1 Jope 41.1; Same 74.14; 104.26 Ena siga o ya ena vakayagataka ko Jiova na nona i seleiwau levu, kaukauwa ka gata me totogitaki Livaiacani na gata totolo sa cibini tu ka vakamatea na drakoni sa tiko voli ena boto ni wasawasa.
2Ena siga o ya, ena tukuna na Turaga na nona loganivaini vinaka.
3Oi au ko Jiova au sa kena i vakatawa,
Ka'u sa vakasuasuataka ena veigauna kece.
Au sa yadrava ena siga kei na bogi,
Me kakua kina ni dua me vakacacana.
4Au sa sega tale ni qai cudruva na loganivaini,
Ka'u diva me tu tale na soni kei na wa vakavotona,
Me vala kei au,
Me'u vakama yavu kece sara ena buka.
5Ia kevaka era vinakata na noqu veitaqomaki
O ira na kedra meca na noqu tamata,
Ia me ra veisaututaki ga kei au,
Io, me ra veisaututaki ga kei au.
6Ena siga o ya era sa na vakawakana,
Na kawa i Jekope me vaka na kau.
Era na kubu mai ka se sara,
Ka na sinai na vuravura taucoko ena vuadra.
7Sa bau mokuti ira li na Isireli na Kalou
Me vakataki ira na nodra meca se
Sa ra yali e vuqa sara na kena tamata.
8Sa totogitaki ira na nona tamata na Turaga,
ena nona vakatalai ira yani me ra kau vakabobula.
Sa kauti ira tani yani o koya
ena dua na cagi kaukauwa mai na tokalau.
9Ena sega sara ni bokoci na i valavala ca nei Isireli,
me yacova ni ra sa vurumemea me vaka na lase
na veivatu ni veicabocabo ni soro kei na veikalou lasu;
Ka sega tale ni duri tu e dua na matakau,
se i cabocabonisoro ni veika boi vinaka.
10Sa rusa tu na koro vakabai,
ka sa biu tu me vaka e dua na vanua lala.
Sa yaco me dua na veico me kedra na bulumakau
me ra dau kana ka vakacegu kina.
11Sa madu na kena veitaba ni kau ka ramusu,
Ka ra sa mai tomika na marama me buka.
Ni sai ira oqo na tamata era sa sega ni yalomatua,
Ka sa sega ni lomani ira kina,
Se vinakati ira o koya sa buli ira.
12Ena siga o ya e sa na veilewaitaki ira kina na nona tamata na Isireli ko Jiova me tekivu mai na i yalayala ni matanitu mai na dua na yasana me yaco yani ki na yasana ka dua. Me tekivu mai na Uferetisi me yaco ki na i yalayala kei Ijipita.
13Ena siga o ya ena uvu e dua na davui me kacivi ira lesu mai na Isireli era vakabobulataki tu mai Asiria kei Ijipita. Era na lesu mai ka mai qarava na Kalou ena nona ulunivanua tabu mai Jerusalemi.
Who We AreWhat We EelieveWhat We Do
2025 by iamachristian.org,Inc All rights reserved.
