2 VEIGAUNA 19 - Ai Vola Tabu Ena Vakavakadewa Vou（FNV）

Vunauci Josefati na Parofita o Jeu

1A lesu bula tale yani ena vakacegu o Josefati na tui Juta ki na nona vale e Jerusalemi.

2A lako yani o Jeu na parofita, na luve i Anani, me la'ki tavaki koya. A sa kaya vei Josefati na tui, E dodonu li mo ni vukei ira na i valavala ca, ka lomani ira era cati Jiova? Ena vuku ni ka oqo, a golevi kemuni yani kina na cudru i Jiova.

3Ia sa kune vei kemuni eso na vinaka. O ni a vakarusa na i vakatakarakara kece ni kalou yalewa o Asera ka ra qarava voli, ka o ni a vakarautaka na lomamuni mo ni vakasaqara na Kalou.

Na Veivakavoui i Josefati

4A tiko mai Jerusalemi o Josefati; ka lako tale vei ira na tamata, me vakatekivu mai Perisepa, ka yaco ki na ulunivanua o Ifereimi, ka la'ki kauti ira tale mai vei Jiova na Kalou ni nodra qase.

5A lesi ira eso na turaga ni lewa ena vanua, ena veikoro vakabai kecega e Juta, ena veikoro yadua;

6a kaya vei ira na turaga ni lewa, Ni vakasamataka vinaka na ka o ni cakava, ni o ni sega ni lewa ena vuku ni tamata, ena vuku i Jiova ga; a tiko kei kemuni o koya ena vakatau lewa.

7Ia oqo, me tiko vei kemuni na rerevaki Jiova; ni qarauna na veika o ni cakava, ni a sega ni vukici na dodonu vei Jiova, se me veitotaki, se taura vakabutobuto na i solisoli eso, me vakatanitaka na lewa.

8A lesia talega o Josefati e Jerusalemi eso na Livai, na bete, kei ira na qase turaga e Isireli me vakatauca na lewa ena vuku i Jiova, ka lewa na ka eso a veiletitaki. Era a vakaitikotiko e Jerusalemi.

9A vakadreta vei ira ka kaya, “Ni kitaka vakakina ena rerevaki Jiova ena lomadina, ena loma dodonu talega.

10Ia ena gauna a kau cake mai kina e dua na ka e veiletitaki mai vei ira na wekamuni ka ra tiko ena veikoro ena vuku ni vakadave dra, ena i vunau se na i vakaro, se i lesilesi kei na lewa, ia mo ni vakavulici ira me ra kakua ni valavala ca ena mata i Jiova me kakua kina ni yacovi ira na cudru, vei ira talega na wekamuni. Ni cakava oqo, o ni na qai sega ni cala.

11Raica, a lewai kemuni ena veika me baleta na qaravi i Jiova o Amaraia na bete levu; ia sa na lewa na ka kecega me baleta na tui o Sepataia na luve i Isimeli na kovana ni mataqali i Juta; ka ra na vakarorogo vua na Livai. Mo ni yalododonu ena veivosaki, ka me tiko mada ga ko Jiova kei koya sa dodonu!”