SAME 102 - Ai Vola Tabu Ena Vakavakadewa Vou（FNV）

A Masu ni Kere Veivuke Vua na Tui ni SautuA masu ni tamata ni sa rarawa, ni sa luluvu na lomana, ka sa tukuna yani na ka e rarawa kina ena mata i Jiova.

1Kemuni Jiova, ni vakarorogo ki na noqu masu,

Ka rogoca na noqu kerekere!

2Ni kakua ni vunitaki kemuni vei au,

Ena gauna au sa leqa tu kina!

Ni rogoci au,

Ka sauma mai vakatotolo na noqu masu,

ni'u masu yani vei kemuni.

3Sa takali yani na noqu veisiga me vaka na kubou;

Sa kama na yagoqu me vaka na buka.

4Au sa mokuti sobu me vaka na co madu,

Ka'u sa sega ni garova mai na kakana.

5Au sa vutugu vakadomoilevu,

Sa kabita na suiqu na kuliqu ena kequ lila

6Au sa vaka e dua na manumanu vuka kila ena vanua dravuisiga,

Ka vaka e dua na lulu ena veivanua sa rusa tu,

7Au sa davo ka yadra koto;

Ka'u sa vaka e dua na manumanu vuka

sa tiko taudua ena dua na dela ni vale.

8Era sa vakasewasewani au na kequ meca ena veisiga taucoko,

O ira era vakalialiai au era sa vakayagataka na yacaqu

me ka ni veivakamadualaki.

9Ni na kequ kakana na dravusa me vaka na madrai,

Ka sa veiwaki na wai ni mataqu kei na mequ gunu,

10Baleta na nomuni cudru waqawaqa,

Ni o ni a tauri au cake ka viritaki au tani.

11Na noqu bula sa vaka na i yaloyalo ni bogi;

Ka'u sa vaka na co madu.

12Ia, oi kemuni Jiova, o ni sa Tui ka sega ni mudu;

Era na nanumi kemuni na veitabatamata kecega.

13O ni na tucake ka lomani Saioni,

Sa yaco mai na gauna me lomani kina;

Sa kena gauna dodonu sara ga oqo!

14Era sa lomani Saioni na nomuni tamata,

Dina ga ni sa vakarusai,

Era sa lomani Saioni dina ga ni sa rusa tu.

15Era sa rerevaki Jiova na veimatanitu,

Era na rerevaka na nona kaukauwa na tui kecega e vuravura.

16Sa na tarai Saioni vou tale ko Jiova,

Ena vakaraitaka o koya na nona cecere.

17Ena rogoci ira na nona tamata sa biu laivi tu,

Ka rogoca na nodra masu.

18Vola na veika sa cakava ko Jiova me baleti ira na veitabatamata e muri,

Me ra na vakacaucautaki koya kina na tamata era sa bera ni sucu.

19Sa rai sobu mai ko Jiova mai na nona i tikotiko tabu mai cake,

Sa rai sobu mai ki vuravura mai lomalagi,

20Me rogoca na nodra vutugu na tamata era sa vesu tu,

Ka sereki ira era sa lewai me ra mate.

21Ia, era na tusanaka na tamata na yaca i Jiova mai Saioni,

Ka ra na vakavinavinaka vua o ira mai Jerusalemi,

22Ni ra sa soqo vata mai na veimatatamata,

Kei na veimatanitu, me ra sokalou vei Jiova.

23Sa vakamalumalumutaki au ko Jiova ni'u se gone ga;

Sa vakalekalekataka o koya na noqu bula.

24Kemuni na noqu Kalou, ni kakua ni kauti au tani oqo

Ni'u se bera ni qase sara.

I Jiova, o ni na bula tikoga ka sega ni mudu,

25O ni a bulia na vuravura ena gauna makawa sara,

Ka cakava sara ga na lomalagi ena ligamuni.

26Era na takali kece yani, ia o ni na qai vo taudua ga;

Era na madra kece yani me vaka na i sulu,

Ka takali yani,

27Ia, o ni sai koyakoya tikoga,

Ka na sega ni mudu rawa na nomuni bula.

28Era na bula tikoga na luvedra na nomuni tamata,

Ka ra na taqomaki na nodra kawa

ena ruku ni nomuni veitaqomaki.