1Kemuni na Kalou, sa dodonu ga mo ni vakacaucautaki mai Saioni,
Ka me keimami maroroya na neimami yalayala vei kemuni,
2Baleta ni o ni sa dau sauma na masu.
Era na lako mai vei kemuni na tamata ni veivanua kecega
3ena vuku ni nodra i valavala ca.
Sa vakadrukai keimami na neimami i tovo ca,
Ia, o ni sa vosoti keimami ga.
4Era sa kalougata na tamata o ni sa digitaka
O ira sa kau vakavoleka mai me ra tiko ena nomuni vale tabu.
5O ni sa dau sauma na neimami masu
mai na nomuni dausolia na qaqa ena i valu,
Ka dau vakayaco-ka me keimami vakabulai kina.
Na tamata ena dela i vuravura taucoko
Kei ira mai na wasawasa vakayawa era vakadinati kemuni.
6O ni sa vakatikora donu na veiulunivanua ena nomuni kaukauwa,
Me vakaraitaka na nomuni kaukauwa levu.
7O ni sa vakamaravutaka na seuseua ni wasawasa
Kei na rorogo ni vadugu ni veibiau;
O ni sa vakamaravutaka talega na nodra maue na tamata.
8Sa tucake ena qoroqoro o vuravura taucoko,
Baleta na veika lelevu o ni sa vakayacora.
Sa vakavuna na kaila ni marau na nomuni cakacaka,
Mai na dua na yasa i vuravura me yaco ki na yasana kadua.
9O ni sa vakaraitaka na nomuni kauwaitaki vuravura
Ena nomuni vakatauca na uca;
O ni sa vakavutuniyautaka na qele ka vakabulabulataka.
O ni sa tawana na veiuciwai lalai ena wai;
Ka vakarautaka na vuata e vuravura.
Sa vaka oqo na veika o ni sa cakava:
10O ni sa vakatauca vakalevu na uca ena veivanua sa siviyara tu,
Ka vakasuasuataka ena wai;
O ni sa vurulaka na qele ena uca mirimiri
Ka vakavuna me ra tubu cake na i tei.
11Sa vua ni qele vinaka dina na veika e vakarautaka na nomuni yalovinaka!
E basika na sautu ena vanua kecega o ni lako kina.
12Sa vakasinaita na vanua veico na qele ni manumanu;
Sa sinai ena reki na veiyasa ni ulunivanua.
13Sa robota na veivanua lala na sipi,
Ka sa sinai na veibuca ena witi;
Era sa kaila ga ka sere ena reki na ka kecega.
Who We AreWhat We EelieveWhat We Do
2025 by iamachristian.org,Inc All rights reserved.
