VUNAU NI SORO 2 - Ai Vola Tabu Ena Vakavakadewa Vou（FNV）

1Ni sa kauta mai e dua na tamata na nona i madrali laukana me vakacabora vei Jiova, me vakarautaki na nona i madrali mai na valawa digitaki. Me qai livia kina o koya na waiwai, ka biuta kina na drega me vakamai na ferekiniseni,

2ka kauta vei ira na bete ena kawa i Eroni. O koya na bete me qai yakuta mai e ligana na valawa digitaki kei na waiwai kei na kena drega dauvakamai kecega, ka me vakama oqo ena dela ni cabocabonisoro me i vakaraitaki ni sa cabori na veika kece oqo vei Jiova. Sa ka boi vinaka vei Jiova na ka sa cabori oqo.

3Na vo ni i madrali laukana sa kena vakatabakidua o Eroni kei ira na luvena; oqo e rui ka tabu sara baleta ni tauri mai ena kakana sa cabori vei Jiova.

4Kevaka o vakacabora me nomu i soro na madrai sa vavi ena ovani, e dodonu me vakayagataki na valawa digitaki ka sega ni vakatubu. Ena rawa ni ra i buli madrai vavaku sa natuki vata kei na waiwai, se keke mamare sa boro ena waiwai.

5Kevaka e vakacabori me i soro na madrai sa tavu ena i tavuteke kaukamea, e dodonu me buli mai na valawa digitaki sa sega ni vakatubutaki, sa veiwaki vata kei na waiwai;

6mo vurulaka ka livia kina na waiwai; oqo na i madrali laukana.

7Kevaka o vakacabora me i soro na madrai sa vakarautaki mai na i tavuteke, e dodonu me caka ena valawa digitaki kei na waiwai.

8Mo kauta mai na i madrali oqo me cabori vei Jiova ka solia vua na bete, ena qai kauta cake na bete ki na i cabocabonisoro.

9Ena qai taura e dua na tikina na bete ka vakama ena i cabocabonisoro me vakatakila ni sa caka vei Jiova na ka oqo. E taleitaka ko Jiova na boi vinaka ni madrali e vakamai.

10Na vo ni madrali laukana me kania o ira na bete; oqo sa kakana tabu sara baleta ni sa madrali vakacabori vei Jiova.

11Me kakua sara ni dua na i madrali laukana e vakacabora vei Jiova me na vakatubutaki; me kakua sara ni vakayagataki na i vakatubu se deni oni ena i madrali e cabori vei Jiova.

12Na i madrali ni sevu ena veiyabaki me kau mai vei Jiova, ia me kakua ga ni vakamai ena i cabocabonisoro.

13Mo ni vakamasimataka na i madrali laukana kecega, baleta na masima e vakatakila na nomuni veiyalayalati kei na Kalou. (Me cabori vata kei na masima na nomuni i madrali kecega.)

14Kevaka o ni sa vakacabora eso na i sevu me i madrali vei Jiova, mo ni cabora na sila vou sa vakararagi ena bukawaqa ka vutu mai na sola ni sila sa vakalewena.

15Mo ni livia kina na waiwai, ka biuta e delana na drega me vakamai na ferekiniseni; oqo na i madrali laukana.

16O koya na bete me vakama me kena i vakananumi eso na kena sila qaqi, e dua na kena waiwai, kei na kena drega dauvakamai kecega: oqo na ka sa cabori ena bukawaqa vei Jiova.