VUNAU NI SORO 11 - Ai Vola Tabu Ena Vakavakadewa Vou（FNV）

Kakana Savasava kei na Tawa Savasava(Vrua 14.3-21)

1A sa vosa vei Mosese kei Eroni ko Jiova ka kaya vei rau:

2Drau vosa vei ira na Isireli, ka kaya: Oqo na veika bula ka rawa ni o kania ena kedra maliwa na manumanu kecega ni vuravura.

3Na manumanu kecega sa wase rua na kena ququ, ka mama vakarua na kena ena kedra maliwa na manumanu, oqo ga mo ni kania.

4Ia ena kedra maliwa na manumanu era mama vakarua na kedra ka wase rua na kedra ququ, o ira oqo mo ni kakua ni kania: Na kameli, baleta ni sega ni wase na kena ququ, ka dina ga ni dau mama vakarua na kena; sa sega ni savasava.

5Na koni, e dina ga ni sa mama vakarua na kena, ia sa sega ni wase rua na yavana; sa sega ni savasava vei kemuni.

6Na ravete, e dina ga ni sa mama vakarua na kena, ia sa sega ni wase rua na yavana; sa sega ni savasava vei kemuni.

7Na vuaka, e dina ga ni sa wase rua na kena ququ, ia sa sega ni mama vakarua na kena; sa sega ni savasava vei kemuni.

8Mo ni kakua ni kania na lewedra, mo ni kakua talega ni tara na yagodra ni ra sa mate; era sa sega ni savasava vei kemuni.

9Na veika oqo sa tara mo ni kania, mai vei ira na ka bula kecega e loma ni wai. Na veimataqali ika kecega ni waitui se uciwai e vakalaca ka vakavarina mo ni kania.

10Ia na ka bula kecega ena waitui kei na uciwai sa sega ni vakalaca ka sega na varina, mo ni kakua ni kania.

11Na veimataqali ika se manumanu bula e loma ni wai vakaoqo era okati me tawa savasava. Mo kakua ni kania se tara na yagodra ni sa mate.

12Mo kakua ni kania na ka bula kecega mai wai sa sega ni vakalaca ka sega ni vakavarina.

13Mo ni kakua ni kania e dua vei ira na mataqali manumanu vuka me vakaoqo: na ikeli, na vulituri,

14na osipere, na kaite, na falikoni ena kena mataqali kecega;

15na veimataqali reveni kecega;

16na ositeriji, na manumanu ni bogi, na dre, na manulevu ena kena mataqali kecega;

17na lulu lalai, na komorati, na lulu levu,

18na toa ni wai, na lulu ni vanua lala, na osiperi,

19na belo ena kena veimataqali kecega, na upoe, kei na beka.

20Sa tawa savasava na manumanu vuka lalai kecega sa dau qasi, ka vakatabana, ka yava i va;

21ia e vakavo ga na kena era dau lade me vaka na vodre.

22Sa rawa kina me laukana na veimataqali vodre kece sara.

23Ia na veimanumanu tale eso era vakatabana ka qasi voli e yavadra sa tawa savasava.

Manumanu Tawa Savasava

24Ia na veika oqo ena vakadukadukalitaki kemuni; kevaka e dua e tara na yago ni manumanu mate, ena sega ni savasava me yacova na yakavi.

25Vua e dua sa tara e dua na tiki ni yagomate, e dodonu me savata na nona i sulu, ia ena sega ni savasava o koya me yacova na yakavi.

26Na manumanu kecega sa wase na kena ququ, ia sa sega ni basika na kena wase, se sega ni dau mama vakarua na kena, sa sega ni savasava vei kemuni; o koya sa tara ena sega ni savasava.

27O ira na manumanu kecega sa lako voli ena nodra i taukuku ena kedra maliwa na yavaiva, era sa sega ni savasava vei kemuni; o koya sa tara na yagodra mate ena sega ni savasava me yacova na yakavi;

28O koya talega sa colata na yagodra mate me savata na nona i sulu, ia ena sega ni savasava me yacova na yakavi; era sa ka dukadukali vei kemuni.

29O ira na manumanu dauqasi oqo ka ra robota na dela i vuravura sa sega ni savasava vei kemuni: na wiseli, na kalavo, na moko lelevu ena kena veimataqali

30me vaka na vokai, na korokotaile ni vanua, na moko, na moko ni nuku, kei na moko dauveiveisau na roka ni dagona.

31Kevaka e dua e tarai ira se tara na yagodra mate ena sega ni savasava me yacova na yakavi.

32Na ka kecega e lutuka se tara na yagodra mate, ena sega ni savasava. Oqo e okati kina na i yaya kau, na i sulu, na kuli-ni-manumanu se na taga, se dua ga na i yaya e vakayagataki ena dua na ka. E dodonu me toni ena wai, ia ena sega ni savasava ka yacova na yakavi.

33Kevaka e dua vei ira sa lutu ena kuro qele, na ka kece sa tu kina ena sega ni savasava; ia na i yaya qele o ya me vorolaki.

34Kevaka e dua na kakana daulaukana e sa tiriva na wai ka tiko ena loma ni kuro qele tawa savasava oqo, sa sega ni savasava na kakana o ya kei na wai ena loma ni kuro.

35Na ka kecega sa lutuka na tiki ni yagomate sa sega ni savasava; kevaka e lutuka na ovani se na kuro ni vakasaqa, ia me ra vorolaki oqo; era sa sega ni savasava oqo vei kemuni.

36A mataniwai se na taqe ni wai ena savasava tu ga; ia na ka cava ga sa tara na yagomate ena sega ni savasava.

37Kevaka sa lutuka na yagomate e dua na sore ni kau sa vakarau kaburaki me tei, ena savasava tu ga na sore ni kau.

38Ia kevaka sa vakasuasuataki na sore ni kau, ka qai lutuma e dua na tiki ni yagomate, sa sega ni savasava na sore ni kau.

39Kevaka sa mate e dua na manumanu e dau laukana, o koya ena tara na yagona ena sega ni savasava me yacova na yakavi.

40Ia vei koya e kania e dua na tiki ni yagona, e dodonu me savata na nona i sulu, ia ena sega ni savasava me yacova na yakavi; o koya talega sa colata na yago ni manumanu mate e dodonu me savata na nona i sulu, ka na sega talega ni savasava ka yacova na yakavi.

41Mo kakua ni kania na veimataqali manumanu lalai era dau qasi voli ena dela ni qele,

42se ra dolo e ketedra, se lako voli ena yavadra vava, se sa vuqa na yavadra.

43Kakua ni o ni vakadukadukalitaki kemuni mai na nomuni vakayagataki ira me kakana.

44Ni sai au ko Jiova na nomuni Kalou: ia mo ni vakasavasavataki kemuni, ka mo ni yalosavasava, ni'u sa Kalou yalosavasava oi au.Vsoro 19.2; 1Pita 1.16

45Ni sai au ko Jiova, o koya ka kauti kemuni tani mai na vanua o Ijipita, me'u nomuni Kalou; ia oqo mo ni yalosavasava, ni'u sa yalosavasava oi au.”

46A sa vakaoqo na i vakaro ena vuku ni manumanu yava i va, na manumanu vuka, na ka kecega sa bula voli e wai, kei na ka kecega sa qasi voli ena dela i vuravura.

47Mo ni qarauna vinaka na kena vakatakilai na veika sa sega ni savasava mai na kena e savasava, kei na manumanu e rawa ni laukana mai na kena e vakatabui.