SAME 47 - Ai Vola Tabu Ena Vakavakadewa Vou（FNV）

Na Lewa ni Kalou ena VeimatanituVua na i liuliu ni sere. A nodra Same na luve i Kora.

1Ni vakasausau ena marau na tamata kecega.

Ni sere vakadomoilevu ena nomuni vakacaucautaka na Kalou!

2Me vakarokorokotaki ko Jiova, o koya sa Cecere Sara,

Sa i koya na Tui Cecere, sa lewa tiko na vuravura kecega.

3Sa solia vei keda me da qaqa vei ira na tamata;

Ka sa qisi keda me da liutaka na veimatanitu.

4Sa digitaka vei keda na vanua eda tiko kina oqo,

Na nodra i votavota dokai na nomuni tamata sa dau loloma o koya.

5Sa lako cake na Kalou ki na nona i dabedabe vakatui.

Sa rogo na kaila ni marau kei na domo ni davui

Ni sa lako cake ko Jiova.

6Ni laga sere ena vakacaucautaka na Kalou;

Ni sere ena vakalagilagia na noda Tui.

7Sa Tui ni vuravura kecega na Kalou;

Ni vakacaucautaki koya ena sere.

8Sa dabe tiko na Kalou ena nona i dabedabe tabu vakatui,

Ka sa lewa na veimatanitu.

9Era sa lako vata mai na i liuliu ni veimatanitu,

Kei ira na nona tamata na Kalou i Epara-ama.

Sa nona ga na Kalou na i sasabai kece kei vuravura;

Sa vakalevulevui cake sara o koya.