JEREMAIA 36 - Ai Vola Tabu Ena Vakavakadewa Vou（FNV）

Wiliki na i Vola Vivigi

1Ena i ka va ni yabaki e a tui kina o Jioiakimi na luve i Josaia e Juta, a tukuna kina vei Jeremaia, na Turaga ko Jiova,

2Taura mai e dua na i vola vivigi ka vola kina na veika kece sara au tukuna me baleti Isireli kei Juta ka vakakina na veimatanitu kecega. Vola na veika kece sara au a tukuna vei iko me tekivu mai na i matai ni gauna au a vosa kina vei iko ena gauna a tui tiko kina o Josaia me yacova mai na gauna oqo.

3De ra na rogoca na lewe i Juta na veivakarusai kece au nakita me'u vakayacora vei ira era na qai gole tani kece mai na nodra i tovo ca. Ia au na qai vosoti ira mai na nodra caka cala kei na nodra i valavala ca.”

4A mani kacivi Baruki yani na luve i Neria o Jeremaia, ka tukuna vua me vola ena i vola vivigi ni a cavuqaqataka tiko na vosa kece sara a tukuna vua ko Jiova.

5Ia a mai tukuna yani vei Baruki o Jeremaia na veivakaro oqo, “Au na sega ni vakatarai me'u lako ki na Valenisoro.

6Ia au vinakata mo lako ki kea ena gauna era na lolo tale kina na tamata ka wilika sara e cake na i vola vivigi me ra na rogoca kina na veika kece a tukuna vei au ko Jiova ka'u a cavuqaqataka vei iko mo vola. Mo la'ki cakava na ka oqo ena vanua e rawa me ra rogoci iko kece kina, ka vakakina o ira na lewe i Juta era lako mai ena nodra dui veikoro.

7De ra sa na qai masu vei Jiova ka gole tani mai na nodra i tovo ca, ni sa vunauci ira na tamata oqo ko Jiova ena nona cudru rerevaki kei na rarawa.”

8A mani wilika yani na vosa ni Turaga o Baruki ena Valenisoro me vaka na ka a tukuna vua o Jeremaia.

9Ena i kaciwa ni vula ni kalima ni yabaki a tui kina e Juta o Jioiakimi na luve i Josaia, era sa vakayacora tale na tamata e Jerusalemi kei ira era lako mai na veikoro e Juta e dua na lolo me yalo vinaka kina ko Jiova,

10Ia ni ra a vakarorogo kece sara tu ga na tamata, a sa qai wilika mai na i vola vivigi o Baruki na veika kece sara a tukuna o Jeremaia. A cakava na ka oqo ena Valenisoro ena rumu i Kemaria na luve i Sefana na vunivola. E tiko na nona rumu ena i tabavale e cake ena matamata vou ni valenisoro.

Vola Vivigi vei ira na Vakailesilesi

11A rogoca o Mikaia na luve i Kemaria ka makubui Sefana ni sa wilika o Baruki mai na i voli vivigi na ka a tukuna ko Jiova.

12A mai lako yani ki na valenitui, ena nona rumu na vunivola; era soqo kece tiko e kea na vakalesilesi. O Elisema na vunivola, o Telaia na luve i Semaia, o Elinacani na luve i Akape, o Kemaria na luve i Sefana, o Setekaia na luve i Anania kei ira na vo ni vakailesilesi.

13A tukuna vei ira o Mikaia na ka kece a rogoca ni wilika o Baruki vei ira na tamata.

14Ia era a qai talai Jeuti na vakailesilesi, o Jeuti na luve i Necanaia, na makubui Selemaia, na makubui Kusi vakarua me la'ki tukuna vei Baruki me kauta mai na i vola vivigi e a wilika vei ira na tamata. A mai kauta yani o Baruki na i vola vivigi ka lako vei ira.

15Era a qai kaya vua, “Mo tiko sobu ka wilika na i vola vivigi vei keimami.” A sa wilika o Baruki na i vola vivigi vei ira.

