SAME 142 - Ai Vola Tabu Ena Vakavakadewa Vou（FNV）

A Masu ni Kere VeivukeA Masikili i Tevita. A masu ni sa tiko e loma ni qara vatu. Ulutaga ni Same 142: 1Samu 22.1; 24.3

1Au sa masu vei Jiova,

Au sa kere veivuke ki vua.

2Au sa kauta vua na noqu kudru kece sara,

Ka'u sa tusanaka kece vua na noqu leqa.

3Ena gauna ka'u sa voleka kina ni soro,

A sa kila deivaki o koya na ka me'u cakava.

Era sa vunitaka na kequ meca e dua na dai

Ena sala au lako tiko kina.

4Ni'u sa rai ki yasaqu, au sa sega ni raica

E dua me vukei au;

Sa sega ni dua me taqomaki au;

Ka sega ni dua e bau kauwaitaki au.

5I Jiova, au sa kerea ga na nomuni veivuke,

Sa i kemuni, i Jiova, na noqu i sasabai;

Sa i kemuni ga na ka kecega ka'u sa gadreva ena bula oqo.

6Ni rogoca mada na noqu sa tagica na nomuni veivuke,

Baleta ni'u sa luvuci ena taqaya.

Ni vakabulai au mai vei ira na kequ meca;

Era sa kaukauwa cake sara vei au.

7Ni vakabulai au mai na noqu leqa;

Ia, au sa na qai vakacaucautaki kemuni ga

ena nodra soqoni na nomuni tamata,

Baleta ni sa rui talei dina vei au na nomuni yalovinaka.