1O Pasuri na luve i Ima, e dua na bete ka i liuliu ena Vale ni Soro. A rogoci Jeremaia na parofita ni sa vunautaka na veika oqo.
2A vakanakuitataki Jeremaia o Pasuri ka vesuka ena sinucodo ki na matamata mai cake i Penijamini ena Valenisoro.
3Ena mataka ka tarava ni sa sereki koya o Pasuri, a kaya vua o Jeremaia, “Sa sega ni vakatoka na yacamu ko Jiova o Pasuri. Sa vakatoka me yacamu o Rere ena veiyasana kecega.
4A sa kaya ko Jiova, “Au na cakava mo vu ni rere vei iko vakataki iko, kei ira na wekamu, ia o na raica ni ra vakamatei kece ena i seleiwau mai vei ira na kedra meca. Au na soli ira kece sara na lewe i Juta vua na tui Papiloni; ena kauti ira vakabobula eso ki Papiloni, ka so era na vakamatei.
5Au na laivi ira talega na kedra meca me ra butakoca na i yau kece sara ni koro oqo ka vesuka na kena veiyaya kece sara kei na ka e tu kina, era na bau kauta talega na nodra veiyau talei na tui Juta ka kauta kece ki Papiloni.
6Ia o iko Pasuri kei ira kece na nomu vuvale, o ni sa na kau vakavesu ki Papiloni. O na mate mai kea ka bulu kina vata kei ira na wekamu o tukuna vei ira na veika lasu oqo.”
Na Vakatukutuku i Jeremaia vei Jiova7Kemuni na Turaga,
O ni sa vakaisini au,
Ka'u sa veidabuitaki.
O ni sa kaukauwa cake vei au,
Ka vakamalumalumutaki au.
Era sa vakalialiai au
Na tamata kecega;
Era sa dredrevaki au
Ena loma ni siga taucoko.
8Ena veigauna kece ni'u vosa,
Au dau qolou ka kailavaka,
Na i Tovo Kaukauwa! na Rusa!
Turaga, au sa vakalialiai ka vakacacani
Ena veigauna kecega,
Baleta ni'u vunautaka tiko
Na nomuni vosa.
9Ia ena gauna au kaya kina,
“Au na guilecava na Turaga
Ka sega tale ni vosa
Ena vuku ni yacana.”
A qai kama na nomuni vosa ena lomaqu
Me vaka na buka;
Sa sogolati ena suiqu.
Au sa oca ena vosota tiko e lomaqu
Ka'u sa sega ni rawa ni tarova.
10Au sa rogoca
Na nodra vakasolokakana na lewe vuqa,
Era sa vakatoka na yacaqu
Me o vu ni rere
Ena veiyasana kecega.
Era a kaya, “Vakatukutukutaki koya.
Me da vosa vakacacataki.
O ira sara mada ga na wekaqu,
Era sa waraka na noqu bale sobu.”
Era kaya, “Ena rawa beka ni lawakitaki,
Me rawa ni da vesuki koya,
Ka sauma noda cudru vua?”
11Ia, Turaga
O ni sa totaki au,
O ni sa kaukauwa ka qaqa
Ka ra sa tarabe
O ira kece era vakararawataki au;
Era na sega sara ni qaqa.
Era na vakamaduataki sara vakalevu
Baleta ni ra na sega ni rawa ni qaqa.
Na nodra madua
Ena sega ni oti rawa
Ka na sega sara ni guilecavi.
12Kemuni Jiova ni lewevuqa,
O ni sa vakatovolea na tamata dodonu.
O ni sa kila
Na ka sa tiko ena yalodra
Kei na nodra vakasama na tamata,
Ia me'u raica mada
Ni o ni na sauma na ca
Vei ira na kequ meca,
Baleta ni'u sa vakararavi vei kemuni.
13Sere vei Jiova!
Vakacaucautaka na Turaga!
Sa vueti ira na vakalolovirataki
Mai na nodra kaukauwa
Na tamata i vadi ca dau veivakalolomataki.
14Sa dua na siga ca au a sucu kina!
Guilecava na siga e a vakasucumi au kina o tinaqu!
15Me yaco na ca
Vua na tamata e a vakamarautaki tamaqu,
Ni sa kauta vua na i tukutuku,
Sa sucu e dua na luvemu tagane!”
16Laiva na tamata o ya
Me vaka na veikoro sa vakarusa ko Jiova
Ka sega ni lomana.
Me rogoca na domo ni tagi
Ena rere ena mataka lailai,
Kei na domo ni davui ni valu ena yakavi,
17Baleta ni a sega ni vakamatei au
Ni'u a bera ni sucu mai;
Me kequ i bulubulu ga kina
Na kete i tinaqu
Ka na levu tu kina vakadua na ketena.
18A cava beka au a sucu kina?
Me'u mai kila ga na rarawa kei na leqa,
Ka tinia na noqu bula ena madua?
Who We AreWhat We EelieveWhat We Do
2025 by iamachristian.org,Inc All rights reserved.
