MAIKA 4 - Ai Vola Tabu Ena Vakavakadewa Vou（FNV）

Tui ni Sautu e Vuravura na Turaga(Aisea 2.2-4)

1Ena gauna mai muri

Na delana sa toka kina na Valenisoro

Ena yaco me cecere duadua vei ira kecega,

Ka siviti ira na delana cere kecega.

E vuqa na veivanua era na tabili yani kina,

2Era na kaya na lewe ni veivanua oqori,

“Me da cabe cake ki na ulunivanua i Jiova,

Ki na nona Valenisoro na nodra Kalou na Isireli.

Ena vakatavulica o koya na ka me da cakava

Eda na lako ena sala sa digitaka o koya.

Ni sa lako mai Jerusalemi na vakavuvuli i Jiova;

Ka sa vosa vei ira na nona tamata mai Saioni.”

3 Aisea 2.4; Joeli 3.10 Ena walia o koya na nodra veileti na veivanua,

Ena kedra maliwa sa matanitu rogo sa tu yawa.

Era na tukia na nodra i seleiwau me bati ni siviyara,

Kei na nodra moto me i sele ni sasamaki.

Ena oti vakadua na veivaluvaluti ni veivanua,

Me mudu vakadua na vakarautaki ni i valu.

4 Saka 3.10 Era na tiko vakacegu na tamata yadua

Ena loma ga ni nodra veivaini kei na veilolo,

Ka sega sara ni dua ena vakarerei koya.

Sa yalataka oti ko Jiova ni lewevuqa na ka oqo.

5Na veivanua yadua era na sokalou ka muria na nodra dui kalou, ia eda sa sokalou ka muri Jiova ga na Kalou ena veigauna kecega ka sega ni mudu.

Era na Lesu Tale Mai ena Kau Vakabobula na Isireli

6A sa kaya ko Jiova, “Sa lako tiko mai na gauna me'u na soqoni ira vata tale mai kina na tamata ka'u sa cudruva, o ira sa vakararawataki tu ena nodra kau vakabobula.

7Era sa lokiloki ka ra tu yawa mai na nodra vanua, ia ka'u na tauyavutaki ira tale na vo-ni-bula ena dua na i tekitekivu vou. Au na qai liutaki ira ena Ulunivanua o Saioni mai na gauna o ya ka tawa mudu.”

8Ia o iko, Jerusalemi, na vanua e yadravi ira tiko mai kina na nona tamata na nodra Kalou, o na yaco tale mo koro turaga ni matanitu a nomu tu e liu.

9A cava soti ga o rui tagi kina vakadomoilevu? A cava soti e mosi vakaukauwa tiko vei iko me vaka ni taratara tiko e dua na yalewa? E baleta beka ni sa sega na nomu tui, ka ra sa mate oti na nomu daunivakasala?

10Kemuni na kai Jerusalemi, ni dolo ka osi me vaka ni vakasucu tiko e dua na yalewa. Ia sa kena gauna oqo mo ni biuta kina na koro ka la'ki tiko mai na vanua lala. O ni sa na lako ki Papiloni. Ia o ni na qai la'ki vueti tale mai kina, ni sa vakabulai kemuni ko Jiova mai vei ira na kemuni meca.

11E vuqa sara na veivanua era a sosoqoni vata me ra valuti kemuni. Era sa kaya, “Sa dodonu me vakarusai o Jerusalemi! Eda na raica sara ni sa rusa tu na koro levu oqo!”

12Ia o ira na veivanua oqo era sega sara ni kila na ka e tiko ena loma i Jiova. Era sega sara ni kila ni sa nakita tiko o koya me soqoni ira vata mai ka qai totogitaki ira, me vaka ni sa kumuni vata me samu na raisi sa musu oti.

13Sa kaya ko Jiova, “Kemuni na kai Jerusalemi, ni lako yani ka la'ki totogitaki ira na kemuni meca! Au na vakaukauwataki kemuni me vaka na kaukauwa ni bulumakau sa kaukamea na kena i leu ka parasa na yavana. O ni na vorolaka e vuqa na veivanua, kei na i yau era sa rawata mai na i tovo kaukauwa ena qai soli me noqu, na Turaga ni vuravura kecega.”