2 SAMUELA 23 - Ai Vola Tabu Ena Vakavakadewa Vou（FNV）

Otioti ni Vosa i Tevita

1Oqo na i otioti ni vosa i Tevita: O Tevita, na luve i Jese, sai koya na tamata a vakalevulevuya na Kalou, o koya ka lumuta na Kalou i Jekope, ka daunivucu rogo vinaka duadua e Isireli. A sa kaya o Tevita:

2Sa vosa e gusuqu na yalo i Jiova,

sa koto e yamequ na nona vosa.

3Sa vosa na nodra Kalou na Isireli;

sa kaya vei au na nodra Kaukauwa na Isireli;

Ni sa dua na dauvakataulewa dodonu vei ira na tamata,

ka lewa tiko ena nona rerevaka na Kalou.

4Sa kida vei ira o koya me vaka na rarama ni mataka,

me vaka na cila ni siga ena mataka ka sega kina na o,

me vaka na uca ka vakatubu co mai na qele.

5Sa sega ni vakaoqo na noqu mataqali vua na Kalou?

Ni sa cakava vei au o koya e dua na veiyalayalati tawa mudu,

Sa vakarau tu na ka kecega, ka tudei.

Ena sega li ni vakatubura o koya, na noqu veivuke kece kei na noqu gagadre?

6Ia o ira na tamata sa sega ni kila na Kalou era sa vaka na votonikau sa biu tani;

sa sega ni rawa ni ra tarai ena liga.

7E dodonu mo vakayagataka na i yaya ni cakacaka kaukamea se na moto;

era na kama yavu vakadua ena buka.

O Iratou na Sotia Rogo i Tevita(1Vei 11.10-41)

8Oqo na yacadra na tamata qaqa i Tevita: a kena i matai o Joseba Vasebeci na kai Takimona, o koya na nodratou i liuliu na i “Lawalawa e Tolu”; a sa taura na nona i moto ka vala kei ira na lewe 800 na tamata, ka sa vakamatei ira kece ena dua ga na gauna.

9A taravi koya vei iratou na lewe tolu na tamata qaqa o Iliesa na luve i Toto, na luve i Eoi. A tiko kei Tevita o koya ni ra bolei ira na kai Filisitia era a soqoni vata kaya e kea me ra vala, ka ra mani vakasuka kina na Isireli.

10Ia sa tucake ga vakatagane o Iliesa ka ravuti ira na kai Filisitia me yacova sara ni sa wawale ka wadakau mai na ligana ni sa kabita vakadua tu na nona i seleiwau. A sa rawata ko Jiova na qaqa levu ena siga o ya. Ni sa oti na i valu, era a lesu na Isireli ki na vanua e davo koto kina o Iliesa me ra luvata tani mai na nodra i yaragi na mate.

11E taravi Iliesa yani vei iratou na i lawalawa e tolu ka kilai levu oqo o Sama na luve i Aki na kai Arari. Era a soqoni vata na kai Filisitia e Leli, ena vanua ka tei tu kina na vuni bini; era a dro na tamata mai vei ira na kai Filisitia.

12Ia a tu vakadua o Sama ena loma ni loganibini, ka taqomaka, ka mokuti ira na kai Filisitia; a rawata ko Jiova e dua na qaqa levu.

13E ratou a qai lako sobu na lewe tolu vei ira na lewe tolusagavulu na i liuliu, ka ratou lako vei Tevita ena vula i tatamusuki ki na qara vatu mai Etulama; era a tiko vakaivalu mai na buca o Refeimi na nodra mataivalu na kai Filisitia.

14A sa tiko o Tevita ena gauna o ya ena dua na i drodro vakaivalu, ka ra sa vesuki Peceliema tiko e dua na i lawalawa kai Filisitia.

15A sa tuburi Tevita na galili ka sa kaya “Isa, me dua mada ga me bau kauta mai me'u gunuva na wai e takivi mai na mataniwai ena tutu ni matamata ni koro o Peceliema!”

