1Ni vakavinavinaka vei Jiova, ni sa yalovinaka o koya;
Ka sa sega ni mudu na nona loloma!
2Me ra kaya o ira na Isireli,
“Sa sega ni mudu na nona loloma.”
3Me ra kaya na nona bete na Kalou,
“Sa sega ni mudu na nona loloma.”
4Me ra kaya kecega era sa rerevaki Jiova,
“Sa sega ni mudu na nona loloma.”
5Au a masu vei Jiova ena noqu rarawa,
Ka sa sauma mai o koya, ka mai sereki au.
6Sa tiko kei au ko Jiova ka'u na sega sara ni rere;
Na cava era rawa ni cakava vei au na tamata?
7Sa tiko kei au ko Jiova me vukei au,
Ka'u na raici ira na kequ meca ni ra vakadrukai.
8Sa vinaka cake na vakararavi vei Jiova
Mai na noda vakararavi ki na tamata.
9Sa uasivi cake na vakadinati Jiova,
Mai na vakararavi vei ira na luvenitui.
10Era sa wavoliti au na kequ meca,
Ia, au sa vakarusai ira ga ena kaukauwa i Jiova.
11Era sa vakavolivoliti au ena veiyasana kece sara,
Ia, au a qai vakarusai ira ena kaukauwa i Jiova.
12Era sa vakavolivoliti au mai me vaka na qele ni vi,
Ia, era sa kama totolo ga me vaka na buka ena wa vakavotona,
Ka'u sa vakarusai ira ena kaukauwa ga i Jiova.
13Au sa biliraki vakaukauwa sara ka voleka ni vakadrukai,
Ia, sa qai vukei au ga ko Jiova.
14Sa vakaukauwataki au ko Jiova me'u kaukauwa ka qaqa;
Sa noqu i vakabula o koya.
15Ni rogoca mada na kaila ni reki ena qaqa
Ena nodra veivale kece na tamata ni Kalou.
16Sa vakavuna me da qaqa na nona kaukauwa,
Sa vuna na noda qaqa na kaukauwa levu i Jiova.
17Au na sega ni mate, ia au na bula tiko,
Me'u tukuna na veika sa cakava ko Jiova.
18Sa vakatotogitaki au vakabibi sara o koya,
Ia, sa sega ga ni laivi au me'u mate.
19Ni dolava vei au na matamata ni vale tabu
Me'u curu kina ka vakacaucautaki Jiova.
20Sa i koya oqo na matamata i Jiova,
Era rawa ga ni curu kina na tamata yalododonu.
21Au sa vakacaucautaki kemuni na Turaga, baleta ni o ni sa rogoci au mai,
Ka solia vei au na qaqa.
22Na vatu era sa cata na matai ni vale
Sa yaco me vatu ni vakadei ena tutu ni vale.
23Sa cakava na ka oqo ko Jiova,
Ka sa totoka dina ni da raica.
24Sa i koya oqo na siga a bulia ko Jiova,
Me da ia na reki ka marau kina.
25Kemuni Jiova, keimami kerei kemuni mo ni vakabulai keimami.
Ni solia vei keimami na tiko vinaka.
26Me qai vakalougatataki o koya sa lako mai ena yaca i Jiova.
Keimami sa vakavinavinakataki kemuni mai na Valenisoro i Jiova.
27Sa Kalou ga ko Jiova, ka sa vakararamataki keda.
Ni taura na tabanikau e ligamuni, ka tekivuna na solevu,
Ka yabeta wavoki na i cabocabonisoro.
28Sa i kemuni ga na noqu Kalou, ka'u na vakavinavinaka vei kemuni.
Au na dau vunautaka na nomuni cecere.
29Ni vakavinavinaka vei Jiova, ni sa rui vinaka o koya,
Ka sa sega ni mudu na nona loloma.
Who We AreWhat We EelieveWhat We Do
2025 by iamachristian.org,Inc All rights reserved.
