SAME 91 - Ai Vola Tabu Ena Vakavakadewa Vou（FNV）

Na Kalou sa Veitaqomaki

1O koya sa tiko ena vale i Koya sa Cecere Sara,

Sa tiko vakacegu ena i yaloyalo i Koya sa Kaukauwa.

2Au na tukuna ena vuku i Jiova,

“Sa i kemuni na noqu i drodro kei na noqu bainivalu;

Na noqu Kalou, o koya au sa dinata.”

3Ena maroroi iko mai na leqa kece era tu vakavuni,

Kei na veimate ca kecega.

4Ia, ena ubi iko ga o koya ena ruku ni tabana;

Ka maroroi iko vinaka ena nona loloma;

Ena taqomaki iko ka totaki iko na nona yalodina.

5O na sega ni rerevaka na ka e daurerevaki ena bogi,

Se na gasau sa vuka voli ena siga,

6Se na mate lelevu e dauveitauvi ena butobuto,

Se na vere ca sa dau veivakamatei ena sigalevu tutu.

7Era na bale na udolu e yasamu,

Kei na tini na udolu ena ligamu i matau,

Ia, ena sega ga ni yacovi iko e dua na ka ca.

8O na raica votu ga e matamu,

Na nodra totogitaki na tamata ca.

9Me vaka ni o sa tauri Jiova me nomu i drodro,

Ka nomu i sasabai o koya sa Cecere Sara,

10Ena sega kina ni dua na leqa me na ravuti iko,

Ka sega na i valavala kaukauwa me toro volekata na nomu vale.

11Ena vakaroti ira na nona agilosi na Kalou me ra vakatawani iko,

Ka taqomaki iko ena vanua kecega o lakova.

12Era na keveti iko cake ena ligadra,

Me kakua kina ni tavutu na yavamu ki na vatu.

13O na butuki ira sobu na laione kei na gata,

Io, na laione rerevaki kei na gata bati gaga.

14Sa kaya na Kalou, “Au na vakabulai koya sa lomani au;

Ka taqomaki koya e vakatusa ni sai au ko Jiova.

15Ni kaci mai vei au, au na rogo yani vua;

Au na tiko vata kei koya ena gauna e leqa kina.

Au na vakabulai koya ka rokovi koya.

16Au na vakacegui koya me na bula balavu;

Ka vakatakila vua na noqu veivakabulai.”