16A ratou a qai curuma yani vakaukauwa na keba ni Filisitia na lewe tolu na sotia qaqa, ka la'ki taki wai mai na mataniwai mai Peceliema ena tutu ni matamata ni koro ka ratou kauta lesu yani vei Tevita. Ia sa bese ga ni gunuva o koya; ka sa livia yani me vakacabori vei Jiova,

17ka kaya, “Kemuni Jiova, sa dredre sara vei au me'u gunuva na wai oqo. Me'u gunuva li na nodra dra na tamata ka ra bolea na mate?” Ena ka oqo sa bese kina ni gunuva o koya.

Sai koya o ya eso na veika lelevu e ratou a cakava na lewe tolu na sotia qaqa ka kilai levu oqori.

18O Avisai na taci Joape (na tinadrau o Seruwaia) e nodra i liuliu na “Matasotia Qaqa Lewe Tolusagavulu” ka kilai levu. A sa vakaiyaragi ena moto o koya ka valuta e 300 na tamata ka vakamatei ira, ka sa yaco me kilai levu ena kedra maliwa na i “Lawalawa Lewe Tolusagavulu”.

19Sai Avisai ka rogo levu duadua na yacana vei ira na i “Lawalawa Lewe Tolusagavulu” ka sa nodra i liuliu; ia sa sega ga ni kilai levu sara me vakataki iratou na i “Lawalawa Lewe Tolu.”

20Ia o Penaia na luve i Jioiata mai Kapisieli e dua na tamata i valu rogo ka cakava na veika lelevu e liu. E a vakamatea o koya e rua na tamata qaqa ni Moapi; sa lako sobu talega o koya ka mokuta e dua na laione ena dua na qara ena gauna a lutu kina na uca cevata.

21E a mokuta talega o koya e dua na kai Ijipita, mata vinaka. E a taura tu e dua na moto na kai Ijipita; ia vakaiyaragi ga ena dua na i titoko o Penaia, ka kaliraka na moto mai ligana na kai Ijipita, vakamatei koya ena nona moto.

22A ka oqo a cakava o Penaia na luve i Jioiata, ka rogo kina na yacana me dua vei ira na i “Lawalawa Lewe Tolusagavulu”.

23A dokai vakalevu cake o koya vei ira na lewe tolusagavulu, ia a sega ga ni tautauvata kei iratou na lewe tolu oqori. A lesi koya kina o Tevita me dua vei ira na nona tamata yadra.

24Era okati ena kedra maliwa na i “Lawalawa Lewe Tolusagavulu” o Asaeli na taci Joape; o Elanani na luve i Toto na kai Peceliema;

25o Sama na kai Eroti, o Elika na kai Eroti,

26o Elesi na luve i Piliti, o ira na luve i Ikesi na kai Tikoa;

27o Episeri na luve i Anacoci, o Mipunei na luve i Usa;

28o Salimoni na luve i Eoi, o Merei na kai Nitofa;

29o Elepi na luve i Peana, e dua na kai Nitofa, o Itai na luve i Ripei mai Kipea vei ira na Penijamini;

30o Penaia na kai Piraconi, o Itai mai na uciwai mai Kaasi;

31o Api Aliponi na kai Arapa, o Asimavece na kai Peurimi;

32o Elaiapa na kai Selipimi, o Jonacani e dua vei ira na luve i Jaseni;

33o Sama mai na ulunivanua;

34o Elifeleti na luve i Easipai, na luvena na kai Meka, o Iliami na luve i Eitofeli na kai Kilo;

35o Esirei na kai Kameli, o Perei na kai Aripa;

36o Ikiali na luve i Necani mai Sopa, o Pani na luve i Kata;

37o Seleki na luve i Amoni, o Neri na kai Pieroci, o koya sa dau colata na i yaragi i Joape na luve i Seruwaia;

38o Ira na luve i Jecesi, o Karepi na luve i Jeceri;

39o Uraia na Itaiti.

O ira kecega era lewe tolusagavulu kavitu.