1Sa dua na yalewa ka a vakawatitaka e dua vei ira na luve ni parofita sa mai tagi voli vei Ilaisa, ka kaya, “Sa mate na watiqu; ia o ni kila ni sa daurerevaki Jiova o koya; ia sa lako mai e dua na tamata ka'u a dinau tu vua me mai kauti rau na luvequ tagane me rau la'ki nona bobula me i sau ni dinau au sega tu ni sauma rawa.”
2A sa kaya vua o Ilaisa, “A cava me'u cakava ena vukumu? Mo tukuna mada vei au se cava soti e tu oqo vei iko e vale?”
“Sa sega ni tu vua na nomuni vada e dua na ka e vale, e dua ga na tavaya waiwai olive lailai,” a sauma na vada.
3Sa qai tukuna o Ilaisa vua na vada, “Mo la'ki kere tavaya lala mada mai vei ira kecega na kai nomu, na kena levu ga o rawata.
4Ia mo qai curu vata kei rau na luvemu ki vale, sogota na katuba, ka livia yani na waiwai ki na saqa kecega oqori. Mo biuta toka vakatikitiki na kena e sa sinai.”
5A lako tani mai vei Ilaisa na yalewa, ka sogota na katuba vata kei rau na luvena, ka rau kauta vua na tavaya lala me livi waiwai kina o tinadrau.
6Ia ni sinai taucoko na tavaya, a kaya na yalewa vua e dua vei rau na luvena, “Mo kauta mai vei au e dua tale na tavaya.” A sa kaya na luvena, “Sa sega tale na tavaya e vo.” Sa qai mudu na drodro ni waiwai.
7A lako na yalewa ka tukuna vua na tamata ni Kalou, “Mo lako ka volitaka na waiwai, ka sauma kina na nomu dinau; ia na kena vo mo dou na bula kina vata kei rau na luvemu.”
Na Marama Vutuniyau ni Sunemi kei Ilaisa8Ena dua na siga, sa lako ki Sunemi o Ilaisa, na vanua e tiko kina e dua na marama vutuniyau. E a sureti Ilaisa na marama oqo me kana, ka sa yaco me tiki ni nona bula o Ilaisa ena veigauna e basika kina e Sunemi me dau la'ki kana ena nona vale.
9A sa kaya na marama vua na turaga watina, “Raica, au sa kila ni sa tamata yalosavasava o koya ka dau lako tiko mai ki ke.
10Me daru tara mada e dua na nona rumu lailai me toka ena dela ni bai vatu e cake, ka biuta kina e dua na i mocemoce, na teveli, na i dabedabe, kei na dua na cina; ia na veigauna kece e dau lako mai kina vei kedaru, me curu ka vakacegu kina o koya.”
11Ena dua na siga, a sa lako yani ki kea o Ilaisa, a sa curu ki na nona rumu e cake ka la'ki vakacegu koto kina.
12A sa kaya vei Keasi na nona tamata me la'ki kaciva mada mai na marama ni Sunemi oqo. Ia ni sa yaco mai,
13sa kaya o Ilaisa vei Keasi, “Mo tarogi koya mada se na cava e rawa ni'u vakayacora vua ena vuku ni ogaoga levu sa dau cakava ena kena vakarautaki na ka me baleti kedaru. Ena vinakata beka li me'u lai raica na tui se na i liuliu ni mataivalu ka cavuta na vosa vinaka me baleti koya?”
A sa kaya na yalewa ni Sunemi, “Sa tu kece vei au na veika au gadreva ena kedra maliwa na kai noqu.”
14A sa kaya o Ilaisa vei Keasi, “Ia na cava tale beka e rawa ni caka ena vukuna?”
A sauma o Keasi, “Ia, o koya e sega tiko na luvena, ka sa qase sara na watina.”
15Sa qai vakaroti Keasi o Ilaisa, “Tukuna vua me lako mada mai.” E a lako mai na marama ka duri tu ena mata ni katuba.
16A sa kaya vua o Ilaisa, “Ena gauna vata oqo ena yabaki vou, o sa na roqota voli e ligamu e dua na luvemu tagane.”
A sa kaya na marama, “E segai noqu turaga, mo ni kakua mada ni lasutaka na nomuni vada. Oi kemuni na tamata ni Kalou!”
17Ia, me vaka na vosa i Ilaisa, sa qai kunekune na yalewa ni Sunemi oqo ka vakasucuma e dua na gonetagane ena gauna vata o ya ena yabaki ka tarava.
18Ni oti e vica na yabaki ni sa qase cake na gone, ka donumaka na gauna ni tatamusuki, a sa lako yani o koya me tomani tamana ena i teitei kei ira na dautamusuki sila.
19E sega ni dede ni sa tagicaka yani vei tamana, “Oilei! Sa mosi na uluqu, sa mosi na uluqu!”
A sa kaya na tamana vua e dua na nona tamata, “Mo keveti koya mada yani vei tinana.”
20A sa keveta cake na cauravou lailai ka kauta lesu vei tinana; a la'ki tenea tiko o tinana me yacova sara na sigalevu tutu, a qai mate kina na gone.
21E a qai keveta cake na gone o tinana ki na rumu nei Ilaisa, ka la'ki vakadavori koya ena nona i mocemoce na tamata ni Kalou, ka sogota mai na katuba ni sa curu ki tautuba.
22A kacivi watina, ka kaya, “Mo tala mada mai vei au e dua na cauravou kei na dua na asa. Au gadreva me'u lako mada vakatotolo vua na tamata ni Kalou, ka'u na qai lesu tale mai.”
23A taroga lesu o watina, “A cava o via lako kina edaidai? E sega ni siga ni Solevu ni Vula Vou oqo, ka sega talega ni Siga ni Vakacecegu.”
