1E ratou a qai muduka o Ilivasi, o Vilitati kei Sofa na nodratou a tovolea tiko me ratou sauma na vosa i Jope baleta ni sa dei vakavinaka sara tu ga e lomana ni sega dina ga na nona cala.
2A mani sega ni tarova rawa na nona cudru e dua na tamata na yacana o Ilaiu, baleta ni vakamacala i Jope sa vakadonui koya tikoga kina vakai koya, ka bilitaka tiko ni cala na Kalou. O Ilaiu e luve i Parakeli, e dua na kawa i Pusa, ena mataqali i Rama.
3A cudruvi iratou talega na lewe tolu na i tokani i Jope o Ilaiu baleta ni ratou a sega ni bau kunea rawa e dua na sala me ratou sauma kina na vosa i Jope, ka sa mani rairai kina ni vaka e cala dina tiko na Kalou.
4Me vaka ni gone duadua o Ilaiu vei iratou oqo, sai koya a mani wawa tikoga kina o koya ka yacova sara ni sa oti na nodratou vosa na kena vo.
5Ia ni kila o koya ni ratou a sega ni sauma rawa na lewe tolu oqo na vosa i Jope, a qai cudru,
6ka tekivu sara me sa vosa:
Oi au, au gone, ia o kemudou o dou qase,
Ena ka oqo au a mani rere tiko kina ni tukuna na noqu nanuma.
7Au a kaya lo tiko e lomaqu ni dodonu ga mo dou vosa o kemudou,
Ka dodonu talega vei kemudou na qase mo dou veisolitaka na nomudou vuku.
8Ia na yalo ga ni Kalou Kaukauwa
Sa i koya ka mai curumi ira na tamata ka soli vuku vei ira.
9Na qase cake tiko ni tamata e sega ni soli vuku vei ira na tamata,
Se me vukei ira me ra kila na ka e dodonu.
10Sa i koya au sa vinakata kina mo dou vakarorogo mada vei au;
Ka me'u tukuna sara oqo vei kemudou na noqu nanuma.
11Au a vakarorogo vakavinaka sara tikoga ena gauna dou a vosa tiko kina,
Ka'u a mani wawa voli ga ni dou a sa vakasaqara tiko
Eso na vakasama vuku mo dou tukuna.
12Au a vakatudaliga vakavinaka sara tikoga
Ka'u rogoca ni dou sa vakadrukai;
O dou a sega ni vakacala rawa na ka sa kaya o Jope.
13Dou sa kila rawa vakacava ni dou sa kunea na yalomatua?
Na Kalou sara ga e dodonu me sauma na vosa i Jope,
Baleta ni dou a sega ni rawata o kemudou.
14E a vosa tiko vei kemudou o Jope,
Ka sega ni a vosa tiko vei au,
Ia oi au mada ga,
Au na sega sara ga ni bau sauma na nona vosa
Ena kena i sausaumi o dou cakava o kemudou.
15Sa maca koso na vosa vei iratou oqo, Jope;
Sa sega na ka me ratou sauma kina na nomu vosa.
16Me'u sa wawa voli mada ga,
Ni ratou sa vagagalu tu o iratou?
E ratou sa tucake tu ga oqori
Ka sa sega tale na ka me ratou tukuna.
17Au sa na sega ni wawa,
Au sa na sauma sara ga oqo na nomu vosa,
Ka me'u tukuna sara vei iko na ka au nanuma.
18Sa bau dredre sara ga na noqu wawa tiko me'u qai vosa.
Au sa sega ni tarova rawa na gu cake mai ni vosa.
19Ke sa sega na noqu gauna ni vosa,
Au na kacabote me vaka na bolaniwaini
Sa sinai tu ena waini vou.
20Au sa sega ni vosota rawa.
Au sa na vosa sara ga.
21Au na sega ni tovaka e dua ena veileti oqo;
Ka'u na sega ni cavilaka e dua.
22Au sega ni kila na veicavilaki,
Ia ke'u kila, ena totolo sara ga ni kuitataki au na Kalou.
Who We AreWhat We EelieveWhat We Do
2025 by iamachristian.org,Inc All rights reserved.
