VUNAU NI SORO 4 - Ai Vola Tabu Ena Vakavakadewa Vou（FNV）

Na i Soro ni Valavala Ca

1A sa kaya tale vei Mosese ko Jiova

2me tukuna vei ira na Isireli ni kevaka e dua na tamata sa kitaka vakacalaka se sega ni nakita na nona cakava cala e dua na ka sa vakarota ko Jiova, ia me muria na i vakaro oqo:

3Kevaka sa vakacalaka na Bete Levu, ka vakacalai ira kina na tamata, me qai vakacabora vei Jiova e dua na luve ni bulumakau tagane sa sega na tikina e ca me i soro ni nona i valavala ca.

4Me kauta mai na bulumakau tagane o koya ki na katuba ni Vale ni Veitavaki, ka tabaka na ulu ni bulumakau ena ligana, ka vakamatea na bulumakau ena mata i Jiova.

5Me qai taura eso na dra ni bulumakau tagane oqo na Bete Levu, ka kauta ki na Vale ni Veitavaki;

6me qai tonisua na nona i qaqalo ena dra, ka kureitaka vakavitu na dra ena mata ni lati ni vale tabu.

7Me boroya na bete e dua na i wase ni dra ena ucuna momoto ena tutu ni i cabocabonisoro ni ka boi vinaka me vakamai. Me qai sova yani na vo ni dra ki na yavu ni cabocabonisoro kama, mai na katuba ni Vale ni Veitavaki.

8Me kauta laivi na uro kecega ni bulumakau ka i soro ni valavala ca: na uro sa ubia na gacagaca, kei na uro kecega sa tu e loma ni gacagaca,

9kei na ivi ruarua kei na tikina taleitaki ni yatena.

10Me qai kauta na bete na kena uro kece oqo ka vakama ena dela ni cabocabonisoro ni madrali vakamai, me vaka na kena e dau qarava ena vakamai ni i soro ni veivinakati.

11Ia me qai kauta na kuli ni bulumakau, na lewena kece, na uluna, na yavana, na gacagaca, na wawa ni ketena,

12ka qai colata yani na bulumakau taucoko ki na taudaku ni i tikotiko ki na tikina sa vakasavasavataki ka dau sova kina na dravusa, ka vakama ena buka.

13Kevaka era vakayacora e dua na cala vakacalaka na lewenivanua taucoko e Isireli, ka ra vakadinadinataka na nodra cala ni ra sa voroka na i vakaro i Jiova ni ra a sega ni nakita,

14me ra qai cabora e dua na luve ni bulumakau tagane o ira na lewenivanua me i soro ni valavala ca ena gauna sa kilai kina na nodra cala; ka kauta ki na Vale ni Veitavaki.

15O ira na nodra qase ni lewenivanua me ra qai tabaka na ulu ni bulumakau ena ligadra ena mata i Jiova, ka vakamatea na bulumakau e kea.

16O koya na Bete Levu me qai kauta eso na dra ni bulumakau ki na Vale ni Veitavaki,

17ka me tonisua na nona i qaqalo ena dra, ka kureitaka vakavitu ena mata i Jiova ena mata ni i lati.

18Me boroya talega eso na dra ena ucuna momoto ena tutu ni i cabocabonisoro e loma ni Vale ni Veitavaki ka me qai sova na vo ni dra ki na yavu ni cabocabonisoro kama ena katuba ni Vale ni Veitavaki.

19Ia me kauta laivi mai kina na kena uro kecega, ka vakama ena dela ni cabocabonisoro.

20Me vakayacora ki na bulumakau oqo na i valavala vata ga ni kena vakarautaki na bulumakau e dau cabori me i soro ni valavala ca; ena sala oqo ena sorovaka kina na nodra i valavala ca na tamata, ka ra na vosoti kina.

21Me qai colata yani na bulumakau ki na taudaku ni i tikotiko ka vakama kina me vaka ga na nona vakama na i matai ni bulumakau me baleta na nona i valavala ca; ia oqo na nodra i soro ni valavala ca na lewenivanua taucoko.

22Kevaka sa caka cala e dua na i liuliu ka sega ni nakita, ka sa vakadinadinataka na nona voroka vakacalaka e dua na i vakaro i Jiova,

23me qai kauta mai e dua na me tagane sa sega ni ca e dua na tikina me nona i soro ena gauna ga sa vakatakilai kina vua na nona cala.

24Ia me tabaka na ulu ni me e ligana, ka vakamatea ena tikina sa dau vakamatei kina na i soro kama ena mata i Jiova; oqo na i soro ni valavala ca.

25Ia me kauta na bete eso na dra ni i soro ni valavala ca ena nona i qaqalo ka boroya na ucuna momoto ena tutu ni i cabocabonisoro, ka sova na vo ni dra ki na yavu ni cabocabonisoro kama.

26Me qai vakama na kena uro kecega ena dela ni cabocabonisoro me vaka sa cabori na uro ni soro ni veivinakati. Sa sorovaka kina na bete na nona bula na i liuliu, ka na vosoti kina.

27Kevaka sa caka cala ka sega ni nakita e dua na lewenivanua, ka vakadinadinataka na nona voroka vakacalaka e dua na i vakaro i Jiova,Tiko 15.27-28

28me kauta mai o koya e dua na me yalewa sa sega ni ca e dua na tikina me nona i soro ena gauna ga sa vakatakilai kina vua na nona cala.

29Me tabaka o koya na ulu ni i soro ni valavala ca ena ligana, ka vakamatea ena tikina sa dau cabori kina na i soro kama.

30Na bete me kauta eso na dra ena nona i qaqalo ka boroya ena ucuna momoto ena tutu ni i cabocabonisoro sara e cake, ka sova na vo ni dra ki na yavu ni cabocabonisoro.

31Oti o ya, me qai kauta laivi na kena uro kecega, me vaka a kau laivi na uro mai na i soro ni veivinakati; ia me vakama na bete ena dela ni cabocabonisoro me ka boi vinaka vei Jiova; ia ena sorovaki koya na bete, ena qai sega ni cudruvi kina o koya.

32Kevaka sa kauta mai e dua na tamata e dua na sipi me nona i soro ni valavala ca, ia me yalewa ka sega ni ca e dua na tikina.

33Me qai tabaka o koya na ulu ni lami na i soro ni valavala ca ena ligana, ka vakamatea ena tikina sa dau vakamatei kina na i soro kama, me i soro ni valavala ca.

34O koya na bete me qai kauta eso na dra ni soro ni valavala ca ena nona i qaqalo ka boroya ena ucuna momoto ena tutu ni i cabocabonisoro, ka sova na vo ni dra ki na yavu ni cabocabonisoro.

35Me qai kauta laivi na kena uro kecega, me vaka sa dau kau tani na uro mai na sipi ka i madrali ni i soro ni veivinakati, ka vakama ena i cabocabonisoro vata kei na madrali laukana vei Jiova. Ena ka oqo sa sorovaka kina na bete na i valavala ca sa cakava na tamata oqo, ka sa vosoti kina.