SAME 105 - Ai Vola Tabu Ena Vakavakadewa Vou（FNV）

Na Kalou kei Ira na Nona Tamata(1Vei 16.8-22)

1Ni vakavinavinaka vei Jiova,

Ka masuta na yacana;

Ni vakatakila vei ira na veimatanitu na veika sa cakava.

2Ni sere vua, ni sere ni vakacaucautaki koya:

Ni tukuna tikoga na veika veivakurabuitaki sa cakava!

3Me vakalagilagia na yacana tabu;

Me ra marau o ira kecega era qaravi Jiova.

4Ni kerea na veivuke vei Jiova,

Ka tiko voli ga e matana.

5Ni nanuma na cakacaka veivakurabuitaki sa cakava o koya,

Na nona cakacaka mana, kei na nona lewa a vakatauca.

6Oi kemuni na kawa i Epara-ama na nona dauveiqaravi,

Oi kemuni na kawa i Jekope na nona tamata digitaki.

7Sa i Jiova ga na noda Kalou

Sa baleta na vuravura taucoko na nona lewa.

8Ena maroroya o koya na nona veiyalayalati ka sega ni mudu,

Kei na nona vosa ni yalayala me yacova e udolu na veitabatamata;

9Na veiyalayalati sa cakava o koya vata kei Epara-ama,

Kei na nona vosa ni yalayala vei Aisake.

10A sa cakava ko Jiova na veiyalayalati tawa mudu kei Isireli,

Io, na veiyalayalati sa sega ga ni mudu.

15Sa kaya o koya, “Ni kakua ni tarai ira na noqu tamata digitaki,

Kakua ni vakamavoataki ira na noqu parofita!”

16A sa vakavuna ko Jiova na dausiga ki na nodra vanua,

Ka sa kauta tani kece na kedra kakana,

17Sa talai Josefa yani me liu vei ira,

Ka a volitaki me vaka e dua na bobula.

18E a mavoa na yavana ena sinucodo,

Ka sa vakacolati e dua na i vua kaukamea e domona,

19Me yacova ni sa yaco na ka sa yalataka.

Na vosa i Jiova sa vakadinadinataki koya ni dodonu.

20Ia, sa qai sereki koya na tui Ijipita;

Sa sereki koya na i liuliu ni veimatanitu.

21Sa lesi koya me liutaka na nona matanitu,

Ka digitaki koya me lewa na nona vanua taucoko.

22Sa lewai ira kece sara ga na vakailesilesi ni tui,

Kei na kaukauwa me vakavulici ira na nona daunivakasala.

23Ia, sa qai lako o Jekope ki Ijipita,

Ka la'ki vakaitikotiko ena vanua o ya.

24Sa qai solia ko Jiova me levu na luvedra na nona tamata,

Ka cakava me ra kaukauwa cake mai vei ira na kedra meca.

25A sa vakavuna o koya me ra cati ira na nona tamata na kai Ijipita,

Ka ra cakacaka vakaveivakaisini vei ira na nona tamata.

26A sa qai tala yani o koya na nona tamata o Mosese,

Kei Eroni, o koya ka sa digitaka.

27E rau a cakava na nona cakacaka veivakurabuitaki,

Ka cakava na cakacaka mana e Ijipita.

28Na Kalou sa tala na butobuto me buto kina na vanua,

Ia, o ira na Ijipita era sa beca ga na nona i vakaro.

29Sa vukica o koya na nodra veiuciwai me dra

Ka vakamatea kece na kedra ika.

30Sa sinai sara na nodra vanua ena boto,

Ka bau la'ki vakasinaita na valenitui.

31Ni sa vosa na Kalou, na lago kei na kutu

Sa robota na nodra vanua taucoko.

32Sa vakatauca na uca cevata me i sosomi ni uca,

Ka tibika na nodra vanua ena livaliva.

33Sa vakarusa na nodra veivaini kei na veilolo

Ka musulaka sobu na kau ni nodra vanua.

34A sa vosa, ka ra lako mai na vodre,

Era sa sega ni wiliki rawa;

35Era sa kania na kakana draudrau kecega ni vanua;

Ka vakayagataka na veivuata mai na nodra i teitei.

36A sa vakamatei ira na ulumatua tagane

Ni veivuvale kece mai Ijipita.

37Ia sa qai kauti ira yani na Isireli;

Era sa kauta yani na siliva kei na koula,

Ka ra sa kaukauwa ka bulabula kece.

38O ira na Ijipita era sa rerevaki ira,

Ka sa tuburi ira na marau ni ra sa lako yani.

39Sa vakarautaka na Kalou na o me veivakarurugi

Kei na bukawaqa ena bogi me solia na rarama.

40Era sa kerekere, ka sa solia vei ira na kueli;

Ka sa solia vakaiyauyau vei ira na kakana mai lomalagi.

41A sa vida e dua na vatu levu, ka sa coka mai kina na wai,

Ka drodro yani ena vanua dravuisiga me vaka na uciwai.

42Sa nanuma o koya na nona veiyalayalati tabu

Kei Epara-ama na nona tamata.

43A sa qai liutaki ira yani na nona tamata ena marau,

O ira na nona digitaki ena lagalaga sere.

44A sa solia vei ira na nodra vanua na veimatanitu,

Ka ra sa taukena na nodra vua ni cakacaka na tamata;

45Me ra muria kina na nona tamata na nona lawa

Ka vakayacora na nona i vakaro.

Dou ia vei Jiova na vakavinavinaka!