1Era a soqoni vata e Soko mai Juta na nodra mataivalu na kai Filisitia, me ia na i valu, ka ra la'ki vakaitikotiko ena kedrau veimama o Soko kei Aseka mai Efesi-tamimi.
2A soqoni vata o Saula kei ira na Isireli ka ra vakaitikotiko ena Buca o Ela, ka ra tuva i valu me ra vala kei ira na kai Filisitia.
3Ia o ira na kai Filisitia era a tiko ena yasa ni ulunivanua kadua, kei ira na Isireli ena ulunivanua kadua, ka koto na buca ena kedrau veimama.
4A cavutu mai na nodra i tikotiko na kai Filisitia e dua na tamata daubolebole, o Koliaci na yacana; a kai Kaca o koya, ka volekata yani na tolu na mita na kena balavu.
5A daramaka tu o koya na i sala parasa, ka vakaisulu ena i sulu ni valu; ia na kena bibi na i sulu oqori e 57 na kilokaramu.
6A vakaivava parasa o koya, ka tokara na i sasabai parasa ena usouso ni domona.
7Ia na dia ni nona moto sa vaka na nodra kau balavu na dautalitali; ia na mata ni nona moto kaukamea e rauta ni 7 na kilokaramu na kena bibi; ka sa dau liu vua e dua na tamata me colata tiko na nona i sasabai.
8A tucake o Koliaci ka kaci vakadomoilevu ki na nodra mataivalu na Isireli, ka kaya vei ira, “A cava o ni cakava tiko, ka tuvani vakaivalu tu oqori? Oi au na kai Filisitia ka o kemuni na tamata i Saula! Mo ni digitaka mada e dua na nomuni tamata me keirau vala.
9Kevaka sa qaqa o koya ka vakamatei au, keimami sa na nomuni tamata; ia kevaka sa noqu na qaqa ka'u qai vakamatei koya, mo ni sa qai neimami tamata ka qaravi keimami.”
10Sa qai kaya tale na kai Filisitia oqo, “Au sa bolei ira edaidai na nodra mataivalu na Isireli. Mo ni solia mada vei au e dua na tamata me keirau vala.”
11Ni sa rogoca o Saula kei ira na Isireli na vosa ni kai Filisitia oqo, a sa tuburi ira na yalolailai kei na rere.
O Tevita ena Loma ni Keba nei Saula12A sa dua na cauravou na yacana o Tevita, ka luvei Jese na kai Efiraca mai Peceliema e Juta. E ratou lewe walu na luve i Jese tagane, ka sa qase sara o koya ena gauna e tui tiko kina o Saula.
13Na i matai ni tolu ni luve i Jese tagane e ratou lewe ni mataivalu i Saula. E ulumatua o Iliavi, a kena i karua o Amenatave, ka kena i katolu o Sama.
14A sa gone duadua vei iratou o Tevita. Ia me vaka ni ratou lewe ni mataivalu i Saula o iratou na lewe tolu ka qase cake,
15sa dau veilakoyaki voli o Tevita mai vei Saula me la'ki vakatawani ira na qele ni sipi nei tamana.
16A sa 40 taucoko na siga na nona bolei ira tiko na Isireli na kai Filisitia o Koliaci, o ya ena veimataka kei na veiyakavi.
17Ena dua na siga, a sa kaya o Jese vei Tevita na luvena, “Mo kauta mada vakatotolo vei iratou na tuakamu ena nodratou keba e tini na kilokaramu na sila tavu kei na tini na i buli madrai.
18Mo kauta vata tiko e tini na uma jisi oqo vei koya na turaganivalu. Mo raici iratou na tuakamu se vakaevei tu na nodratou i tuvaki ni bula, ka qai kauta lesu mai e dua na i vakadinadina ni o sa raici ratou rawa ka ratou bulabula vinaka tiko.
19Era sa tiko oqori ena Buca o Ela o Saula na tui, kei iratou na tuakamu, kei ira kece na Isireli era sa vala tiko kei ira na kai Filisitia.”
20A sa sou vakamataka o Tevita, ka laiva na sipi vua e dua na i vakatawa me raici ira tiko, a sa kauta na kakana ka lako yani me vaka sa vakaroti koya kina o Jese na tamana. A yaco yani o koya ki na nodra i tikotiko ena gauna sara ga era a lako tiko kina na Isireli ki na buturara ni valu, ka ra kaila tiko ni vakacibi i valu.
