SAME 61 - Ai Vola Tabu Ena Vakavakadewa Vou（FNV）

Vakataudeitaki Nona Veimaroroi na KalouVua na i liuliu: kei na i yaya ni vakatagi vaka-wa. A nei Tevita.

1Kemuni na Kalou, ni rogoca na noqu tagi;

Ni vakarogoca na noqu masu.

2Au a tagi yani vei kemuni ena noqu nuiqawaqawa,

Ni'u yawa sara mai na noqu i tikotiko!

Ni kauti au ki na dua na i drodro e taqomaki vinaka,

3Baleta ni sai kemuni o ni sa dau taqomaki au;

Na noqu bai kaukauwa mai vei ira na noqu meca.

4Ni solia vei au me'u tiko ena nomuni valelaca ka sega ni mudu;

Ka me'u taqomaki vinaka ena ruku ni tabamuni.

5O ni sa rogoca na noqu veivosa ni yalayala, na Kalou,

O ni sa qai solia vei au na nodra i votavota era sa rokovi kemuni.

6Ni vakabalavutaka na nona bula na tui;

Io, me laivi me bula tikoga!

7Me qai veiliutaki tikoga e matamuni na Kalou ka sega ni mudu;

Ni qai maroroi koya ena nomuni loloma tudei kei na dina.

8Au na daulaga sere tikoga kina ena vakacaucautaki kemuni,

Ni'u sa cabora yani ena veisiga na veika au sa yalayala kina.