1 Isi 26.1—28.19; Joeli 3.4-8; Emo 1.9,10; Saka 9.1-4; Maciu 11.21,22; Luke 10.13,14 Oqo e dua na i tukutuku baleti Taia.
Mo ni vakaisaisa ka tagi na dausoko ni Tasisi,
Ni sa vakarusai na nomuni i kelekele ni waqa,
Ka sa ca na kena toba kei na kena veivale.
Ni sa na lesu mai na nomuni waqa mai Saipurusi,
O ni sa na qai kila na kena i tukutuku.
2Ni tagi na tiko mai baravi,
Oi kemuni na dauveivoli mai Saitoni,
Era sa takosova na wasawasa na nomuni i talai
3Ka ra sa tiko ena loma ni wasawasa.
Sa sala ni nomuni rawa i lavo na sila mai Siori,
Na vua ni qele ena bati ni uciwai na Naile;
O iko na dauveivoli ni veivanua kece.
4Mo madua mada, na koro o Saitoni!
Ni sa biuti iko na waitui kei na wasa titobu, ka kaya,
“Au sa sega ni bau taratara se vakasucu,
Ka'u sa sega talega ni susuga e dua na cauravou,
Se meimei vua e dua na goneyalewa.”
5Era na kurabui ka veilecayaki na kai Ijipita,
Ena rusa sa yacovi Taia.
6Ni lako yani ki Tasisi,
Ka mo ni tagi na vakaitikotiko ena baravi.
7Sa i koya li oqo na nomuni koro qaqa,
Ka sa tauyavutaki makawa sara?
Sa i koya li oqo na koro sa talai ira yani na tamata,
Ki na tai ka dua ni wasawasa me ra tauyavutaka
Na veivanua?
8O cei li sa nakita vakaoqo
Na kena saqati o Taia na koro turaga,
Ka ra sa turaga dokai na kena dauveivoli,
Era sa kilai e vuravura taucoko.
9Sa nakita na ka oqo ko Jiova ni lewevuqa,
Me muduka kina na nodra dokadoka na veika era cakava,
Ka vakamaduataki ira na kena tamata dokai.
10Kemuni na kai Tasisi, ni la'ki teivaka na nomuni vanua.
Ni sa sega tale ni dua me taqomaki kemuni.
11Sa dodoka yani na ligana na Turaga ki na wasawasa,
ka yavalata na veimatanitu.
A sa solia ko Jiova na i vakaro me baleti Kenani
me vakarusa na kena veitikotiko kaukauwa.
12A sa kaya na Turaga:
I Saioni, sa oti vakadua na nomu gauna ni marau,
Era sa vakararawataki na nomu lewe ni vanua.
Kevaka mada ga mo ni dro ki Saipurusi,
Era na sega ga ni tiko vakacegu kina.
13(Sa i ira ga na kai Papiloni ka sega ni o ira na kai Asiria era sa laivi ira na manumanu kila me ra ia na vakacaca mai Taia. O ira na kai Papiloni era a tara cake talega na i kabakaba me valuti kina na koro; era a basuraka sobu na bai kei Taia ka laiva na koro me rusa.)
14Ni tagi na dausoko mai Tasisi,
ni sa vakarusai na koro o ni vakanuinui kina.
15Ena yaco mai na gauna ena guilecavi kina o Taia me 70 na yabaki, na dede ni gauna ni nona bula e dua na tui. Ni sa na oti na 70 na yabaki o ya, ena qai yaco o Taia me vaka na yalewa dautagane ena sere:
16Taura na nomu api, qai wavokita na koro,
O iko na yalewa dautagane sa guilecavi!
Qiria ka laga tale mada na nomu sere e vuqa,
Me kauti ira lesu tale mai na tagane.
17Ni sa na oti na vitusagavulu na yabaki, sa na qai solia ko Jiova me lesu tale o Taia ena kena i vakarau ni bula ni veivoli e liu, ka na qai volitaki koya yani vei ira na veimatanitu kecega e vuravura.
18Na i lavo ena rawata ena nona veivoli ena vakacabori vei Jiova. Ena sega ni vakauta tani, ia era na vakayagataka ga o ira sa qaravi Jiova me ra volia kina na i sulu kei na kakana era vinakata.
Who We AreWhat We EelieveWhat We Do
2025 by iamachristian.org,Inc All rights reserved.
