1Kemuni na Isireli, ni rogoca mada na qaqa ni sere ni vakaloloku oqo.
2Sa bale na goneyalewa o Isireli,
Ena sega ni mata cake tale!
Sa davo guilecavi koto ena nona soso,
Ka sa sega me tuberi koya cake.
3Ni sa kaya vakaoqo na Turaga ko Jiova ni lewevuqa: “Sa dua na koro e Isireli sa vakauta yani e 1,000 na sotia, ia era sa lesu ga mai e lewe 100; e dua tale na koro sa vakauta yani e lewe 100, ia era sa lesu ga mai e lewe 10.”
4A sa kaya vei ira na Isireli ko Jiova, “Ni lako mai vei au, ka o ni na bula kina.
5Ni kakua ni la'ki sokalou ki Perisepa, se vaqarai au mai Peceli — ni na yaco me takali o Peceli. Ni kakua talega ni lako i Kilikali, ni ra na kau vakabobula na lewena.”
6Mo ni golevi Jiova ga, mo ni bula. Kevaka o ni sega ni gole vua, ena lako sobu o koya vei ira na Isireli me vaka na bukawaqa. Ena vakamai ira na lewenivanua mai Peceli na bukawaqa oqo, ka sega ni dua e rawa ni bokoca rawa.
7O ni sa cudruvi, oi kemuni sa dau vakatanitaka na lewa dodonu ka lawakitaki ira na tamata mai na nodra dodonu vakatamata!
8 Jope 9.9; 38.31 A sa bulia ko Jiova na veikalokalo,
na kalokalo o Peleiadesi kei Oraioni.
Sa vukica na buto loaloa me siga rarama,
ka vukica na siga me bogi.
Sa dau kaci yani ki na wai ni wasawasa,
ka sovaraka yani ki na dela i vuravura.
Sa vakatokai me yacana ko Jiova.
9Sa kauta mai o koya na veivakacacani vei ira sa kaukauwa kei na nodra dui i tikotiko ni valu.
10Oi kemuni sa daubesetaki koya sa vunauca na kena tauci cala na vakatulewa eso ka cati koya sa dau ia na vosa vakadodonu.
11O ni sa dau vakasosataki ira na dravudravua ka kovea tani mai vei ira na kedra kakana. Ena ka oqo, o ni na sega kina ni tiko ena veivale totoka sa tara ena vatu o ni sa cakava ka sega talega ni gunu waini mai na veiloganivaini totoka o ni a teivaka.
12Au sa kila na levu ni nomuni talaidredre kei na levu ni nomuni i valavala ca. O ni a dau vakararawataki ira na tamata vinaka, ka dau ciqoma na veivaqumi, ka vakadredretaka vei ira na dravudravua me lewai vakadodonu na nodra kisi ena mataveilewai.
13O koya oqo, era na tiko lo ga ena gauna ca vakaoqo na yalomatua!
14Ni vakasaqara na ka vinaka, ka me kakua na ka ca, mo ni bula kina; ia mo ni rogoca na Turaga ko Jiova ni lewevuqa, ni na tiko kei kemuni me vaka o ni a kaya,
15ni cata na ka ca, ka vinakata na ka vinaka, ka vakadeitaka na lewa dodonu ena matamata ni koro; de na rawa ni yalololoma kina na Turaga ko Jiova ni lewevuqa, vei ira na vo-ni-bula ena kawa i Josefa.
16O koya oqo, sa kaya kina ko Jiova na Kalou ni lewe vuqa: “Ena yaco na tagi yaso ena veisaqata kecega ni koro; ia era na kaya ena veisalatu kecega, Ulei! Ulei! Era na kacivi ira na tamata me ra tagi, ka me ra tagi yaso na kena dau;
17ena yaco na tagi ena veiwere ni vaini kecega, ka ni'u sa lako voli yani vei kemuni,” sa kaya na Turaga.
18Ena ca vei kemuni sa gadreva me yaco na siga ni Turaga! Ena vuku ni cava o ni sa vinakata kina? Sa butobuto, ka sega ni rarama.
19Sa vaka e dua na tamata sa drotaka e dua na laione, ka sa tavaki koya na bea; se vaka me lako e dua ki na dua na vale ka la'ki tatabaki e lalaga, ka qai kati koya mai e dua na gata.
20Sa sega li ni butobuto na siga ni Turaga, ka sega ni rarama, ka butobuto sara ka sega na rarama e tiko kina?
21 Aisea 1.11-14 A sa kaya ko Jiova, “Au sa cata na nomuni solevu vakalotu eso; ka'u sa sega ni taleitaka na nomuni soqosoqo tabu.
22Ni o ni na cabora mai vei au na i soro kama kei na i madrali laukana, au na sega ni ciqoma. Au na sega ni ciqoma na nomuni manumanu o ni sa susuga me urouro vinaka me cabori vei au.
23Ni muduka na nomuni sere vakasausa; au sa bese ni via rogoca na domo ni nomuni api.
24Ia, ni laiva ga na lewa dodonu me drodro yani me vaka e dua na uciwai lailai, kei na i valavala dodonu me vaka na uciwai sa sega ni mamaca rawa.
25 Caka 7.42,43 Kemuni na Isireli, au a sega ni vakasaurarataki kemuni mo ni kauta mai vei au na i soro kei na i madrali ena loma ni vasagavulu na yabaki ka'u a kauti kemuni voli kina ena vanua lala.
26Ia oqo, ena vuku ni nomuni sa qarava na kalou matakau o Sakuci ka nomuni tui, kei Kaiwani na nomuni kalou kalokalo o ni sa bulia me nomuni, o ni na kauta voli tikoga kina na kena matakau
27ni'u sa kauti kemuni yani vakabobula ena dua na vanua ena taudaku kei Tamasiko.” Sa i Jiova ga na Kalou ni lewevuqa e sa kaya na veika oqo.
Who We AreWhat We EelieveWhat We Do
2025 by iamachristian.org,Inc All rights reserved.
