TIKO VOLI MAI NA LEKUTU 15 - Ai Vola Tabu Ena Vakavakadewa Vou（FNV）

Vunau me Baleta na Vakacacabo i Soro

1A sa kaya vei Mosese ko Jiova,

2“Mo vosa vei ira na Isireli ka kaya, Ni o ni sa yaco ki na vanua mo ni la'ki tiko kina, na kena au sa solia vei kemuni,

3ena gauna o ni sa vakacabora kina vei Jiova na nomuni i soro mai na qele ni manumanu - oqo me i soro kama se i soro e cabori ga me vakayacori kina na veiyalayalati, se i solisoli loloma, se veiqaravi ni solevu digitaki; na i boi ni veisoro oqo era sa ka boi vinaka vei Jiova.

4O koya sa kauta mai na nona i soro me na qai cabora talega vei Jiova na i madrali laukana, e dua na kilokaramu na valawa matailalai sa veiwaki vata kei na dua na lita na waiwai:

5kei na dua na lita na waini me i madrali liviraki; mo vakarautaka oqo kei na lami yadua ka cabo me i soro kama, se i soro me vakacabori.

6Kevaka e sipi tagane, mo vakarautaka me i madrali laukana e 2 na kilokaramu na valawa ka veiwaki vata kei na 1.5 na lita na waiwai olive;

7ka cabora vata kei na 1.5 na lita na waini, me i madrali liviraki, me ka boi vinaka vei Jiova.

8Ni o sa vakarautaka e dua luve ni bulumakau tagane me i soro kama vei Jiova, se me i soro ni bubului, se me i soro ni veivinakati,

9mo qai cabora vata kei na bulumakau oqo e dua na i madrali laukana, e tolu na kilokaramu na valawa matailalai sa veiwaki vata kei na rua na lita na waiwai.

10Ia mo kauta me i madrali liviraki e rua na lita na waini, me cabori ena bukawaqa me ka boi vinaka vei Jiova.

11Oqo na veika me dau cabori vata kei na bulumakau tagane yadua, se na sipi tagane, se na lami tagane, se na luve ni me.

12Me vaka na kedra i vakarau na ka oqo o ni sa vakarautaka, ni kitaka vakakina ki na manumanu yadua me vaka na kedra i vakarau.

13Me ra kitaka vakaoqo o ira kecega na i taukei dina kei Isireli ni ra vakacabora na i soro ka sa cabori ena bukawaqa, me ka boi vinaka vei Jiova.

14Ia kevaka sa tiko vulagi ga kei kemuni e dua na kai tani, se e dua ka tiko kei kemuni ena nomuni veitabatamata kece, ka sa gadreva me cabora e dua na i soro ena bukawaqa, me ka boi vinaka vei Jiova, me muria vakakina o koya na veika o ni kitaka.

15Ena dua ga na kena i vakarau vei kemuni na lewenivanua kei koya na tamata vulagi sa tiko vei kemuni; na i vakarau oqo ena ia tikoga ena nomuni veitabatamata kecega; ka ni o ni sa tautauvata ga ena mata i Jiova.

16Ena dua ga na lawa virikotori kei na i vakaro me baleti kemuni kei ira na tamata vulagi ka ra tiko kei kemuni.

17Sa kaya vei Mosese ko Jiova,

18Mo vosa vei ira na Isireli, ka kaya, Ni o ni sa yaco ki na vanua ka'u sa kauti kemuni kina,

19ka o ni sa tekivu kania na kakana ni vanua, mo ni vakacabora e dua na i soro vei Jiova.

20Mo ni cabora e dua na keke me i soro mai na madrali taumada; ka mo ni vakacabora me vaka na kena vakacabori na i soro mai na rara ni samu sila.

21Mo ni solia vei Jiova na i sevu ni nomuni madrali taumada, me i soro ena nomuni veitabatamata kecega.

