SAME 21 - Ai Vola Tabu Ena Vakavakadewa Vou（FNV）

Na Vakacaucautaki ni QaqaVua na i liuliu ni sere. A Same i Tevita.

1Kemuni Jiova,

Sa marau na tui baleta na kaukauwa o ni sa solia vua,

Ka sa sinai ena reki baleta ni o ni sa solia vua na qaqa.

2O ni a solia vua na veika e gadreva;

Ka solia vua na ka e kerea.

3O ni sa kauta mai vua na veivakalougatataki e vuqa,

Ka vakatokara e dua na i sala koula e uluna.

4E a kerea me bula, ka o ni a solia vua,

Na bula balavu ka sega ni mudu.

5Sa vakaitamera sara na nona lagilagi

ena vuku ni nomuni veivuke;

O ni sa solia vua me rogo ka dokai kina.

6Sa sobuti koya tikoga na nomuni veivakalougatataki ka sega ni mudu;

Sa vakasinaiti koya ena reki na nomuni dautiko voleka.

7Sa vakadinati koya sa cecere sara o koya na tui;

Ena tui tikoga o koya ka sega ni mudu

Baleta na loloma tudei i Jiova.

8Ena vesuki ira kece sara na kena meca o koya na tui,

Ka na vesuki ira kece sara na cati koya.

9Ni sa rairai mai ko Jiova

Ena vakarusai ira me vaka e dua na bukawaqa.

Ena vaqeyavutaki ira kece o koya ena nona cudru,

Ka na vakarusai ira kece ena buka.

10Ena vakamatei ira kece na luvedra o koya na tui,

Ka vakaleqai kecega na nodra kawa.

11Era sa bosea eso na i naki ca ka bukiveretaki koya,

Ia era na sega ni rawata na nodra i naki.

12Ia ena vanalaki ira o koya ena dakaititi

Ka vakavuna me ra vuki ka dro.

13Ni lako mai Jiova kei na nomuni kaukauwa.

Keimami na seretaka ka vakacaucautaka na nomuni kaukauwa.