VOSA VAKAIBALEBALE 28 - Ai Vola Tabu Ena Vakavakadewa Vou（FNV）

1Era na dau dro na tamata ca ni sega ni dua e vakasavi ira, ia na tamata yalodina ena qaqa me vaka na laione.

2Ena qaqa ka tudei e dua na matanitu ni ra vuku ka yalomatua na kena i liuliu.

3Na i liuliu e dau vakacacani ira na tamata dravudravua sa vaka na uca ni sa vakarusa na i teitei.

4Kevaka o sega ni maroroya na lawa o sa to vata kei ira na tamata ca, ia kevaka o muria o sa saqati ira.

5Era sa sega ni kila na i valavala dodonu, ia o ira era rerevaki Jiova era sa kila vinaka sara.

6E daumaka cake me da dravudravua ka da yalodina, ka ca me da vutuniyau ka dau veivakaisini.

7Na cauravou sa muria na lawa sa vuku, ia o koya sa vakailawalawa kei ira na tamata tawa yaga sa ka ni veivakamaduataki vei tamana.

8O koya sa vutuniyau ena tubu sivia e rawata mai vei ira na tamata nona i yau sa kumuna vata ena qai nona e dua tani tale na tamata e dau lomani ira na dravudravua.

9Kevaka o na sega ni muria na lawa, ena sega ni taleitaka na Kalou me rogoca na nomu masu.

10Kevaka o veidabuitaka e dua na tamata yalododonu me cakava na ka ca, o na coko ga ena dai o sa cakava.

Ena taura ga na kena i sau o koya sa sega na nona cala.

11Sa dau nanuma ga na tamata vutuniyau ni sa vuku, ia na tamata dravudravua yalomatua ena kilai koya.

12Ni yaco me ra veiliutaki na tamata yalododonu era marau na tamata kecega, ia ni ra i liuliu na tamata ca, era na vuni na tamata.

13O na sega ni toro cake kevaka o vunia tiko na nomu i valavala ca. Mo vakatusa ga ka biuta tani, ena qai vakaraitaka kina vei iko na Kalou na nona yaloveivosoti.

14Ni o rerevaka tiko na Turaga o na marau tikoga. Kevaka o na veisaqasaqa o na rusa.

15Na i liuliu ca sa vaka na laione sa tagi mai se na bea sa cici mai vei ira na dravudravua.

16Na i liuliu sa sega ni vuku ena dau veivakasaurarataki. Ia o koya e cata na veivakaisini ena balavu na nona veiliutaki.

17Na tamata sa vakadinadinataka ni laba, ena dauveidroyaki voli ga me yacova sara na mate. Me kakua sara ni dua Me vukei koya.

18O koya sa caka dodonu ena vagalalataki, ia o koya ena ia na veivakaisini ena bale.

19Na dauteitei daucakacaka ena levu na kena, ia o koya sa dau vakatawayagataka na gauna ena ka levu na nona dravudravua.

20Na tamata yalodina ena vakalougatataki vakalevu, ia o koya sa vakusakusa me vutuniyau ena totogitaki.

21Sa sega ni dodonu na veitotaki. Ia sa rawa me ra cata na turaganilewa, kevaka era saumi me ra kakua ni cakava na ka e dodonu.

22Na tamata daunanumi koya ena dau vakusakusa me vutuniyau ka sega kina ni kila ni sa voleka na dausiga.

23Vakadodonutaka e dua na tamata, ena qai la'ki vinakata cake e muri mai na veicavilaki.

24O koya e nanuma ni sega ni cala na nona butakoca na nodrau i yaya na nona i tubutubu sa sega ni duidui kei na daubutako.

25Na daunanumi koya vakai koya sa dau vakavuna ga na leqa. Ena daumaka cake sara na ka o sota kaya kevaka o vakadinati Jiova.

26Sa ka lialia me da muria ga na noda nanuma, ia o koya sa muria na nodra i vakavuvuli na tamata vuku ena vakabulai.

27Dau soli ka vei ira na dravudravua, ena sega na ka o na leqa kina, ia o koya e via vunitaki koya mai vei ira na dravudravua ena cudruvi.

28Era na vuni na tamata ni ra sa yaco me ra i liuliu na tamata ca. Ia ni ra sa bale mai na i tutu ni veiliutaki era na duri cake tale na tamata yalododonu.