1A qai sauma tale o Ilaiu, ka kaya
2O kemudou oqo dou sa bau vuku sara ga,
Dou sa matai dina;
Ia dou bau vakarorogo mada ki na ka au tukuna tiko.
3E rawa ni dou tukuna ni kana vinaka e dua na kakana ni dou tovolea;
Ia na cava ga o dou sega kina ni tukuna rawa
Na veivosa vuku ni dou sa rogoca?
4Na lewai ni veileti oqo e sa vakatau sara ga vei kedatou.
5Sa suguta tiko o Jope ni dodonu tu,
Ka besetaka tiko na Kalou ni vakatauca vua na lewa dodonu.
6Sa taroga o Jope, E rawa vakacava me'u lasutaka ni'u cala?
Na noqu vakamavoataki au, au sa na mate kina,
Ia au sega sara ga ni bau i valavala ca.
7O dou sa bau raica oti mada e dua e tautauvata kei na tamata oqo o Jope?
E sega sara ga ni bau vakaraitaka o koya na rokovi ni Kalou.
8Sa vinakata o koya na salavata kei ira na tamata ca
Ka dau veigadeyaki vata talega kei ira na tamata i valavala ca.
9E kaya o koya ni sega na ka vinaka e rawa mai na via
Muria na loma ni Kalou.
10O kemudou na tamata yalomatua.
Ia, dou vakarorogo mada vei au.
Ena cakava beka na ka ca na Kalou Kaukauwa?
11 Same 62.12 E dau sauma o koya na ka era cakava na tamata
Ka cakava vei ira na ka sara ga e ganita me caka vei ira.
12Sa sega sara ni dau caka ca na Kalou Kaukauwa;
Sa sega talega ni dau cakava vua e dua na tamata na ka e sega ni dodonu.
13Sa rawata beka na nona kaukauwa na Kalou mai vua e dua na tani?
E dua beka na tani e solia me liutaka na vuravura na Kalou?
14Kevaka e vakasuka lesu tale na Kalou na i cegu ni bula,
15Era na mate na tamata kecega era bula tiko
Ka ra vuki tale me kuvu ni qele.
16Kevaka o dou yalomatua, ia dou vakarorogo vei au.
17O dou nanuma beka ni besetaka na lewa dodonu o koya na Kalou kaukauwa?
O dou sa vakacalai koya tiko beka na Kalou yalosavasava?
18Na Kalou ga e vakacalai ira na tui kei ira na turaga,
Ena gauna sa sega kina na betedra se ni ra sa tamata ca.
19Sa bulia na tamata kecega na Kalou;
Sa sega ni tovata kei ira na turaga,
Se me tovaki ira na vutuniyau ka sega o ira na dravudravua.
20E rawa ni mate vakasauri tu ga ena bogi e dua na tamata.
Sa samuti ira na tamata na Kalou me ra rusa;
Ka vakaweleweletaka tu ga na vakamatei ira na tamata qaqa.
21Sa vakaraica vakavinaka sara ga o koya
Na nodra cavu i kalawa yadua na tamata.
22Sa sega na butobuto e butobuto vinaka sara
Me rawa ni vuni kina mai vua na Kalou e dua na tamata.
23Sa sega ni kena dodonu me dau lokuca na Kalou
Na gauna ni nodra lako yani vua na tamata
Me la'ki vakataulewa vei ira.
24E sega talega ni kena dodonu me cakava o koya
E dua na veivaqaqai me ra vakasivoi kina na i liuliu
Ka ra vakaisosomitaki vou tale.
25Me vaka ni sa kila tu o koya na ka era cakava,
Sa vakasivoi ira ga ka vakarusai ira ena bogi.
26Sa kuitaki ira na tamata ca o koya ena vanua sara ga
Me ra raica kina na tamata kecega,
27me baleta ni ra a sa muduka na nodra muri koya
Ka ra buturaka na nona i vakaro kecega.
28Era vakasaurarataki ira na dravudravua
Me ra qai tagi qoqolou yani kina vua na Kalou,
Ka sa mani rogoca sara o koya na nodra kaci ni veivuke.
29Kevaka e lewa na Kalou me sa laivi ira tu mada ga,
Ena sega ni vakalewai koya rawa kina e dua na tamata.
Kevaka e tabonaka tani na matana o koya,
Era na vakaloloma sara ga na tamata.
30Sa na sega na ka era cakava rawa na veimatanitu
Me tarova na nodra lewai ira na tui dauveivakasaurarataki.
31I Jope, o sa vakatusa oti beka vua na Kalou na nomu i valavala ca,
Ka o sa yalataka oti tale beka ga
Ni o sa na sega ni valavala ca tale?
32O a sa kerea oti beka vua na Kalou
Me vakaraitaka vei iko na nomu cala,
Ka o a sa vakadonuya tale beka ga
Ni o sa na muduka na cakava na ka ca?
33Me vaka ni o besetaka na ka sa cakava na Kalou,
O na rawa beka ni nuitaka
Ni na cakava o koya na ka o vinakata?
Sa nomu na lewa, ka sega ni noqu;
Ia tukuna mai oqo vei keitou na ka o nanuma.
34Na tamata yalomatua ena duavata sara ga kei au;
Na tamata vuku talega e rogoca na noqu vosa ena tukuna,
35Ni o Jope sa vosa tiko mai ena nona lecaika,
Ka sega sara ga na ka e tukuna e bau dua na kena i balebale.
36Ni o vakananuma na veika kece e tukuna o Jope,
O na kunea rawa ni vaka na vosa ni dua na tamata ca na nona vosa.
37Sa besetaka o koya ni muduka na nona i valavala ca;
Ia ena matadatou kece sara ga,
Sa qai vosacataka ka rulaka tiko na Kalou.
Who We AreWhat We EelieveWhat We Do
2025 by iamachristian.org,Inc All rights reserved.
