1Sa i koya oqo na i tukutuku e a vakaraitaka na Kalou vei Aisea na luve i Emosi me baleti Juta kei Jerusalemi:
2Ena yaco mai na gauna
me na cecere duadua kina
na ulunivanua e duri tu kina na Valenisoro.
Era na lako yani kina na veimatanitu kecega,
3ka ra na kaya na tamata,
“Me da cabe cake ki na ulunivanua i Jiova,
ki na Valenisoro ni nodra Kalou na Isireli.
Me da vulica kina na ka sa vinakata me da cakava,
ka muria na gaunisala sa digitaka.
Sa lako mai Jerusalemi na i vakavuvuli i Jiova,
ka sa vosa mai Saioni vei ira na nona tamata.”
4 Joeli 3.10; Maika 4.3 Ena vakatulewa vei ira na veimatanitu o koya.
Era na tukitukia na nodra i seleiwau me bati ni siviyara,
kei na nodra moto me i sele ni sasamaki.
Era sa na sega tale ni veivaluvaluti na veimatanitu,
se vakavakarau tale ki na i valu.
5Kemuni na kawa i Jekope, me da lako voli ena rarama i Jiova!
Cudruvi o Ira na Dokadoka ka Viavialevu6Kemuni na Kalou, o ni sa biuti ira na nomuni tamata, o ira na kawa i Jekope! Sa sinai na vanua vei ira na daucakamana kei ira na daucakaisausau mai na Tokalau kei ira mai Filisitia. Era sa muria na tamata na nodra i valavala vou eso.
7Sa sinai na nodra vanua ena siliva kei na koula, ka sa sega ni wili rawa na nodra i yau. Sa sinai na nodra vanua ena ose, ka sa sega ni wiliki rawa na nodra qiqinivalu.
8Sa sinai na nodra vanua ena matakau, ka ra sokalou ki na veika ga era cakava ena ligadra.
9Ena ka oqo era sa vakamalumalumutaki kina, ka vakamaduataki na tamata kecega. Turaga, ni kakua sara ni vosoti ira!
10 Vtaki 6.15; 2Cesa 1.9 Era na lako ki na veiqara vatu se vunitaki ira ki na qele me ra drotaka kina na cudru i Jiova kei na i serau ni nona i ukuuku.
11Na mata viavialevu ni tamata ena vakamalumalumutaki,
ka na buturaki sobu na nodra dokadoka.
Ena siga o ya sa na vakacerecerei taudua ga kina ko Jiova.
12Ni sa dua na siga i Jiova ni lewevuqa,
me vakamalumalumutaki ira kina na viavialevu kei na dokadoka,
kei ira na dokai kei na cecere talega.
13Ena vakarusai ira na sitari babalavu kei Lepanoni,
Kei na oki kecega ni vanua o Pasani.
14Ena vakatautauvatataka na veiulunivanua kei na veidelana,
15Na veivale cecere kei na bai ni vale kecega.
16Ena vakadromuca na waqa kecega ni Tasisi,
kei na i yaya kecega e gadrevi ka dau divi.
17Sa na qai vakamalumalumutaki na viavialevu ni tamata
ka buturaki sobu na nodra dokadoka.
Ia ena siga o ya,
Sa na qai vakacerecerei taudua ga kina ko Jiova,
18Ia na veimatakau era na yali vakadua sara.
19Era na vuni na tamata ena veiqara vatu,
ka kelia na qara ena loma ni qele,
me ra dro tani kina mai na cudru i Jiova,
ni sa lako mai me yavalata na vuravura.
20Ni sa na yaco mai na siga o ya,
era a viritaka na tamata na nodra matakau siliva,
kei na nodra matakau koula;
Era a cakava ga ena ligadra me ra qarava;
ka solia ki na dua na mataqali manumanu era vaka na kalavo kei na beka.
21Ni sa na lako mai ko Jiova me yavalata na vuravura
Era na vuni na tamata ena loma ni qele
Kei na veiqara vatu ena veidelana veivatu;
Me ra drotaka kina na cudru i Jiova
Se vunitaki ira mai na i serau ni nona i ukuuku.
22Ni kakua ni vakararavi ki na tamata
Ni sa vaka ga na i cegu sa tiko e ucuna.
Na cava sa yaga kina o koya?
Who We AreWhat We EelieveWhat We Do
2025 by iamachristian.org,Inc All rights reserved.
