1A sa liutaka eso na kai Arapea e dua na vakacibi i valu ka vakamatei kina o ira kece na luve i Jiorami tagane era qase cake, ka vo duadua o Easaia, o koya e gone sara. Era a buli Easaia me tui o ira na lewenivanua e Jerusalemi, me sosomitaki tamana.
2A sa yabaki 22 o Easaia ena gauna e buli kina me tui, ka veiliutaki mai Jerusalemi me yabaki dua. Na yaca i tinana o Acalaia na makubui Omirai.
3E a muria talega o Easaia na i valavala ni vuvale i Eapi; ni a dau vakasalataki koya o tinana me cakava na ka ca.
4A sa dau kitaka na i tovo vakasisila ena mata i Jiova, me vakataki ira na lewe ni vuvale i Eapi; ka ni ra a qai nona daunivakasala o ira na vuvale oqo i Eapi ena gauna e mate kina o tamana, ka la'ki vakavuna na torosobu ni nona bula.
5Ena nona muria na nodra i vakasala, sa la'ki veitokoni kina vei Jiorami na luve i Eapi na tui Isireli me rau valuti Eseeli na tui Siria mai Remocikiliati. Era a vakamavoataki Jorami kina ena valu o ya na kai Siria.
6A sa lesu tale o Jorami ki na koro levu o Jesireli me la'ki vakabulabula kina, ka a la'ki sikovi koya e kea o Easaia.
7Ia sa vakatulewataka na Kalou me na yaco na rusa vei Easaia ena gauna e la'ki veisiko kina vei Jorami. Ni yaco yani o Easaia vei Jiorami, sa qai vakasaurarataki rau e dua na tamata ka yacana o Jeu na luve i Nimesai, o koya ka sa lumuta oti ko Jiova me vakawabokotaka na vuvale i Eapi.
8Ena kena vakayacori na lewa ni Kalou ki na i tikotiko vakatui, a sota sara o Jeu kei iratou na i vakalesilesi mai Juta vata kei iratou na luvedratou na taci Easaia ka ra a veitomani voli mai kei Easaia ena veisiko, ka vakamatei ira.
9A sa vakasaqarai Easaia o Jeu, ka la'ki vesuki koya mai ni a vuni tiko mai Samaraia, ka vakamatei koya. Ia era a la'ki buluta na yagona baleta ni ra doka vakalevu na tukana o Josefati na tui, ena vuku ni nona a qaravi Jiova ena yalona taucoko.
Ia sa sega tale ni qai vo e dua vei ira na lewe ni vuvale i Easaia me rawa ni veiliutaki vakatui.
O Acalaia na Ranadi e Juta(2Tui 11.1-3)10Ia oqo ni a raica o Acalaia na tina i Easaia, ni a mate na luvena, a cavutu ka vakamatei ira kecega na kawa vakatui ena mataqali i Juta.
11A kauti Joasa na luve i Easaia o Jiosapeci na luvena yalewa na tui, ni a butakoci koya lo mai vei ira na luvenitui, ka ra vakarau tiko me ra la'ki vakamatei, ka kauti rau kei na nona i meimei ki na dua na rumu ni yaya ni moce. A vunitaki koya vaka oqori o Jiosapeci na luve i Jiorami na tui, na wati Jioiata na bete, me baleta ni ganei Easaia o koya, ka vunitaki koya matua mai vei Acalaia, me kakua ni vakamatei koya;
12a tiko vei ira ka yabaki ono, ena vale i Jiova, ni liutaka tiko na vanua o Acalaia.
Who We AreWhat We EelieveWhat We Do
2025 by iamachristian.org,Inc All rights reserved.
