1A sa kaya vei au na Turaga ko Jiova me'u lako sobu ki na nona i tikotiko na tui Juta ka tukuna kina na vosa oqo,
2“Kemuni na tui Juta, o ni sa tiko ena i dabedabe vakatui i Tevita kei ira na vakailesilesi kei kemuni na lewe i Jerusalemi, mo ni rogoca mada na vosa ni Turaga.
3Sa kaya ko Jiova mo ni cakava na ka dodonu kei na ka savasava. Ni taqomaka na tamata sa vakaisini mai vei koya sa veivakaisini, kakua ni cakava e dua na ka ca se vakasosataki ira na vulagi, se vei ira na luveniyali, se na yada; ni kakua ni vakamatei ira na tamata yalododonu ena vanua tabu oqo.
4Kevaka o ni na muria dina na vosa oqo era sa na qai tui tikoga e ke na kawa i Tevita. Era na qai curu vata tikoga kei ira na nodra vakailesilesi kei ira na nodra tamata ena veimatamata ni vale vakatui oqo ena qiqi kei na ose.
5Ia kevaka o ni sega ni muria na veivosa oqo au sa yalataka vakataki au vei kemuni ni na rusa na i tikotiko vakatui oqo. Oi au, ko Jiova, sa vosa vakaoqo.
6Vei au, na i tikotiko vakatui e Juta sa tautauvata kei na vanua o Kiliati kei na ulunivanua o Lepanoni ena kena rairai vinaka, ia au na vukica me dua na vanua lala sa sega ni dua e bula kina.
7Au sa talai ira na tamata me ra vakarusa. Era na kauta mai na nodra matau ka taya sobu na kena kau sitari digitaki ka viritaka ki na buka.
8E muri, era na lakova na vanua oqo na tamata mai na veivanua tani, ka ra na qai dui taroga o ira na nodra dui i tokani se na cava sa cakava kina na ka levu oqo ko Jiova ki na koro.
9Ia era na qai sauma vakaoqo, “E baleta ga ni ra sa vakanadakuya na nodra veiyalayalati kei na Jiova na nodra Kalou ka qarava na veikalou tani.”
Na i Tukutuku i Jeremaia me Baleti Josaia10Oi kemuni na Juta,
Ni kakua ni tagicaki Josaia,
Ni kakua ni tagicaka na nona mate;
Ia ni tagicaki Joasa ga vakalevu na luvena
Ni sa na sega ni lesu tale mai
Se raica tale na vanua e a sucu kina.
11A sa kaya ko Jiova na ka me baleti Joasa na luve i Josaia, o koya a sosomitaki tamana me tui Juta, “Sa lako tani mai na vanua oqo ka na sega ni lesu tale mai.
12Ena mate ena vanua era sa kauti koya kina ka sega ni raica tale na vanua oqo.”
Tukutuku i Jeremaia Baleti Jo-akini13Ena rusa na tamata sa tara na nona vale
Ena sala e sega ni dodonu,
Kei na nona i taba vale
e cake ena veivakaisini;
O koya sa vakacataki ira na wekana,
Ka sega ni solia na kedra i sau.
14Sa na rusa na tamata e kaya,
“Au na tara e dua na noqu vale
Ka na lelevu na kena rumu
Ena tabavale e cake.
15Sa vakavuna li mo tui sa vinaka cake
Na nomu tara e dua na vale sitari
Sa vinaka cake mai na nodra na tani?
A sega li ni kana ga gunu na tamamu
Ka cakava ga na ka dodonu ka vinaka?
Sa qai vinaka ga kina vua.
16Sa lewa vakadodonu sara
Ena vukudra na dravudravua,
Ka sa vinaka na ka kecega e vukuna.
Oqori ga na ka sa vakatokai
‘Me da kilai Jiova ga.’
17Ia o iko
O sa raica ga na ka o gadreva vakataki iko;
O sa vakamatei ira na tamata yalododonu,
Ka tabaki ira sobu vakaukauwa na nona tamata.
Sa vosa ga vakaoqo ko Jiova.
18Ia a kaya ko Jiova me baleti Jioiakimi
Na luve i Josaia na tui Juta,
“Ena sega e dua
Me tagicaka na nona mate
Se kaya, ‘Sa rui vakarerevaki noqu i tokani,
Sa rui vakarerevaki.
Ena sega e dua me tagicaki koya sa kaya,
‘Noqu Turaga! Noqu Tui!’
19Ena bula me vaka e dua na asa,
Ena yarataki tani;
Ka viritaki
Ena taudaku ni matamata kei Jerusalemi.”
Veika Ca ena Yacovi Jerusalemi20Kemuni na lewe i Jerusalemi,
Ni lako cake ki Lepanoni
Ka kacivaka,
Ni lako ki na vanua o Pasani
Ka kailavaka;
Ni la'ki kailavaka
Mai na veiulunivanua mai Moapi,
Baleta ni ra sa vakarusai kece
O ira era dau lomani iko.
21A sa vosa vei iko ko Jiova
Ni o a tiko vinaka
Ia o a qai bese ni vakarorogo.
Oqo na veika o a dau cakava
Mai na gauna o a sa gone kina;
O a bese ni muria
Na nona vosa ko Jiova.
22Era na cagina tani
Na nomu i liuliu ena cagi
Ka ra na kau vakabobula
O ira sa dau lomani iko
O na vakamaduataki ka beci
Baleta na veika ca kece o a cakava.
23O sa vakacegu ka galala ga
Ena maliwa ni sitari mai Lepanoni;
Ia ena vakacava ni na yacovi iko na mosi,
Na mosi e vaka na nona mosi
E dua na yalewa sa taratara.”
Lewa ni Kalou vei Jo-akini24A sa kaya ko Jiova vei Jioiakini na luve i Jioiakimi na tui Juta, “Me vaka au sa bula dina, kevaka sara mada ga o mama ena ligaqu i matau, au na luvati iko tani,
25Ka soli iko vei ira era via vakamatei iko, o ira o sa rerevaki ira. Au na soli iko vei tui Nepukanesa mai Papiloni kei ira na nona sotia.
26Au na kolotaki iko tani vata kei tinamu ki na dua tale na matanitu, ka sega ni dua vei kemudrau a sucu kina, o drau na mate ruarua mai kea.
27O drau na sega ni lesu tale ki na vanua o drau domona mo drau raica.”
28A sa kaya o Jeremaia, “Sa yaco li o Jioiakini na tui me vaka e dua na saqa kavoro sa viritaki laivi ka sa sega e dua e vinakata? A cava na ka e kau tani kina o koya kei ira na luvena ki na dua na vanua e ratou sa sega ni kila?”
29Isa na vanua, na vanua, na vanua!
Mo rogoca na vosa i Jiova:
30“Na tamata oqo sa vakarusai
Me ra yali vua na luvena,
Ka me na sega ni rawata
Me vakatoroicaketaki koya.
Ena sega na nona kawa
Me na vakatulewa tiko e Juta,
Me vakataki ira na i sosomi kei Tevita.
Sa i au ga, ko Jiova, sa kaya vakaoqo.
Who We AreWhat We EelieveWhat We Do
2025 by iamachristian.org,Inc All rights reserved.
