JOPE 14 - Ai Vola Tabu Ena Vakavakadewa Vou（FNV）

1Na i lakolako ni bula ni tamata e tautauvata ga,

Ena kena rui leleka ka voravora.

2Era tautauvata ga kei na senikau

Ena totolo ni nodra se mai ka mira tale yani;

Ka ra yali yani me vaka na o cagina tani.

3Kemuni na Kalou, o ni na bau galeleta beka na raici au,

Se mo ni kauti au yani ki matamuni me'u la'ki lewai?

4E sega sara na ka savasava e rawa ni taka mai na dua na

Ka dukadukali vaka na tamata.

5Na balavu ni nona bula e dua

Kei na i wiliwili ni veivula me bula tiko kina,

Sa lewai rawa tu ni bera na nona sucu mai.

O ni sa vakataulewa oti tu ena ka oqori,

Ka sa sega sara ni veisautaki rawa.

6Ni gole tani mai vua ka laivi koya me lewai koya;

Ni laivi koya me bau marautaka mada

Na nona bula ni cakacaka vakaukauwa.

7Na vunikau sa musu oti sa sega ni mate sara;

Ena rawa ni bula cake tale ka vakadrauna.

8E dina ga ni ra sa qase sara na wakana,

Ka mate sobu ki qele na vuna,

9Ia kevaka e domica rawa na wai, ena qai tubu tale ka

Vakadrauna me vaka e dua na vunikau gone.

10Ni sa mate e dua na tamata,

Sa i koya sara ga oqori na kena i otioti;

Sa mate o koya,

Ka sa na qai tiko tale beka e vei?

11Ena yaco mai na gauna me ra maca kina na veiuciwai,

Ka ra na maca talega na veiwasawasa.

12Ia ena segasega sara ni tucake tale na tamata sa mate;

Era na sega sara ni yadra ka yacova na i vakataotioti;

Era na sega sara ni yavala mai na nodra sa moce koto.

13Au sa gadreva dina mo ni la'ki vunitaki au bulabula

Ena nodra vanua na mate;

Me'u la'ki vunitaki tu

Me yacova ni sa oti na nomuni cudru,

Ka mo ni qai lokuca ga na gauna

Mo ni qai nanumi au tale kina.

14E rawa beka ni bula tale e dua na tamata

Kevaka sa mate oti?

Ia o au, au sa na waraka sara ga na gauna e bau vinaka cake;

Me'u wawa me yacova sara ni sa oti na gauna ni leqa oqo.

15Oti o ya, au sa na qai rogo mai ni o ni kaci yani,

Mo ni na qai rekitaki au, oi au na nomuni ka buli.

16O ni sa na qai vakaraica vakavinaka na i cavucavu ni yavaqu,

Ia o ni na sega ga ni vakasaqara na noqu i valavala ca.

17O ni na bokoca na noqu i valavala ca ka kauta laivi sara;

Ka bokoca laivi kecega na ca au a cakava oti.

18Ena yaco mai e dua na gauna me ra na babale kina na veiulunivanua,

Ka ra tosoi laivi talega na veibari ni vatu.

19Ena vakavurumemeataka na veivatu na kaukauwa ni wai,

Ka na qeqeta laivi yani na qele na uca tau bi;

Ia sa vaka oqori na nomuni vakarusa

Na ka ni bula sa vakanuinui kina na tamata.

20E dua na tamata o ni sa vakamalumalumutaka

Ka kauti koya laivi sara vakadua;

Sa mate ka sa veidreyaki na matana.

21E ratou rawa i covi ni veidokai na luvena,

Ia na ka oqo e sa sega ni kila o koya,

Ka na sega talega ni kila kevaka e ratou vakamaduataki.

22Na ka wale sara ga e vakila o koya sai koya na momosi ni

Yagona kei na rarawa ni lomana.