna oqo na Isireli na manumanu era a dau vakamatea mai ena taudaku ni nodra i tikotiko. Oqo me ra kauta mai vua na bete ena mata ni Vale ni Veitavaki, ka na qai vakamatea o koya me i soro ni veivinakati.

6Ena qai kaburaka na bete na dra ena veiyasa ni i cabocabonisoro ni madrali manumanu ena mata ni Vale ni Veitavaki ka qai vakama na uro me ka boi vinaka ka taleitaki vei Jiova.

7O ira na Isireli e sa sega ni dodonu tale me ra yalo veidabui ena nodra vakacabora tiko na i madrali e taudaku ni vale tabu kivei ira na kalou na me-tevoro. Sa na vakalawataki oqo ka me ra maroroya na Isireli ena veigauna mai muri.

8Mo tukuna talega vei ira: Ke dua na Isireli se dua na vulagi e bula tiko vata kei ira sa vakacabora e dua na i madrali kama se dua tale na i madrali

9me cabori vei Jiova ena dua tale na vanua ka sega ena mata ni Vale ni Veitavaki, ena sega ni wili o koya me dua vei ira na tamata ni Kalou.

10Kevaka e dua na Isireli se dua na vulagi e bula maliwai ira tiko e kania na lewe ni manumanu ka se dra tu, ena vagolea tani na matana mai vei koya ko Jiova ka na tamusuki koya tani me kakua ni wili me nona tamata.Vteki 9.4; Vsoro 7.26-27; 19.26; Vrua 12.16,23; 15.23

11Ni sa tiko ena dra na bula ni veika bula taucoko, ka sai koya o ya na vuna e vakarota kina ko Jiova me sovaraki taucoko na dra ena i cabocabo. Na dra, ka sa vu ni bula, sa kauta tani na i valavala ca.Ipe 9.22

12Sai koya o ya na vuna e vakarota kina ko Jiova vei ira na Isireli me kakua kina ni dua vei ira se dua vei ira na vulagi e bula vata kei ira me na kania na lewe ni manumanu e tu kina na dra.

13Kevaka e dua na Isireli se dua na vulagi e bula vata tiko kei ira e vakasasataka e dua na manumanu se toboka e dua na manumanu vuka ka sa vakadonui me i soro, e dodonu me sovara na kena dra ena dela ni qele ka ubia ena soso.

14Ni sa tiko ena dra na bula ni veika bula taucoko, ka sai koya o ya sa tukuna kina vei ira na Isireli ko Jiova me ra kakua ni kania na lewe ni manumanu e tu kina na dra ka ra na sega ni wili me nona tamata o ira yadua era kitaka.

15Na tamata yadudua, ke mani lewenivanua se vulagi, ka kania na lewe ni manumanu e mate vakaikoya ga se vakamatei mai vei ira na manumanu kila, e dodonu me savata na nona i sulu, me sili ka me wawa me yacova na bogi me rawa kina ni wili me savasava.

16Kevaka e sega ni vakayacora, e dodonu me colata na i sau ni nona i valavala.