1Ena yaco na veika ca vei ira na noda meca!
Era sa butako ka vakacaca,
Ia era sa sega ni butakoci, se vakacacani.
Ia ena oti mai na nodra gauna ni butako kei na vakacaca,
Era sa na qai butakoci ka vakacacani.
2I Jiova, ni lomani keimami mai.
Keimami sa vakanuinui vei kemuni.
Ni taqomaki keimami ena veisiga,
Ka vakabulai keimami ena gauna ni leqa.
3Ni o ni vala ena vuku i keimami,
Era sa dro ga na meca
Ena vuku ni domo ni veiraravui.
4Sa biu tu na nodra i yau
Ka sa kau me i tokinivalu.
5Me laveti ga ko Jiova!
Io sa cecere na nona i tikotiko;
Ena vakasinaiti Jerusalemi
Ena lewa dodonu kei na yalodina.
6Ena vakataudeitaka na matanitu;
Ena taqomaki ira tikoga na nona tamata
Ka na solia vei ira na vuku kei na kila-ka.
Ia na nodra i yau talei duadua
Sa i koya na rerevaki Jiova.
7Rogoca! Era sa kere veivuke na tamata qaqa;
Era sa tagi vakalevu
Na mata era kauta mai na veisaututaki.
8Sa lala tu na veigaunisala lelevu;
Era sa sega ni muria na dauveilakoyaki.
Sa kavoro na veiyalayalati;
Era na beci na kena i vakadinadina
Ka sa sega ni dokai e dua na tamata.
9Sa tu wale na vanua ka lala didi.
Sa malai na veikau mai Lepanoni ka vuca yani,
Ka sa vaka na vanua dravuisiga o Saroni;
Era sa malai sara ka mira yani na draunikau
Mai Pasani kei Ulu i Kameli.
Sa Vunaici Ira na Meca ko Jiova10A sa kaya ko Jiova,
“Ia oqo au sa na cakava!
Au sa na vakaraitaka sara mada na levu ni noqu kaukauwa
11Sa tawa yaga na veika o ni nakita,
Ka tawa yaga na veika o ni cakava;
O ni sa vakacacani kemuni ga.
12O ni na vakavurumemeataki me vaka na lase vakamai
Ka vaka na kau vakavotona sa kama me dravusa.
13Ni rogoca na veika au sa cakava,
Oi kemuni o ni voleka kei ira era yawa sara yani,
Ka mo ni kila talega na noqu kaukauwa.”
14Era sa rere na tamata i valavala ca mai Saioni
Ka sautaninini o ira era sega ni kila na Kalou.
Era sa kaya,
“O cei vei keda e rawa ni bula vata
Kei na bukawaqa e dau veivakamai?
Se me na bula vata kei na bukawaqa tawa mudu?”
15O koya ga e vosataka na ka dina
Ka cakava na ka dodonu sa rawa me bula.
Kakua ni vakayagataka na nomu kaukauwa
Mo veidabuitaka kina na dravudravua;
Mo kua talega ni ciqoma na veika o vaqumi kina.
Kakua ni lala vata kei ira era navuca na laba
Se cakava na veika tawa dodonu.
16O na qai taqomaki vinaka kina;
O na maroroi vinaka me vaka sa viribaiti vinaka
Ena bai cecere kaukauwa;
Ena tiko na kakana mo kania
Kei na wai mo gunuva.
Na Gauna Lagilagi ka se Bera Mai17Na matamuni ena raica e dua na tui e veiliutaki ena lagilagi
Ka lewa tiko e dua na matanitu vakaitamera.
18O ni sa na dau nanuma wale tu ga na ka o ni dau rerevaka:
E vei o koya e dau wiliwili?
E vei o koya e dau wilika na i lavo?
E vei o koya e dau wilika na veivale lelevu?
19O ni sa na sega tale ni raici ira
Na kai tani dokadoka era vosataka na vosa o ni sega ni kila.
20Raici Saioni mada!
Sa dua na vanua sa taqomaki vinaka,
Sa vaka e dua na valelaca sa sega ni veitokiyaki,
Ka sa sega ni bau cavu e dua na kena i vakadei
Se cavuka e dua na kena dali.
21Ena vakaraitaka vei keda ko Jiova na nona i ukuuku.
Eda na vakaitikotiko ena bati ni wai levu kei na veiuciwai lalai,
Ena sega ni bau voce kina e dua na waqa
Se soko kina e dua na waqa vakaturaga.
22Ni sa noda turaganilewa ka i liuliu ko Jiova.
Sa noda Tui o koya ka na vakabulai keda.
23Era na kaya na tamata,
“Sa lili savu wale tu ga na nomu dali;
Sa na sega ni vakadeitaka na i vana,
Se me tevuka vakavinaka na laca.
Sa na qai wasei na i tokinivalu
Ka ra na bau votai talega kina na mataboko,
Ni sa rui levu.”
24Ena sega ni dua e tiko e kea me na kaya,
“Au sa tauvi mate,”
Ni sa na bokoci kece na nodra i valavala ca,
Na tamata era tiko e kea.
Who We AreWhat We EelieveWhat We Do
2025 by iamachristian.org,Inc All rights reserved.
