2 TUI 9 - Ai Vola Tabu Ena Vakavakadewa Vou（FNV）

Sa Lumuti o Jeu me Tui Isireli

1A sa kaciva e dua vei ira na i lawalawa parofita cauravou o Ilaisa, ka kaya vua, “Mo vakarautaki iko vinaka mada, ka kauta na tavaya waiwai olive oqo e ligamu ki Remoci Kiliati.

2Ni o sa yaco ki kea, mo qarai Jeu na luve i Josefati, na makubui Nimesai. Mo kauti koya ki na dua na rumu e loma ni vale

3ka livia na waiwai olive oqo ki uluna, ka kaya, ‘Sa vosa vakaoqo ko Jiova, Au sa lumuti iko mo tui Isireli.’ Mo qai dolava na katuba ka dro; mo kua tale ni wawa.

4A sa lako yani ki Remoci Kiliati o koya na parofita cauravou.

5Ia ni sa yaco yani, a sa raica ni ra bose tiko na turaganivalu, ka sa kaya, “Sa dua na noqu i tukutuku vei iko na kavetani ni valu.”

A taroga o Jeu, “O cei vei keitou oqo o vosa tiko vua?”

A sa kaya na i talai, “Vei iko, na kavetani ni valu.”

6A rau sa qai curu yani ki loma na lewe rua, ka sa livia na parofita cauravou na waiwai ki na ului Jeu, ka kaya vua, “Sa kaya vakaoqo ko Jiova na nodra Kalou na Isireli, ‘Au sa lumuti iko mo nodra tui na noqu tamata na Isireli.

11Ni sa curu yani o Jeu vei ira na nona i tokani turaganivalu, era sa tarogi koya, “E vinaka tiko li na veika kece? A cava e lako mai kina vei iko na tamata lialia o ya?”

A sauma vei ratou o Jeu ka kaya, “Dou sa kilai koya kei na ka sa vinakata.”

12Era sa kaya, “E segai, keitou sa sega ni kila. Mo tukuna mai vei keitou na ka e tukuna.”

A sa kaya o Jeu, “Sa vosa vakaoqo vei au o koya, ka kaya, ‘Sa kaya vakaoqo ko Jiova: Au sa lumuti iko mo tui Isireli.’ ”

13E sega ni bera ni ra sa tevuka na nodra i tutuvi na turaganivalu me tucake kina o Jeu, era a uvu davui, ka kailavaka, “Sa tui o Jeu!”

14A qai bukiveretaki Jorami o Jeu na luve i Josefati, na makubui Nimesai. A vakatawai Remoci Kiliati tiko o Jorami kei ira kece na Isireli ena vuku ni kena qarauni o Eseeli na tui Siria.

15Ia sa lesu ki Jesirieli o Jorami na tui me la'ki vakabulabula ena vuku ni mavoa e yacovi koya ena nona vala kei Eseeli na tui Siria. A sa kaya o Jeu, “Kevaka sa lomamudou oqo, me kakua ni dua e dro tani mai na koro me la'ki tukutuku i Jesireli.”

16A sa vodo ena nona qiqi vakaturaga o Jeu ka lako yani i Jesireli. A se mavoa voli ga o Jorami, ka veisiko yani vua o Esaia na tui Juta.

17Ni tucake tu na sotia yadra ena vale vakarewa i cake mai Jesireli, a raici Jeu kei na nona tamata ni ra sa voleka yani, ka sa kaya, “Au sa raica eso na tamata era sa lako tiko mai oqo!”

A sa kaya o Jorami, “Me talai mada e dua na tamata dauvodo ose vei ira me kilai kina se ra keda meca se ra noda i tokani.”

18A sa lako yani na tamata dauvodo ose me la'ki tavaki Jeu, ka kaya vua, “E gadreva na tui me kila se o sa lako mai me vaka e dua na nona i tokani.”

A sauma o Jeu ka kaya, “E sega ni dua kina na nomu bisinisi! Mo vuki ga ka muri au mai?

Na sotia yadra ena vale vakarewa i cake sa kaya, “Sa yacovi ira o koya ka talai, ia sa sega ga ni lesu tale mai.”

19A sa talai tale e dua na dauvodo ose, ka sa taroga na taro vata ga o ya. A sauma lesu o Jeu, ka kaya, “Sa sega ni dua kina na nomu bisinisi! Mo muri au ga mai.”

20A sa tukuna tale na sotia yadra ni sa yaco vei ira o koya ka talai, ia sa sega ga ni lesu tale mai. A sa kaya talega, “Ia e vaka ga na i vakarau ni vakacici ose nei Jeu na makubui Nimesai oqo, baleta ni dau vakadomobula na nona vakacici ose ni qiqi.

