1 Vbale 22.1 Sa uasivi cake na yaca e rogo vinaka mai na waiwai boi vinaka sara, ka sa vinaka cake na siga o mate kina mai na siga o sucu kina.
2Sa uasivi cake me da lako ki na dua na vale e caka tiko kina na vakaloloku, mai na vale e caka tiko kina na kana magiti baleta ni na rawa me ra vakasamataka kina na tamata era bula tiko ni sa waraki keda kece tu ga na mate.
3Sa uasivi cake na tagi mai na dredre; ena rarawa kina na kemu i rairai, ia sa na vukea na nomu vakasama.
4Na tamata lialia sa dau vakasamataka voli ga na marau. Na tamata vuku sa dau vakasamataka na mate.
5Sa uasivi cake na nona vunauci iko e dua na tamata vuku mai na nona vakalevulevui iko e dua na tamata lialia.
6Ni dredre e dua na tamata lialia sa vaka na calidi ni veivoto ni kau sa kama ena buka. Sa sega na kena i balebale.
7Sa vaka na i vukivuki ni tamata lialia e dua na tamata vuku ena gauna sa vakaisina kina e dua na tamata. Ni o taura na ka o saumi kina mo cakava na ka ca sa na vakacacana na nomu i vakarau.
8Sa uasivi cake na i tinitini ni ka mai na i vakatekivu ni ka. Sa uasivi cake na dauvosota mai na dokadoka.
9 Jeme 1.19 Mo tarova na yalomu katakata, sa ka lialia mo maroroya na yalo ca.
10Kakua sara ni taroga, Na cava e vinaka cake kina na veika sa yaco ena veigauna sa oti? Sa sega ni taro vakayalo matua.
11Na tamata kece sara e bula sa dodonu me vuku, sa vinaka sara me vaka na noda rawata e dua na i votavota,
12ka na rawa ni solia vei iko eso na veivakadeitaki me vaka e dau rawa mai na i lavo. Na vuku ena taqomaki iko sai koya o ya na yaga ni kila-ka.
13Vakasamataka mada na veika sa cakava na Kalou. E rawa vakacava vua e dua na tamata me vakadodonutaka na ka sa vakavevea na Kalou?
14Mo marau ena gauna e daumaka tu kina na veika kece me baleti iko, ia ena gauna sa yaco mai kina na leqa mo nanuma ni Kalou sa vakavuna ruarua na leqa kei na marau; o sega ni kila na cava tale ena yaco tarava mai.
15Sa sega na kena yaga na noqu bula, ia au sa raica kina na ka kecega. Sa na mate beka e dua na tamata yalododonu, ka bula tikoga mai e dua na tamata i valavala ca.
16Mo kakua ni yalododonu sara se mo vuku sara. Na cava mo vakarusai iko kina?
17Ia mo kakua ni valavala ca sara vakalevu se rui lialia sara. Na cava mo mate dole kina ni sa bera nomu gauna?
18E vinaka mo kakua ni sivia e dua vei rau kevaka o rerevaka na Kalou o sa na toso cake sara.
19E levu na ka e rawa ni cakava na vuku vua e dua na tamata mai na ka e rawa ni ratou cakava e lewe tini na i liuliu me baleta e dua na koro.
20Sa sega ni dua na tamata e vuravura me cakava ga na ka dodonu ena veigauna kece ka me sega ni cakava e dua na ka e cala.
21Kakua ni vakarogoca kece na veika era kaya na tamata, de o na rogoca na nomu dauveiqaravi ni vosa vakacacataki iko.
22Ia o iko talega o sa kila ni o sa dau vosa vakacacani ira vakavuqa na tani.
23Au sa gadreva me'u vuku, ia au sa sega ni yacova rawa.
24E rawa vakacava me dua e kunea na i balebale ni bula? Sa rui titobu ka sega ni rawa me da kila.
25Ia au sa vagolea na noqu bula ki na kila-ka vata kei na vuli; au sa nakita me'u kunea na vuku kei na i sau eso ni noqu taro ka me'u kila na ca kei na sesewa ni lialia.
26Au sa qai raica ni dua na ka e gaga cake mai na mate o ya na nona i tovo e dua na yalewa. Na dodomo ena cakava vei iko e vaka e dua na dai sa vaka e dua na lawa; na ligana e vaka e dua na sinucodo ni mokoti iko. Na tamata sa lomana na Kalou ena rawa ni dro tani mai vua, ia ena vesuka na tamata ca o koya.
27A sa kaya na Dauvunau, au sa raica mai vakalalai na ka oqo ena noqu vaqara na i sau ni noqu taro eso.
28Au a vaqara talega na i sau ni taro tani tale eso ka'u sa sega ni kunea e dua na ka. Au sa raica e dua na tagane mai na vei yadua na udolu me'u rawa ni doka, ia au sega ni kunea rawa e dua na yalewa.
29Sa i koya oqo na ka au kunea, a bulia na tamata na Kalou me rawarawa ga, ia eda sa qai cakava me da dredre ka vereverea sara.
Who We AreWhat We EelieveWhat We Do
2025 by iamachristian.org,Inc All rights reserved.
