VUNAU NI SORO 9 - Ai Vola Tabu Ena Vakavakadewa Vou（FNV）

Sa Vakacabo i Soro o Eroni

1Ena i kawalu ni siga, sa kacivi Eroni kei iratou na luvena kei ira na nodra qase na Isireli o Mosese.

2Sa qai tukuna vei Eroni, “Mo kauta e dua na luve ni bulumakau tagane me i soro ni valavala ca, ka dua na sipi tagane me i soro kama, ia na bulumakau kei na sipi tagane sa sega ni dua na ka e ca kina, ka vakacabori rau ena mata i Jiova.

3Mo tukuna vei ira na Isireli me ra kauta e dua na me tagane me i soro ni valavala ca, kei na dua na luve ni bulumakau kei na lami erau yabaki yadua ka sega ni dua na tikina e ca me i soro kama,

4kei na dua na bulumakau kei na dua na sipi tagane me i soro ni veivinakati. Oqo me cabori vata kei na i madrali laukana sa veiwaki vata kei na waiwai ena mata i Jiova. E dodonu me ra cakava oqo baleta ni na rairai vei ira ko Jiova ena siga edai.”

5Era sa qai kauta mai na ka a vakarota o Mosese ki na mata ni Vale ni Veitavaki, ka ra toro voleka mai na lewenivanua taucoko ka mai tu ena mata i Jiova.

6Sa kaya tale o Mosese, “Oqo na ka e vakarota ko Jiova mo ni cakava me rawa ni na rairai mai kina vei kemuni na i serau i Jiova.”

7Sa qai kaya vei Eroni o Mosese, “Mo toro voleka ki na i cabocabonisoro ka vakacabora na i soro ni valavala ca kei na i soro kama me rawa ni o sorovaki iko kina kei ira na tamata. Mo vakacabora na veika oqo me ia kina na veisorovaki me vaka sa vakarota ko Jiova.”

8A sa toro voleka ki na i cabocabonisoro o Eroni, ka vakamatea na luve ni bulumakau me i soro ni nona i valavala ca.

9Ni ratou kauta yani na kena dra ki vua o iratou na luvena, sa tonisua na nona i qaqalo ena dra o Eroni ka boroya ena ucuna momoto ena tutu ni i cabocabonisoro, ka sova yani na vo ni dra ki na yavu ni cabocabonisoro.

10Sa qai vakama ena dela ni cabocabonisoro na kena uro, na ivi ruarua, kei na tikina digitaki ni yatena me vaka e vakarota vei Mosese ko Jiova.

11Ia sa vakama na lewena kei na kulina ena taudaku ni i tikotiko.

12A sa vakamatea o Eroni na i soro kama, ka ratou a solia vua na dra o iratou na luvena, ka kureitaka na dra ena tutu vava ni cabocabonisoro.

13E ratou a solia talega vua na i soro kama, na tikina yadua, kei na uluna; ka sa vakama o koya ena dela ni cabocabonisoro.

14A sa savata o koya na gacagaca kei na yavana, ka vakama vata kei na i soro kama ena i cabocabonisoro.

15Sa qai kauta o Eroni na nodra i madrali na tamata, ka taura na me, o ya na nodra i soro ni valavala ca na tamata, ka vakamatea, ka vakacabora me i soro kama ka cabora me vaka na kena i valavala.

16Sa qai kauta na i soro kama ka cabora me vaka na kena i valavala.

17A sa kauta na i madrali laukana, ka vakasinaita mai kina na ligana, ka vakama ena dela ni cabocabonisoro, me i kuri ni soro kama vakamataka.

18A sa vakamatea na bulumakau kei na sipi tagane me i madrali ni veivinakati ena vukudra na tamata. E ratou kauta yani vua na kena dra o iratou na luvena ka sa kureitaka o Eroni ena tutu vava ni cabocabonisoro.Vsoro 3.1-11

19Ia na uro ni bulumakau kei na sipi tagane - na uro ni buina kei na kena gacagaca, na ivi ruarua vata kei na kena uro, kei na tikina taleitaki ni yatena

20sa biuta o Eroni ena dela ni seredrau na manumanu ka kauta kece yani ki na i cabocabonisoro;

21ia na seredrau kei na sagadrau i matau na manumanu sa laveta cake o Eroni me i soro yalovaki ena mata i Jiova; me vaka sa vakarota o Mosese.

22Sa dodoka yani na ligana o Eroni vei ira na tamata ka vosavakalougatataki ira; a qai siro sobu mai ni sa cabora oti na i soro ni valavala ca, na i soro kama, kei na soro ni veivinakati.Tiko 6.22-26

23E rau sa curu yani ki loma ni Vale ni Veitavaki o Mosese kei Eroni; ia ni rau sa curu lesu tale mai ki tuba, e rau sa vosa vakalougatataki ira na tamata ka sa rairai vei ira kecega na i serau i Jiova.

24Sa qai lako vakasauri mai na bukawaqa i Jiova ka vakama na i soro kama kei na uro ena dela ni cabocabonisoro. Ni ra sa sarava na veika oqo o ira na tamata, era sa qolou ka cuva sobu ki na qele.