16Ia ni a wiliki oti, era a veiraiyaki ena rere ka kaya vei Baruki, “Tukuna na ka oqo vua na tui.”

17Era a qai tarogi koya, “Sa dodonu, tukuna mada vei keimami se o vola vakacava na veika kece oqo? A cavuqaqataka tiko o Jeremaia o a qai vola?

18A qai kaya o Baruki, “Sa cavuqaqataka toka mai o Jeremaia na veika kece sara, au a qai vola ki na i vola vivigi ena wai ni volavola.

19Era a qai kaya vua. Sa dodonu mo drau lako kei Jeremaia ka vunitaki kemudrau. Drau kakua sara ni tukuna vua e dua, na vanua o drau tiko kina.

Vakamai na i Vola Vivigi

20Era a biuta tu na i vola vivigi ena rumu i Elisama na vunivola ka lako ki na nona lomanibai na tui ka tukuna vua na tui na ka kecega.

21E a qai talai Jeuti na tui ka la'ki kauta mai na i vola vivigi. A la'ki kauta mai o koya ena rumu i Elisama ka mai wiliki vua na tui ka ra tu wavokiti koya kece tu na vakailesilesi.

22Oqo a donuya tiko na gauna ni batabata, ka dabe tiko na tui ena nona i tikotiko ena vula i batabata, o ya na i kaciwa ni vula; ka tu e matana e dua na miqa ka waqa tu kina na buka.

23Ni wilika oti ga e tolu se va na kena i wasewase o Jeuti, a musuka tani na tui ena dua na i sele lailai ka kolotaka sara ki na buka. A cakava tiko na ka oqo me yacova ni a kama taucoko sara na i vola vivigi.

24Ia a sega ni bau rere se vakaraitaka e dua na i vakatakilakila ni veivutuni na tui kei ira kece na nona vakailesilesi era sa rogoca na veivosa kece sara oqo.

25E dina ga e ratou a vakamasuta na tui o Elinacani, Delai vata kei Kemaria me kakua ni vakama na i vola vivigi, a sega sara ni via rogoci iratou.

26A qai vakaroti Jiramieli na luvenitui, kei Seraia na luve i Asirieli vata kei Sememia na luve i Apitieli me ratou vesuki Jeremaia na parofita kei Baruki na nona vunivola. Ia a vunitaki rau ko Jiova.

Dua Tale na i Vola Vivigi

27Ni a vakama oti na tui na i vola vivigi a vola o Baruki ni a cavuqaqataka vua na kena vosa o Jeremaia, a tukuna na Turaga ko Jiova vei Jeremaia,

28me taura e dua tale na i vola vivigi ka vola kina na veika kece sara e a volai tu ena i vola vivigi a vakama oti na tui.

29A tukuna vua ko Jiova me tukuna vei Jioiakimi na tui, “O sa vakama na i vola vivigi, baleta ni sa volai kina ni na lako mai na tui Papiloni ka vakarusa na vanua oqo, ka vakamatei ira na kena i taukei kei na kena manumanu.

30Ia, oqo a kaya ko Jiova me baleti Jioiakimi. A sega tale ni dua na nona kawa me na tiko ena i tikotiko vakatui i Tevita. Na yagona ena kolotaki tu me cilava na matanisiga ena siga ka na lutuma na tegu cevata ena bogi.

31Au a totogitaki koya vata kei ira na nona kawa ena vuku ni nodra i valavala ca. Au na kauta mai vei ira, kei ira na lewe i Juta na veika ca kece au sa tukuna vei ira, ia era a sega ni via rogoca.

32Ia a qai taura o Jeremaia e dua tale na i vola vivigi ka solia vei Baruki na nona vunivola, a vola o koya na veika kece sara a kacivaka tiko vua o Jeremaia. A vola kina o koya na veika taucoko sara e a volai tu ena i vola vivigi a vakama na tui o Jioiakimi ena buka. A vakuria talega o Jeremaia e vuqa sara na ka era via tautauvata.