OSEA 7 - Ai Vola Tabu Ena Vakavakadewa Vou（FNV）

1“Ena gauna ka'u via vakabulai Isireli kina me ra vuavuai tale, na ka ga ka'u sa raica sai koya na nona i tovo vakasisila kei na i valavala ca era sa vakayacora. Era sa veilawakitaki vakai ira; era sa curu vale vakailoa ka ia na butako; era sa butakoci ira na tamata ena veitolo ni gaunisala.

2Era sa sega ni bau vakasamataka ni'u na dau nanuma tikoga na nodra caka cala kece sara; ia na nodra i valavala ca sa wavoliti ira, ka sa tu ga e mataqu.”

Na Buki Vere ena Valenitui

3A sa kaya ko Jiova, “Era sa vakaisina na tui o ira na tamata ena nodra buki vere.

4Era sa tamata dauveidabui kecega ka dauveibutakoci. Na nodra yalo ca e sa vaka na lovo katakata, na kena e se bera ni qisa o daunivavavi me yacova na gauna sa vakarautaki oti kina na valawa droka me vavi.

5Ena gauna ni nona solevu na tui, era sa vakavuna me gunu waini ka i valavala lialia na tui vata kei ira na nona vakailesilesi.

6Io, sa waqa ga me vaka na lovo na lomadra ena vuku ni nodra buki vere. A sa tubu cake na nodra cudru waqawaqa ena bogi taucoko, ka sa caudre cake na kena bukawaqa ena siga ka tarava.

7“Ena levu ni nodra yalo katakata era sa vakamatei ira kina na nodra i liuliu. Era sa bale yadudua na nodra tui, ia sa sega ga ni dua e masuti au me kere veivuke.”

O Isireli kei na Veimatanitu Tale Eso

8A sa kaya ko Jiova, “O ira na Isireli sa vaka e dua na i buli madrai sa buli vakavo. Era sa dau vakararavi ki na veimatanitu sa vakavolivoliti ira

9ka ra sa lecava kina ni nodra vakararavi oqo ki na veimatanitu tani sa vakavuna me kau tani kina na nodra kaukauwa. Sa vakaiyalayala ga na nodra siga, ia era sa sega ga ni kila.

10Na nodra viavialevu na Isireli sa tukuni ira ga. Era sa sega ga ni lesu tale mai vei au, ko Jiova na nodra Kalou, ka veitalia sara na veika sa vakayacori oti.

11Sa vuka voli me vaka na ruve lialia o Isireli; era sa kaci ni kere bula vakailiu vei Ijipita, ka ra sa qai cici kivei Asiria ni oti o ya.

12Ia ni sa ra lako, au na qai tevuka na noqu lawa ni veicoriti ka vesuki ira me vaka na manumanu vuka. Au na kanakuitataki ira ena vuku ni veika ca era sa vakayacora.

13“Era sa kalouca! Era sa biuti au ka talaidredre vei au. Era na vakarusai. Au a via vakabulai ira, ia era sa sokalou vakarairai ga vei au.

14Era sa sega ni masuti au mai na vu-ni-yalodra dina, ia era sa qai davoraki ira sobu ga ka qoqolou me vakataki ira sa sega ni kila na Kalou. Ena gauna era masulaka kina na sila kei na waini, era sa ia ga na vakasequruquru bati. Sa dua dina na yavu tamata drecala o ira oqo!

15E dina ga ni'u a tuberi ira cake mai oi au ka vakaukauwataka na ligadra, era sa nakita ga me ra bukiveretaki au.

16Era sa vuki tani tikoga mai vei au ka goleva na kalou sa sega vua na kaukauwa. Era sa sega ni nuitaki me vaka na dakaititi veve. Ia ena vuku ni nodra vosavosa vakalialia na nodra i liuliu, era na bale kina ena dua na i matemate vakadomobula, ka ra na veiwalitaka na kai Ijipita.”