22“Ia kevaka o ni sa cala vakacalaka ena vuku ni nomuni sega ni kila na veivakaro kecega oqo sa vosa kina vei Mosese ko Jiova;

23e okati kina na ka kecega sa vakarota vei kemuni ko Jiova ena gusu i Mosese, me vakatekivu mai na siga sa veivakaroti kina ko Jiova ka yacova yani na nomuni veitabatamata mai muri;

24io kevaka sa yaco vakacalakataki oqo ni ra sa sega ni kila na lewenivanua, me ra qai vakacabora e dua na luve ni bulumakau tagane o ira na lewenivanua taucoko, me i soro kama me ka boi vinaka vei Jiova, kei na kena i madrali laukana, kei na kena i madrali liviraki, kei na dua na me tagane me i soro ni valavala ca me vaka na kena i vakarau.

25Me qai sorovaki ira na lewenivanua taucoko e Isireli na bete, era na qai vosoti ni ra sa kauta na nodra i madrali, na ka sa cabori ena bukawaqa; kei na i soro ni valavala ca, ena vuku ni nodra vakacalaka ena mata i Jiova.

26Era sa qai sega ni cudruvi o ira na lewenivanua taucoko ni Isireli, kei na vulagi sa tiko kei ira, ni sa okati na lewenivanua taucoko ena cala vakacalaka o ya.

27“Kevaka sa vakacalaka e dua na tamata, me qai kauta o koya e dua na me yalewa sa yabaki dua, me soro ni valavala ca.Vsoro 4.27-31

28O koya na bete ena qai sorovaki koya na tamata caka cala ena nona vakacalaka, ena mata i Jiova, ena qai sega ni cudruvi kina o koya.

29Ena dua ga na lawa virikotori me baleti ira na sa vakacalaka; se i taukei ga vei ira na Isireli, se vulagi ka tiko maliwai ira.

30“Ia na tamata sa gadreva me i valavala ca, se i taukei se vulagi sa beca ko Jiova; ia me qai kau tani o koya mai vei ira na kai nona.

31Ni sa beca na vosa i Jiova, ka sa vakacacana na nona i vakaro, me sa kau tani sara na tamata o ya; me colata ga na nona caka cala.”

Na Tamata e Vakacacana na Siga ni Vakacecegu

32Ni ra tiko mai na veivanua lala na Isireli, era sa kunea e dua na tamata ni a cabuka tiko ena Siga ni Vakacecegu.

33Ia o iratou ka kunei koya ni a cabuka tiko, e ratou sa qai kauti koya yani vei Mosese kei Eroni, kei ira talega na lewenivanua taucoko.

34Era sa sogoti koya, ni bera ni lewai na ka me caka vua.

35Sa qai kaya vei Mosese ko Jiova, “Ena vakamatei dina ga na tamata oqo; me ra vakaviriki koya ena vatu o ira na lewenivanua taucoko, ena i bili ni koro.”

36Era sa qai kauti koya na lewenivanua taucoko ki na i bili ni koro, ka ra vakaviriki koya ena vatu, ka mani mate kina o koya; me vaka sa vakarota vei Mosese ko Jiova.

37A sa kaya vei Mosese ko Jiova,

38“Mo vosa vei ira na Isireli, ka tukuna vei ira me ra cula eso na wa-talitali me ukucavutaka na tutu ni nodra i sulu, ka me culai vata ki na wa-talitali na wa karakarawa. Mo ni kitaka oqo ena veitabatamata kecega.Vrua 22.12

39Na wa-talitali oqo me na dau vakananumi kemuni ena gauna kece o ni raica kina, mo ni nanuma na i vakaro kece i Jiova ka talairawarawa kina; mo ni kakua kina ni muria na gagadre ca ni lomamuni kei na matamuni.

40Na wa-talitali ena vakananumi kemuni mo ni cakava na noqu i vakaro kecega, mo ni savasava kina vua na nomuni Kalou.

41Sai au ko Jiova na nomuni Kalou; au a kauti kemuni mai na vanua o Ijipita me'u nomuni Kalou. Oi au ko Jiova na nomuni Kalou.