A sa kaya o koya, “Veitalia ga.”
24A vesuka na nona i dabedabe ki na asa, ka kaya vua na nona tamata, “Mo vakaciciva na asa me lako vakatotolo yani ka kakua ni vakaberabera, ia vakavo ga ke'u sa kaya vei iko.”
25A mai lako yani na marama ki vua na tamata ni Kalou ena ulunivanua o Kameli.
Ia ni sa raici koya na tamata ni Kalou ni sa lako tiko yani, a sa qai kaya vei Keasi na nona tamata, “Raica, sa lako tiko mai oqori na marama ni Sunemi;
26mo cici mada ka la'ki tavaki koya, ka taroga vua se vinaka kece tiko na veika me baleti koya, kei na watina, kei na luvena.”
A sauma vei Keasi na marama ni vinaka kece tiko na veika taucoko sara.
27Ia ni sa yaco yani ki na ulunivanua vua na tamata ni Kalou na marama, a sa mokota na yavana. E a toro yani o Keasi me biligi koya tani, ia sa kaya na tamata ni Kalou, “Mo laivi koya ga baleta ni sa rui rarawa vakalevu sara na yalona, ka se bera talega ni tukuna vei au ko Jiova e dua na ka.”
28A sa kaya vei Ilaisa na marama, “Au a kerea li vei iko na noqu turaga e dua na luvequ tagane? Au a sega li ni kaya mo kakua soti ni laveta cake na noqu vakanuinui?”
29E a qai vuki vei Keasi o Ilaisa ka kaya, “Mo vakatotolo sara! Taura na noqu i titoko ka lako. Kua ni o tu vakadua mo kidavaka na tamata cava ga o sota kaya, ka kakua ni o vakaoti gauna mo sauma na taro. Mo lako vakadodonu sara ki vale ka vakotora na noqu i titoko ena mata ni gone.”
30A sa kaya na marama vei Ilaisa, “Au sa bubului ena vuku ni noqu yalodina vua na Kalou bula ko Jiova kei iko talega ni'u na sega ni biuti iko!” E rau a qai salavata yani.
31A sa liu vei iratou o Keasi ka la'ki vakotora na i titoko e mata ni gone; ia, sa sega tale na rorogo se na i vakatakilakila ni bula me raica vua. A sa lesu tale o Keasi me tavaki Ilaisa, ka tukuna vua, “Sa sega ni yadra na gone.”
32Ia ni sa yaco ki vale o Ilaisa, sa curu duadua yani ki na loma ni rumu ka raica na cauravou lailai ni sa davo matemate koto ena i mocemoce.
33A sa sogota na katuba ka masu vei Jiova.
34A sa qai davoca na gone, ka golea na gusuna ki na gusu ni gone, kei na matana ki na mata ni gone, kei na qeteqete ni ligana ki na qeteqete ni liga ni gone. Ia ni sa davo bikai koya tu, a sa tekivu me curuma yani na yago ni gone na katakata.1Tui 17.21
35A duri cake o Ilaisa, ka lako wavoki e loma ni vale ni bera ni davo bikai koya tale na gone. E a suru vakavitu na gone, ka qai dolava na matana.
36A kacivi Keasi o Ilaisa ka kaya vua me kacivi koya mai na marama ni Sunemi. Ia ni sa curu yani ki loma, a sa kaya vua na tamata ni Kalou, “Na nomu cauravou oqo, mo kauti koya yani.”
37A sa bale sobu na marama ki na yava i Ilaisa, ka sa tara na qele na matana; a sa qai keveta cake na luvena ka gole yani.
E Rua Tale na Cakacaka Veivakurabuitaki38A lesu tale ki Kilikali o Ilaisa, ia sa dausiga tu na vanua. Ena nona a vakatavulici ira voli eso na i lawalawa parofita, a qai tukuna vua na nona tamata me taura e dua na kuro levu ka me vakasaqara kina e dua na kedra kakana.
39A lako yani e dua vei ira ki veikau me la'ki vaqara mai eso na draunikau. A sa kunea eso na walai ni veikau ka tauca mai kina eso na vuata era sega ni daulaukana, ka kauta yani vakalevu. A sa musumusuka ka biuta e loma ni kuro, ia a sa sega ni kila se mataqali draunikau vakacava o ya.
40A sa qai sova yani na kakana me ra kana na tamata. Ia ni ra sa tovolea na kakana, era a qai qolouvaka yani vei Ilaisa, ka kaya, “Kemuni na tamata ni Kalou! Sa tiko na mate e loma ni kuro!” Era sa sega ni kania rawa.
41A sa kaya o Ilaisa, “Dou kauta mai na madrai droka.” A biuta o koya ki loma ni kuro, a sa kaya o koya, “Dou takiva yani na kakana vei ira na tamata me ra kania.” Ni oti oqo, a sega tale ni gaga na lewe ni kuro.
42A lako mai e dua na tamata mai Pealisalisa; a kauta mai vua na tamata ni Kalou na madrai ni sevu, e ruasagavulu na i buli madrai sa caka mai na i sevu ni barile e tamusuki ena yabaki o ya, kei na sola ni sila bulabula eso. A sa kaya o Ilaisa, “Solia vei ira na tamata me ra kania.”
43Ia a kaya na nona dauveiqaravi, E rawa vakacava li me'u tauca na ka oqo vei ira na lewe dua na drau? A sa kaya tale o koya, Mo tauca ga vei ira na tamata me ra kana: ni sa kaya vakaoqo ko Jiova, ‘Era na kana, ka na vo tiko.’
44A tauca o koya e matadra, era a kana, ka vo, me vaka na vosa i Jiova.
Who We AreWhat We EelieveWhat We Do
2025 by iamachristian.org,Inc All rights reserved.
