1Ia, mai na loma ni cagilaba, a qai vosa mai kina ko Jiova vei Jope:
2O cei o iko mo taroga na noqu vuku
Mai na nomu vosa ni lecaika?
3Ena gauna oqo, mo tu vakatagane;
Ka sauma mai na veitaro au na taroga yani.
4O a sa bula tiko li ena gauna au a bulia kina na vuravura?
Kevaka o kila tu e levu na ka,
Ia mo tukuna sara mai vei au.
5O cei beka sa lewa se me vakacava na kena levu?
O cei e a dodoka e delana na wa ni vakarau?
Na ka kece oqo o kila tu o iko, se vaka e vei?
6Na cava e vakaduri ira tu na duru
Ka taqa toka kina na vuravura?
O cei beka sa vakasobura na duru ni tutu ni vuravura?
7Era a lagalaga sere vata na veikalokalo
Ena kida ni mataka ni siga o ya,
Ka ra kaikaila ni marau na agilosi ni Kalou.
8 Jere 5.22 O cei sa sogosogoti ira na matamata
Me tarovi kina na kui mai ni waitui,
Ni sa kacabote na wai mai na kete ni vuravura?
9Sa i au ga sa ubia na wasawasa ena veio
Ka solega ena butobuto.
10Au a makataka e dua na i yalayala ni wasawasa
Ka vakataudeitaka ena matamata sa sogo vakavinaka.
11Au a kaya ki na wasawasa, Mo yaco ga mai ki ke,
Ia mo kakua ni sivia!
Na vanua ga oqo me ra yaco kina na kemu biau lelevu.
12Ena nomu bula taucoko, Jope, o a sa bau vakarota rawa mada
Me kida mai na mataka ni dua na siga?
13O a sa bau vakarota mada na kida ni mataka
me vesuka na vuravura
Ka kureitaki ira na tamata ca mai na nodra i vunivuni?
14Ena rarama ni siga,
Era sa qai votu mamaca kina na veidelana kei na veiqakilo
Me vaka na sasanukinuki ni dua na i sulu.
15Sa rui ramase na rarama ni siga vei ira na tamata ca,
Ka sa tarovi ira mai na nodra vakayacora na i tovo kaukauwa
Kei na vakacaca.
16O sa bau lesu oti beka mai na veimataniwai vure mai na boto ni wasawasa?
O a sa bau lakova oti beka na boto ni wasawasa?
17E a sa bau dua beka e vakaraitaka vei iko na veimatamata
E dau yadravi kina na nodra vuravura butobuto na mate?
18O bau kila rawa beka se vaka e vei na levu ni vuravura?
Kevaka o kila kece tu na ka oqo,
Ia mo sauma mai na noqu taro.
19O kila beka na vanua sa vu mai kina na rarama,
Se na cava e vakavuna na butobuto?
20E rawa beka ni o vakaraitaka vei rau
Na rarama kei na butobuto na vanua
Me rau yaco kina,
Se mo vakalesui rau tale?
21Au vakabauta ni rawa vei iko,
Baleta ni o iko o sa qase sara ga,
Ka o a sa sucu oti tu ni qai buli na vuravura.
22O sa bau taleva oti mada mai
Na veivale ni yaya au dau maroroya tu kina
Na uca vulavula kei na uca cevata?
23Au vakarautaki rau tu me baleta na gauna ni leqa,
Na veisiga ni vala kei na i valu.
24O sa lesu oti beka mai na vanua sa dau cabe mai kina na matanisiga,
Se na vanua e dau liwa tiko mai kina na cagi tokalau?
25O cei beka sa kelia e dua na i keli me baleta na uca tau bi,
Ka vagalalataka na sala me muria na kurukuru kei na cagi?
26O cei e vakatauca na uca ena vanua e sega ni dua e tiko kina?
27O cei e vakasuasuataka na vanua mamaca sara ka sa viagunu tu,
Me rawa kina ni qai tubu mai na co?
28E rau vakatamani li na uca kei na tegu?
29O cei beka na tinadrau na wai cevata kei na tegu cevata
30Oi rau ka rau vukica na wai me vatu
Ka vakacevatataka na dela ni wasawasa?
31 Jope 9.9; Emo 5.8 E rawa beka ni o vesuki ira
Vata na veikalokalo ka yacadra na Peliatisi,
Se mo vakaluluqataka na i vau
Ka vesuki ira vata tu
Na veikalokalo ka yacadra na Orioni?
32E rawa beka ni o vakauti ira na veikalokalo
Mai na dua na draki ni yabaki ki na kena tale ka dua,
Ka lewa na nodrau i lakolako na Bea lalai kei na Bea Levu?
33O kilai ira beka na lawa ka lewai tu kina na macawa e cake,
Ka na rawa beka mo cakava me ra lawa talega ni vuravura?
34E rawa beka ni o kacivaki i vakaro ki na veio,
Me ra vakasuasuataki iko ena uca.
35Ia kevaka o vakarota na livaliva me tatibi mai,
Ena qai lako beka mai vei iko na livaliva me mai kaya vakaoqo,
E dua beka na ka o vinakata me'u cakava?
36O cei beka sa solia na yalomatua ki lomada,
Se solia na kila-ka vua na tamata?
37O cei sara mada na vuku e rawa ni wiliki ira na o,
Ka biuti ira vakatatiki me ra sovaraka mai na uca,
38na uca ka sosoqona vata na kuvu ni qele me soso dregadregata?
39Sa rawa ni o vakasaqaqara kedra na laione,
Ka vakamamautaki ira na luvedra era viakana tu,
40Ena gauna era vuni koto kina ena nodra veiqara vatu,
Se ra wawa lo koto ena veivanua era dau tobo kedra kina?
41O cei sara mada e vakani ira na reveni
Ni ra veivukayaki voli ena viakana,
Ka ra tagi kakana mai vei au o ira na luvedra?
Who We AreWhat We EelieveWhat We Do
2025 by iamachristian.org,Inc All rights reserved.
