VOSA VAKAIBALEBALE 29 - Ai Vola Tabu Ena Vakavakadewa Vou（FNV）

1Na tamata dau yalokaukauwa ena veigauna kece e vakadodonutaki kina, ena mavoa ena dua na siga ka sa na sega ni rawa ni bula tale.

2Ni ra veiliutaki na tamata yalododonu era marau na tamata, ia ni ra veiliutaki na tamata ca era na tagi na tamata.

3Na tamata sa gadreva na yalomatua sa vakamarautaki tamana, sa vakayalia ga na nona i yau o koya sa tiko kaya na yalewa dautagane.

4Na tui sa lewa vakadodonu sa vakadeitaka na matanitu, ia na tui sa kauwai vakalevu ena i lavo ena vakarusa na nona vanua.

5Na tamata sa cavilaka na wekana ena coko ga ena nona dai.

6Na tamata ca ena tacori ga ena nona i valavala ca, ia na tamata yalododonu ena reki ka marau.

7Na tamata yalosavasava e kila na nodra dodonu na tamata dravudravua, ia na tamata yalo ca sa lecava ga.

8Na tamata e sega ni kauwaitaki ira na tani sa rawa ni vakama e dua na koro taucoko, ia na tamata vuku ena vakamalumalumutaka na cudru.

9Ni veileti e dua na tamata vuku kei na dua na tamata lialia, ena dredre ga na tamata lialia, vosa tu e cake, ka sega ni via tiko lo.

10Na tamata daulaba e cati ira na tamata yalododonu, ia na tamata yalododonu e saga me vakabula na tamata daulaba.

11Na tamata lialia ena vakaraitaka tu na nona cudru e matadra na lewe vuqa, ia na tamata yalomatua ena vosa tu ka tarova na nona cudru.

12Kevaka e vakarorogo e dua na tui ki na veika lasu, era na lasulasu kece na nona vakailesilesi.

13E rau sa tautauvata na tamata dravudravua kei koya sa vakasaurarataki koya ena ka oqo; sa solia na rarama ki na matadrau ruarua ko Jiova.

14Kevaka e dua na tui ena taqomaka na nodra dodonu na tamata dravudravua ena balavu na gauna ni nona veiliutaki.

15Na kuita kei na veivunauci sa yaga vei ira na gone, ia na gone sa biu tu ga vakaveitalia ena vakamaduataki tinana.

16Ni ra veiliutaki na tamata ca, sa na toro cake ga na levu ni valavala ca.

17Ia era na tu na tamata yalododonu me ra raica na nodra bale na tamata ca. Ni o vakavulica na luvemu ena qai solia vei iko na vakacegu, ena vakamarautaka na yalomu.

18Na matanitu e sega kina na veivakasalataki ni Kalou, ena matanitu yakusurasura; ia sa kalougata na tamata sa vakayacora na lawa ni Kalou.

19O na sega ni rawa ni vakadodonutaka e dua na dauveiqaravi ena nomu vosa wale ga vua. Sa na rairai kila o koya na ka o tukuna, ia ena sega ni via muria na nomu vosa.

20Sa na rawa me vinaka cake na tamata lialia mai vua na tamata sa sega ni dau vakasama ka levu na nona vosa.

21Solia vua na nomu dauveiqaravi na ka kece sara e vinaka me tekivu mai na gauna a gone kina, ia ena dua na siga ena qai taukena na veika kece o tukuna.

22Na tamata yalo totolo ena vakavuna e levu na veivala kei na leqa.

23Na nona dokadoka e dua na tamata ena vakavuna na nona lutu sobu, ia na tamata yalo malumalumu ena dokai.

24Na nona i tokani na daubutako ena kena meca levu duadua. Ena totogi o koya kevaka e tukuna na ka dina ena mataveilewai, ia ena cudruvi koya na Kalou kevaka e sega ni tukutuku vakadodonu.

25Sa ka rerevaki na kauwaitaka na ka era nanuma na tani me baleti iko, ia o koya ena vakadinati Jiova ena taqomaki.

26Na tamata kece era vinakata me ra lomani mai vei ira era veiliutaki, era na rawata duadua ga na lewa dodonu mai vei Jiova.

27Na tamata yalododonu sa cata na tamata ca, kei na tamata ca sa cata na tamata yalododonu.