21Era sa qai tuvani vakaivalu na Isireli kei ira na kai Filisitia, ka ra sa veiqaraqaravi tu me ia na i valu.
22A sa biuta na veika e kauta voli yani o Tevita vei koya na dauvakatawa i yaya, ka cici ki na buturara ni valu, ka tarogi iratou na tuakana se ratou bula vinaka tiko se segai.
23Ia ni ratou sa veivosaki tiko, raica sa lako cake mai o Koliaci ka bolei ira na Isireli me vaka ga e dau cakava e liu o koya. A sa rogoci koya sara o Tevita.
24Ia ni ra raici Koliaci o ira kecega na Isireli, era sa dro tani mai vua ena levu ni nodra rere.
25Era sa veitukunitaka vakataki ira na Isireli, “Raici koya mada! Rogoca na nona vosa ni bolebole! Sa yalataka tiko na tui o Saula e dua na i yau levu me soli vua na tamata ena vakamatei koya. Ena solia talega na tui ki vua na luvena yalewa me watina, ka na solia na galala ki na mataqali i tamana me kakua ni saumi vakacavacava e Isireli.”
26A sa tarogi ira na tamata ka ra tu volekati koya o Tevita, ka kaya, “A cava beka na ka ena soli vua na tamata ena vakamatea na kai Filisitia oqo, ka kauta tani na i rogorogo ca mai vei ira na Isireli? O cei sara mada na kai Filisitia tawa cili oqo me mai vosa veibeci ki na nona mataivalu na Kalou bula?”
27Era a qai tukuna vua na ka ena vakayacori vua e dua na tamata ena vakamatei Koliaci.
28A sa rogoca o Iliavi na tuakana na veika sa kaya o Tevita vei ira na tamata. A sa cudruvi Tevita ka kaya, “A cava o mai cakava eke? O cei sa vakatawani ira tiko na sipi mai veikau? A gone siosio o iko! O sa lako sobu ga mai mo mai sarava na i valu!”
29A qai vosa o Tevita, ka kaya vua, “Na cava beka au cakava? Sa sega ni rawa beka me'u taroga e dua na ka?”
30A sa vuki tani o koya ka vosa vua e dua tale na tamata, ka taroga na taro vata ga o ya, ka sa saumi vua mai na i sau ni taro vata ga.
31Era sa rogoca na vosa i Tevita eso na tamata ka ra sa la'ki tukuna vei Saula; a sa talatala vei Tevita o Saula me lako mada yani vua.
32A vosa vei Saula o Tevita, ka kaya, “Kemuni na tui, me kakua ni dua me rerevaka na kai Filisitia oqo! Au na lako oi au na nomuni tamata ka vala kaya.”
33A sa sauma lesu vei Tevita o Saula, ka kaya, “E sega. Mo na valuti koya rawa vakaevei? O iko o sa cauravou lailai ga, ia na tamata o ya sa dauvala tu mai ena nona bula taucoko!”
34A sa kaya vei Saula o Tevita, “Na nomuni tamata oqo sa dau vakatawana voli na sipi i tamaqu. Ni lako mai na laione se na bea me kauta tani e dua na luve ni sipi mai na qele ni sipi,
35au dau muria ka vakamatea, ka vakabula na luve ni sipi mai gusuna. Ia kevaka sa golevi au mai, au dau vesuka kaukauwa na domona, ka mokulaka me mate.
36Sa vakamatea oti na laione kei na bea na nomuni tamata, ka'u na vakamatea vakakina na kai Filisitia tawa cili oqo, ni sa beca na mataivalu i Jiova na Kalou bula.
37Sa ia na veivakabulai ko Jiova mai na laione kei na bea; ka na vakabulai au mai na ligana na kai Filisitia oqo.”
A sa kaya o Saula vei Tevita, “Mo lako ga, ka me salavata kei iko ko Jiova!”
38A daramaka vei Tevita o Saula na nona i sulu ni valu; a sa vakaisalataki koya ena i sala parasa, ka daramaka vua na kote kaukamea ni vala.
39A sa vauca o Tevita na i seleiwau nei Saula ki na nona i sulu ni valu; ia ni sa tovolea me lako, sa sega ni rawa baleta ni sega ni matau vua. A sa kaya vei Saula o Tevita, “Au sa sega ni lako rawa ena ka oqo, ni sega ni matau vei au na daramaka.” A sa luvata tani o Tevita.
