1 SAMUELA 28 - Ai Vola Tabu Ena Vakavakadewa Vou（FNV）

1Ena gauna o ya, era a qai vakasoqona vata na nodra mataivalu o ira na kai Filisitia, me ra vala vata kei ira na Isireli. A sa kaya vei Tevita o Akisa, “Mo kila vakavinaka ni o sa na lako vata kei au ki na i valu, o iko kei ira na nomu tamata.”

2A sa kaya vei Akisa o Tevita, “O ni sa na qai kila vakaidina na ka e rawa ni cakava na nomuni tamata.” A sa kaya vei Tevita o Akisa, “O koya oqo, au sa lesi iko kina mo dau yadravi au ena vo ni nomu bula.”

Vakataroga na Daurairai o Saula

3Ia oqo, a mate o Samuela, era a tagicaki koya o ira kecega na Isireli, ka buluti koya mai Rama ena nona koro.

A vakatalai ira tani na daucurumi kei ira na daurairai o Saula mai na vanua o Isireli.

4Era a soqoni vata o ira na kai Filisitia, ka ra la'ki vakaitikotiko e Sunemi; a soqoni ira vata kecega na Isireli o Saula, ka ra la'ki tiko mai Ului Qiliboa.

5Ia ni raica o Saula na nodra mataivalu na kai Filisitia, sa tuburi koya na rere kei na loma taqaya.

6E a vakasaqarai Jiova me taroga vua se na cava me vakayacora. Ia a sega vakadua ni sauma lesu ko Jiova e dua na ka, ena tadra, se na vakawiri madigi, se ena gusudra na parofita.Tiko 27.21

7Sa qai vakaroti ira na nona tamata o Saula ka kaya, “Ni vakasaqara mada mai e dua na yalewa sa daucurumi, me'u la'ki tarogi koya.”

Era a qai kaya vua na nona tamata, “Raica, sa tiko mai Edoa e dua na yalewa sa daucurumi.”

8A vakalecalecavi koya o Saula, sulumaka na i sulu tani, lako vata kei rau e lewe rua na tamata, ka ratou a qai lako yani vua na yalewa ena bogi. A sa kaya vua na yalewa o Saula, “Mo caka i sausau mada ena vukuqu ni o sa daucurumi, ka kauti koya mai vei au ka'u na cavuta vei iko.”

9A sa kaya vua na yalewa, “Raica, o sa kila na ka sa cakava na tui o Saula, ni a vakamatei ira laivi na daucurumi kei ira na daurairai ena vanua o Isireli; ia ena vuku ni cava o sa qai via corita kina na noqu bula, me'u vakamatei?”

10A bubului vua o Saula, ena yaca i Jiova, ka vaka, “Me vaka sa bula ko Jiova ena sega ni yacovi iko e dua na ka ca ena vuku ni ka oqo.”

11A qai kaya vua na yalewa, “O cei me'u kauta cake mai vei iko?”

A sa kaya vua o Saula, “Mo kauti Samuela cake mai vei au.”

12Ia ni raici Samuela na yalewa, a qoqolou ena domoilevu ka kaya vei Saula, “A cava o sa vakaisini au kina? O iko ga o Saula na tui?”

13A sa kaya vua na tui, “Mo kua ni rere. A cava o sa raica tiko?”

A sauma na yalewa ka kaya, “Au raica tiko oqo e dua na yalo e lako cake tiko mai na loma ni qele.”

14A sa kaya vua o Saula, “E vakacava na kena i rairai?”

A sa kaya vua na yalewa, “E dua na turaga ka sa qase sara e lako cake tiko mai. E tokara voli e dua na i tutuvi.”

A qai kila e kea o Saula ni sai Samuela dina ga o ya; a sa cuva ki na qele ena vakarokoroko.

15A sa kaya vei Saula o Samuela, “Na cava o vakayavalati au kina, ka vakavuna na noqu lako cake tale mai?”

A sa kaya vua o Saula, “Au sa leqa vakalevu ni ra sa mai vala kei au na kai Filisitia, ka sa lako tani mai vei au na Kalou. E a sega mada ga ni vosa vei au, sega ena gusudra na parofita se ena tadra; ia au sa kacivi iko kina mo vakatakila vei au na ka me'u cakava.”

16A sa kaya vua o Samuela, “Ia na cava o sa tarogi au kina, ni sa lako tani vei iko ko Jiova, sa vuki tani o koya me kemu meca.”

17Sa cakava vei iko ko Jiova me vaka na nona vosa ka'u a tukuna; ni sa kaliraka mai vei iko na matanitu ka solia vei Tevita, o koya na kai nomu.1Samu 15.28

18Ni o a sega ni vakarorogo ki na vosa i Jiova, ka sega ni vakarusai ira vakadua na Amalekaiti kei na ka kece era taukena; o koya oqo, sa cakava kina vei iko ko Jiova edaidai na ka oqo.1Samu 15.3-9

19Ia ena soli iko kei ira na Isireli ko Jiova ki na ligadra na kai Filisitia; ia o iko kei iratou na luvemu dou sa na tiko kei au ni mataka, ena solia talega ko Jiova na nodra mataivalu na Isireli ki na ligadra na kai Filisitia.”

20A bale vakasauri sara ka dodo ki na qele o Saula, a rere vakalevu ena vuku ni vosa i Samuela; a malumalumu sara o koya ni a sega tu ni kana ena siga taucoko o ya kei na kena bogi taucoko.

21A toro vei Saula na yalewa, ka raica ni a taqaya vakalevu o koya, a kaya vua, “Raica, sa vakarorogo na nomuni vada ki na nomuni vosa, au sa tauca ki ligaqu na noqu bula, ka'u sa talairawarawa ki na nomuni vosa;

22ia mo ni qai muria na vosa ni nomuni vada, ka me'u vakarautaka mada e dua na kemuni kakana; mo ni kana ka kaukauwa kina, ena nomuni i lakolako.

23A bese o koya ka kaya, “Au na sega ni kana.” Ia e ratou a cikevi koya, o rau na nona tamata kei koya na yalewa; ia e muri a qai muria na nodratou vosa. A duri cake mai na qele, ka dabe ena mocemoce.

24E a susuga voli na yalewa oqo ena nona i tikotiko e dua na bulumakau yalewa yago vinaka. A kusarawa na yalewa, vakamatea, taura na valawa, natuka, ka vavia na madrai sega ni vakatubu.

25A kauta vei Saula, vei ira talega na nona tamata; era a qai kana, cavutu, ka lako yani ena bogi tikoga o ya.