1 Same 74.14; 104.26; Aisea 27.1 O na rawa li ni vesuki Livaiacani ena bati ni siwa?
Se vesuka na yamena ena dua na dali?
2O na rawa li ni daramaka na dali ki na ucuna?
Se curumaka ki na galegalena na i qila?
3Ena kerei iko beka o koya mo laivi koya ga me lako?
Se me vakamasuti iko mo bau lomani koya?
4O drau na cakava vata beka e dua na veiyalayalati
Ka yalataka me qaravi iko ka sega ni mudu?
5O na qito vata li kei koya me vaka e dua na manumanu susu?
Se o na vauca vua e dua na dali me nodra i vakalasa na nomu goneyalewa?
6Era na veisisivitaka beka na dauqoli na i sau me voli kina?
Era na seleseleti koya beka na dauveivoli me volitaki?
7E rawa beka ni o cobara wavoki e yagona na moto ni cocoka?
Se mo vana lamuta na nona qavokavoka ena gasau ni vana ika?
8Kevaka o tarai koya, o na sega tale vakadua ni via cakava tale;
Ka sega ni guilecava rawa na nomudrau veimulomulo!
9Na tamata ga e sa raici Livaiacani
Sa vakayalia na nona yalodoudou
Ka sa bale sobu ki na qele.
10Ni sa vakacudrui, sa ka levu sara na kena rerevaki;
O cei e yatedei rawa me tu e matana?
11O cei ena rawa ni veivala kaya ka sega ni mavoa?
Sa sega e dua e vuravura taucoko me cakava rawa.
12Me'u tukuna mada vei iko na yava i Livaiacani,
Ka vakamacalataka talega na kena levu kei na nona kaukauwa.
13Sa sega e dua me rawa ni dresulaka na nona kote e sau,
Se me suabasikata na i sasabai vakaivalu e tokara tiko e taudaku.
14O cei beka e rawa ni dolava na gusuna,
Sa voliti tu ena batina vakadomobula?
15Na dakuna sa buli ena i sasabai vakaivalu sa tuvai vakamaqosa,
Era cokocokoti vata ka kaukauwa me vaka na vatu.
16Era sa veikabiti vakaukauwa sara na i sasabai yadua,
Ka sega na cagi me curuma rawa na kedra i sema.
17Era sa semati vakavinaka sara
Ka sa sega sara na ka me na basubasuki ira rawa.
18E tibi na liva ni sa suru o koya,
Ka sa waqa na matana me vaka na matanisiga sa cadra cake mai.
19Sa caudre mai gusuna na yameyame ni buka,
Ka veivukayaki na kena lidi ni buka.
20Sa kuvu mai na ucuna na kubou,
Me vaka na kubou ni co malai sa vakamai tiko ena boto ni kuro.
21Na nona i cegu e vakacaudreva rawa na buka;
Ka ra babasika mai gusuna na yameyame ni buka.
22Sa rui kaukauwa na domona
Ka ra sa domobula kecega o ira sa sota kaya.
23Sa segai sara e dua na tikina malumalumu ena kulina;
Ka sa vavaku ka kaukauwa me vaka na kaukamea.
24Sa kaukauwa na lomana me vaka na vatu,
Io sa kaukauwa me vaka na vatu ni qaqi sila.
25Ni sa vude cake mai o koya, era sa bau rere talega o ira na qaqa;
Ni sa vuka na yalodra ena levu ni nodra rere.
26Sa sega na i seleiwau me na rawa ni vakamavoataki koya,
Se na moto, se na dakaititi, se na kau balavu.
27Ki vua, sa vaka wale ga na malumalumu ni tolo ni co na kaukamea,
Ka vaka na malumalumu ni kau vuca na parasa.
28E sega na gasau ni dakaititi me na rawa ni cemuri koya tani;
Kei na vatu sa virilaki kina sa vaka na i musumusu ni tolo ni co.
29Ki vua, na i yaragi ni valu ka sa vaka na tolo ni co,
Ka tabalaka na dredre ni ra cokalaki koya na tamata ena moto.
30Na varina e ketena sa vaka na i vorovoro gagata ni kuro qele;
Era seleseleta na qele ena vanua lolobo me vaka na qiqi ni tatamusuki.
31Sa vakabutara na wai titobu me vaka na kerekere ni dua na kuro,
Ka vakayavalata na wasawasa me vaka na buebue ni kuro waiwai.
32Sa tatalivaliva na mawena ena vanua e muria
Ka vukica na wasawasa me vuso vulavula.
33Sa sega na ka e vuravura me vakatauvatani vata kina;
O koya e dua na i bulibuli sa sega vua na rere.
34A sa raica sobu na veimanumanu dokadoka kecega;
Ni sa nodra tui na manumanu kila kecega.
Who We AreWhat We EelieveWhat We Do
2025 by iamachristian.org,Inc All rights reserved.
