ISIKELI 6 - Ai Vola Tabu Ena Vakavakadewa Vou（FNV）

Cudruva ko Jiova na Qaravi Kalou Tani

1A sa yaco vei au na vosa i Jiova, ka vaka,

2“Luve ni tamata, mo vakanamata ki na veiulunivanua e Isireli, ka tukuna vei ira na noqu i tukutuku.

3Mo kaya vei ira, ‘Oi kemuni na veiulunivanua e Isireli, ni rogoca na vosa ni Kalou ko Jiova! Sa kaya vakaoqo na Kalou ko Jiova ki na veiulunivanua, na veidelana, ki na veiqakilo, kei na veibuca: “Raica, oi au, ka'u na kauta vei kemuni na i seleiwau, ia ka'u na vakarusa na nomuni yavu cecere.

4Ena vakacacani na nomuni i cabocabonisoro, ka na talaraka na nomu i cabocabonisoro ni ka boi vinaka ka'u na viritaki ira sobu ena matadra na nomuni matakau.

5Au na veibiuyaka na yagodra mate na Isireli e matadra na nodra veimatakau; ka'u na ceburaka na suidra vakavolivolita na nodra i cabocabonisoro.

6Ena rusa na veikoro ni nomuni i tikotiko kece sara ka vakacacani na nomuni yavu cecere; me rusa ka vakacacani kina na nomuni cabocabonisoro eso, ka na talaraki ka vorolaki na nomuni veimatakau, ka talaraki sobu na nomuni i cabocabonisoro ni ka boi vinaka, ka vakarusai laivi na nomuni veicakacaka eso.

7Era na vakamatei na tamata ena veivanua kece sara; ia o ira sa bula rawa era na qai kila ni sai au ga ko Jiova.

8“Ia ka'u na vakavoca eso vei kemuni. Era na dro bula mai na i seleiwau ka ra na dui vakasavi ki na veimatanitu.

9Ia o ira na kena vo ka ra na kau vakabobula vei kemuni sa bula, era nanumi au ki na veimatanitu era na qai nanumi au mai na vanua era sa la'ki tu kina vakabobula, ni'u sa na vakamalumalumutaka na lomadra ka a gole tani mai vei au, ka vakavuna na nodra muri ira vakamataboko na veimatakau ka ra sa la'ki vakalou kina, era na qai vakasisilataka na nodra i valavala vakasisila kecega.

10Era na qai kila ni sai au ko Jiova; au a sega ni vosa wale vei ira ena noqu a kaya ni'u na cakava na ka ca oqo vei ira.”

11Sa tukuna vakaoqo na Kalou ko Jiova, ka vaka: “Mo kureitaki liga ena lomabibi ka vakabutubutu! Mo tagi ena rarawa levu ena vuku ni nodra i valavala vakasisila kecega na Isireli. Era na mate kina ena i valu, na dausiga, kei na mate dauveitauvi.

12O koya sa tiko vakayawa ena tauvimate ka mani mate sara; o koya sa tiko voleka ena mate ena i valu; o koya sa vo tiko ena mate ena dausiga. Au sa na vakaceguya kina vakaoqo na noqu cudru katakata vei ira.

13Era na veidavoci na yago mate ena kedra maliwa na kalou matakau kei na i cabocabonisoro, ka ra na veibiuyaki ena veiulu ni koro kecega, ena dela ni veiulunivanua, ena ruku ni veikau bulabula, kei na ruku ni vuni oki rugurugua kecega, na veivanua ga era vakacabora kina na nodra veika boi vinaka vei ira na nodra kalou matakau.

14Io, ka'u na dodoka yani na ligaqu vei ira ka na vakarusa na nodra vanua. Au na vakayacora me vanua lala ka vakaloloma na nodra veitikotiko kecega me vakatekivu mai na vanua talasiga ena ceva me yaco ki Ripila. Era na qai kila kina ni sai au ko Jiova.”