21A sa vakarota o Jorami na tui, “Dou vakarautaka na noqu qiqinivalu.” Ni sa vakarautaki oti, e rau sa qai lako yani ena nodrau dui qiqinivalu o Jorami na tui Isireli kei Esaia na tui Juta me rau la'ki tavaki Jeu, ka ratou sota ena vanua i Nepoci na kai Jesireli.

22Ni sa raici Jeu o Jorami, a sa tarogi koya, “I Jeu, o sa lako li mai ena vakacegu kei na sautu?”

A sa sauma o Jeu ka kaya, “Me yaco rawa li vakaevei na tiko sautu kei na vakacegu ni se ia tu ga oqo na vakatevoro kei na qaravi kalou matakau ka vakatekivuna o Jesipeli na tinamu?”

23A sa dreta o Jorami na i varaile ni nona ose me vuki tani ka dro, ka kailavaka yani vei Esaia ena domoilevu, “I Esaia, sa dua na vere!”

24A vakadretaka vinaka na nona dakaititi ena nona i gu taucoko o Jeu, ka vanai Jorami ena maliwa ni tabana. A sa coka na utona na gasau, ka sa bale sobu ena nona qiqinivalu.

25E qai kaya o Jeu vei Pitika na nona turaganivalu, “Mo la'ki taura na yagona ka viritaka ki na tiki ni vanua i Nepoci na kai Jesireli. Mo vakananuma lesu na nodaru a vodo ose tiko e daku i tui Eapi na tamana, ka qai tukuna kina ko Jiova na vosa oqo me baleti Eapi:

26‘Au a raica na vakamatei nei Nepoci kei ratou na luvena tagane ena noa. Ena ka oqo au sa yalataka kina ni'u na sauma vei iko ena tiki ni vanua vata ga oqo.’ Ia oqo, mo laveta cake na yago i Jorami ka viritaka yani ena tiki ni vanua i Nepoci, me vaka na vosa i Jiova.”Na Vakamatei nei Tui Esaia(2Vei 22.7-9)

27Ni sa raica o Esaia na tui Juta na veika sa yaco, a sa dro ki na koro o Peci Ekani. A cici muri koya o Jeu, ka vakaroti ira na nona tamata, “Dou vakamatei koya talega!” Era a vakamavoataki koya ena gauna e kauta cake kina na nona qiqinivalu ena i cabecabe ki Kuri, ka voleka ki na koro o Ipiliami. Ia sa sasaga voli ga me la'ki yacova na koro levu o Mekito, ka mate e kea.

28Era a kauti koya lesu ki Jerusalemi na nona vakalesilesi ena dua na qiqinivalu ka vakotori koya vata kei ira na nona qase ena i bulubulu mai na Koro i Tevita.

29A sa yaco me tui Juta o Esaia ena i katinikadua ni yabaki ni nona veiliutaki vakatui e Isireli o Jorami na luve i Eapi.

Vakamatei na Ranadi o Jesipeli

30A sa yaco yani ki Jesireli o Jeu. Ni sa rogoca o Jesipeli na veika sa yaco, a sa boroya ruarua na matana, ka ukucavutaka na uluna, ka iro sobu mai katubaleka e cake ni valenitui.

31Ni sa curuma yani o Jeu na matamata ni koro, a sa kailavaka mai o koya, “Simirai o iko! A tamata dauveivakamatei o iko! A cava o mai cakava eke?”

32A sa rai cake o Jeu vaka ki na katubaleka ka kailavaka ena domolevu, “O cei e totaki au? O cei?” A qai iro sobu mai vua e lewe rua se tolu na i vakalesilesi ni valenitui mai na katubaleka,

33ka kaya yani vei ratou o Jeu, “Dou viritaki koya sobu mai!” A ratou a viritaki koya sobu ki ra; a sa sika cake na nona dra ki na lalaga ni bai kei ira na ose. A sa vaqiqica o Jeu na nona ose kei na qiqi ena dela ni yagona.

34Sa qai curuma yani na koro o Jeu, a sa kana ka gunu; a sa qai kaya, “Dou la'ki raica na yagona na yalewa cudruvi o ya ka buluta; ni sa luvenitui o koya.”

35Ia o ira era sa la'ki buluta sa kunea wale ga na nona qavokavoka, kei na sui ni yavana kei na ligana.

36Ni sa vakadewataki oqo vei Jeu, a sa kaya, “Oqo na vosa i Jiova ka cavuta ena gusu i Ilaijia na kai Tisipa na nona tamata, ni a kaya, ‘Era na kania na koli na yago i Jesipeli ena vanua o Jesireli.1Tui 21.23

37Na vo ni yagona era na biu tu me vaka na deni manumanu, me kakua kina ni dua na tamata me vakatakilai koya rawa me kaya kina, ‘Oqo o Jesipeli.’ ”