1A qai vosa o Vilitati na luve i Sua, ka kaya,
2I Jope, mo kila tiko ni vosa, na cagi.
A cava soti na dede ni nomu vosa tiko vakaoqo?
3Na Kalou e sega sara ni dau moica vakaveve na ka dodonu;
Ka sega ni bau daro vakadua na nona caka dodonu.
4E ratou a sai valavala ca dina ga na luvemu vua na Kalou,
Sa i koya sa kuitataki iratou kina ena i totogi e rauti iratou.
5Ia oqo mo qai saumaki mai ka cike matua
Vua na Turaga na Kalou Kaukauwa.
6Kevaka o tamata savasava ka dodonu na nomu tiko,
Ena qai lako mai na Kalou ka mai vukei iko,
Ka vakavoutaka tale na nomu vuvale kei na nomu i tikotiko
Me nona ka ni vakavinavinaka vei iko.
7Na i yau e a yali vei iko e liu e lailai sara
Ka sega ni rawa ni o vakatauvatana kei na kena levu
Ena qai solia vei iko na Turaga.
8Vakasamataka mada vakalekaleka na vosa vuku ni gauna makawa;
Ka vakananuma na veika dina era a kila tu na tamada.
9O keda eda a qai sucu ga ena noa, ka lailai na ka eda kila.
Na noda bula e vuravura e sega ni dei,
Rui lekaleka wale ga ni sa sega ni wili me dua na ka.
Eda sega ni wili ni da sai yaloyalo wale ga.
10Laiva me ra vakavulici iko na vuku makawa;
Ka rogoca mada, na ka oqo era a kainaka:
11E sega ni bula rawa na kuta ena qele mamaca;
E rawa wale ga ni bula ena vuci se na vanua suasua sara.
12Ena malai duadua e liu na kuta kevaka sa maca na wai,
Ia kevaka sa musu ena sega ga na betena ni ra sa rui lalai
13Na tamata lecava na Kalou kei na veikuta oqori
E sega na kedrau duidui,
Baleta ni guileca ga na Kalou,
Sa qai yali na nodra i nuinui.
14Era vakararavi tiko ki na dua na vunikau vuca.
15Kevaka era ravita na vunikau vuca,
Era na sega beka ni bale vata kaya?
Kevaka era lilita e dua na taba ni kau oqori,
Era na sega beka ni lutu vata?
16Na tamata ca sa vaka e dua na vunikau bulabula,
Sa tete yani na tabana ka vakaruguta na vanua.
17Na wakana talega era sa tete,
Ka ra salava na veivatu e loma ni qele.
18Ia ni ra sa cavuti laivi ga
Ena sega e kila ni ra a tiko taumada e kea.
19Na nodra marau na tamata ca sa vaka wale tu ga oqori;
Era na qai tubu tale mai e kea eso me kedra i sosomi.
20O ira na tamata vinaka, dina ka dodonu,
E sega ni dau biuti ira na Kalou.
Ia, e sega dina sara ga ni dau vukei ira na tamata ca.
21Raica, ena vakamarautaki iko na Kalou,
Ka na levu na nomu dredre kei na qoqolou.
22Ena luvuci ira na nomu meca o koya ena madua,
Ka na vakarusai ira na tamata i valavala ca.
Who We AreWhat We EelieveWhat We Do
2025 by iamachristian.org,Inc All rights reserved.
