MACIU 6 - Ai Vola Tabu Ena Vakavakadewa Vou（FNV）

Vakavuvuli me Baleta na Ka ni Loloma

1“Dou qarauna mo dou kakua ni vakayacora na nomudou ka ni loloma vakalotu ena matadra na tamata me ra raica kina na veika dou cakava. Kevaka dou sa vakayacora vakakina, ena sega na kemudou i sau mai vua na Tamamudou mai lomalagi.

2“O koya oqo, ni o sa soli ka ni loloma, kakua ni uvu davui e matamu me vaka era dau cakava na dauveivakaisini ena veivalenilotu kei na veigaunisala, me ra dokai ira kina na tamata. Au sa kaya vakaidina vei kemudou, era sa taura oti na kedra i sau.

3Ia ni dou sa soli ka ni loloma, me kakua ni kila na ligamu i mawi na ka e cakava tiko na ligamu i matau,

4me ka vuni kina na nomu i loloma. Ia na Tamamu, o koya sa raica na veika e sa vakayacori lo, ena qai sauma vei iko.

Na i Vakavuvuli me Baleta na Masu(Luke 11.2-4)

5“Ni dou sa masu, mo dou kakua ni vakataki ira na dauveivakaisini; ni ra dau vinakata me ra masu ni ra tucake tu ena veivalenilotu kei na veitutu ni sala, me raici ira kina na tamata. Au sa kaya vakaidina vei kemudou, era sa taura oti na kedra i sau taucoko.

14“Kevaka dou sa vosota na nodra cala era sa caka cala vei iko, ena vosoti kemudou vakakina na Tamamudou mai lomalagi;Mari 11.25,26

15Ia kevaka dou sega ni vosota na nodra cala na tamata, ena sega talega ni vosota na nomudou cala na Tamamudou.

Na i Vakavuvuli me Baleta na Lolo

16“Ni dou sa lolo, kakua ni vakaveveku mata me vakataki ira na dauveivakaisini, ni ra dau vukica vakatani na matadra, me laurai vei ira na tamata na nodra lolo voli. Au sa kaya vakaidina vei kemudou, era sa taura oti na kedra i sau.

17Ia o iko, ni o sa lolo, lumuta na ulumu, ka tavoya na matamu,

18me kakua kina ni laurai vei ira na tamata na nomu lolo voli, ia ki vua ga na Tamamu sa tabogo me kila. Ia na Tamamu, o koya sa raica na ka e vuni, ena qai sauma ga vei iko.

Na i Yau mai Lomalagi(Luke 12.33-34)

19“Dou kakua ni kumuna vata vei kemudou na i yau e vuravura ena vanua e dau vakacacana na sarasara kei na veveka, ka ra dau curu botea kina na daubutako ka butakoca,Jeme 5.2,3

20ia dou kumuna ga na nomudou i yau mai lomalagi ena tikina e sega ni vakacacana kina na sarasara se na veveka, ka sega ni dau curu botea kina na daubutako me butakoca.

21Ni vanua ga e tiko kina na nomudou i yau, ena tiko talega kina na yalomudou.

Na Cina ni Yago(Luke 11.34-36)

22“Sa cina ni yago na mata. Kevaka e vinaka tu na matamu, ena rarama tu kina na yagomu taucoko;

23ia, kevaka sa ca na matamu, ena butobuto na yagomu taucoko. Ia, kevaka sa butobuto tu na rarama e lomamu, sa wacava na levu ni butobuto o ya!

Na Kalou kei na i Yau(Luke 16.13; 12.22-31)

24“E sega ni dua na tamata me qarava rawa e le rua na turaga. Ni na cata e dua ka lomana ga e dua, se ena kabita sara e dua ka beci koya ka dua. Dou sega ni qarava rawa na Kalou kei na i yau.

25“Oqo na vuna au sa kaya kina vei kemudou mo dou kakua ni lomaocaoca me baleta na nomudou bula ena ka mo dou kania, se na ka mo dou gunuva, se me baleta na yagomudou, se na ka mo dou vakaisulu kina. E sega li ni bibi cake na bula mai na kakana, kei na yago mai na i sulu?

26Dou saravi ira mada na manumanu vuka: era sa sega ni dau kakaburaki, se tatamusuki, se daukumuna vata ki na lololo; ia, sa vakani ira tikoga na Tamamudou vakalomalagi. Dou sa sega li ni yaga vakalevu cake sara mai vei ira?

27O cei vei kemudou, ni sa lomaocaoca, ena rawa ni vakuria kina vakalailai ga na siga ni nona bula?

28“A cava na vuna dou sa lomaocaocataka kina na i sulu? Dou saravi ira mada na senikau ni veikau kei na nodra tubu; era sa sega ni cakacakataka se talia vakataki ira na nodra i sulu.

29Ia au sa kaya vei kemudou ni o Solomoni, ena nona i ukuuku kecega, a sa sega ni vakaisulu totoka sara me vakataki ira na senikau oqo.1Tui 10.4-7; 2Vei 9.3-6

30Ia kevaka sa vakasuluma vakaoqo na Kalou na co ni veivanua, na co ka sa bula edaidai ka sa yali tale yani ni mataka ni sa vakamai ena lovo, ena sega li ni qai levu cake sara na nona kauwai me vakasulumi kemudou, Oi kemudou sa lailai na nomudou vakabauta?

31“O koya oqo, mo dou kakua kina ni lomaocaoca, ka kaya, ‘Na cava eda na kania?’ se ‘Na cava eda na gunuva?’ se ‘Na cava eda na vakaisulu kina?’

32Ni ra dau vakasaqara na veika kecega oqo na kai veimatanitu tani, ia sa kila tu na Tamamudou vakalomalagi na yaga ni veika kecega oqo vei kemudou.

33Ia dou vakasaqara taumada ga na matanitu ni Kalou kei na nona dodonu, ka na soli me kena i kuri vei kemudou na veika kecega oqo.

34O koya oqo mo dou qai kakua kina ni lomaocaoca me baleta na siga ni mataka, ka ni na qai tiko talega na lomaocaoca ena yaco mai kina. Sa kua soti ni da vakuria na lomaocaoca vakaoqo ki na siga yadua.