40A taura o koya na nona i titoko, ka digitaka e lima na vatu yagoyago vinaka mai na uciwai, ka tawana ki na nona taga ni vakatawa sipi. A sa taura na nona i rabo ka lako yani vei Koliaci.
Vakamatei Koliaci o Tevita41A tekivu me toro volekati Tevita na kai Filisitia ka liutaki koya tiko yani na nona tamata daucola i sasabai. Ni toso voleka tiko mai,
42a sa raici Tevita vinaka o koya ka sa beci koya sara baleta ni dua na cauravou gone sara o koya, e damudamu, ka mata vinaka.
43A sa kaya vei Tevita na kai Filisitia, “Na i titoko beka ni cava oqori? Oi au beka na koli?” A sa rukaki Tevita ena vosa minimini ni nona kalou.
44A sa bolei Tevita ni sa kaya, “Lako mai, ka'u na qai solia na lewemu ki na manumanu vuka kei na manumanu ni vanua me ra kania.”
45A qai kaya vua na kai Filisitia o Tevita, “O sa lako mai mo valuti au ena i seleiwau, ena moto levu, kei na moto lailai; ia au sa lako mai vei iko ena yaca i Jiova ni lewevuqa, o koya na nodra Kalou na mataivalu ni Isireli, o ira o sa sega ni rokova.
46Ena siga oqo, ena soli iko kina ko Jiova ki ligaqu; ia au na vakamatei iko, ka tamusuka laivi na ulumu; au na solia talega na yagodra na tamata i valu ni Filisitia ena siga oqo vei ira na manumanu vuka, kei na manumanu kila ni vanua. Ena ka oqo, era na kila kece kina na kai vuravura ni tiko na nodra Kalou na Isireli,
47ka me ra kila na lewenivanua taucoko ni sa sega ni veivakabulai ko Jiova ena i seleiwau kei na moto; ni sa nei Jiova na i valu, ka na soli kemuni vakakina ki na liga i keimami.”
48A sa toro volekati Tevita yani o Koliaci me ravuti koya, ka sa vuki totolo o Tevita ka ciciva yani na buturara ni valu me rau sota.
49A tatara o Tevita ki na nona taga ka taura mai kina e dua na vatu, ka rabotaka yani vei Koliaci. A sa coba donu ena qaqa ni yadrena na kai Filisitia na vatu o ya, ka bale vakatoboicu ki na qele o Koliaci.
50A sa rawata na qaqa o Tevita vua na kai Filisitia ena i rabo kei na vatu ni sa vakamatea; a sa segai na i seleiwau e ligana.
Ia ni ra raica na kai Filisitia ni sa mate na nodra qaqa, era sa qai dro.
52Era sa qai lamata cake mai o ira na Isireli kei ira na Juta, ka ra kaila, ka cici muri ira na kai Filisitia me yaco sara ki Kaca kei na matamata ni koro mai Ekironi.
53Ia ni ra a lesu tale mai na Isireli ena nodra a cemuri ira na kai Filisitia, era a qai mai kauta na i tokinivalu mai na nodra i tikotiko.
54A sa tomika cake na ulu i Koliaci o Tevita ka kauta ki Jerusalemi; ia sa maroroya ga na i yaragi ni valu i Koliaci ena nona valelaca.
55Ia ni sa saravi Tevita o Saula ena nona la'ki vala kei Koliaci, a sa tarogi Epineri na i liuliu ni nona mataivalu, ka vaka, “I Epineri, na luve i cei mada na cauravou oqo?”
A sauma o Epineri ka kaya, “Au sa sega saka ni kila kemuni na Tui.”
56A sa qai vakaroti Epineri o Saula, ka kaya, “Ia mo la'ki taroga mada mai se na luve i cei na cauravou oqo.”
57Ia ni lesu mai o Tevita ena nona a vakamatea na kai Filisitia, a sa qai sotavi koya o Epineri ka kauti koya sara yani vei Saula. A sa taura voli ga o Tevita na ulu i Koliaci.
58A qai tarogi koya o Saula, ka kaya, “Cauravou, o cei na tamamu?”
A sa kaya vua o Tevita, “O au na luvena na nomuni tamata o Jese mai Peceliema.”
Who We AreWhat We EelieveWhat We Do
2025 by iamachristian.org,Inc All rights reserved.
