JOPE 19 - Ai Vola Tabu Ena Vakavakadewa Vou（FNV）

Sauma o Jope: Au Kila ni Bula Tiko na Noqu i Vakabula

1A qai sauma o Jope, ka kaya,

2A cava na vu ni nomudou vakararawataka na yaloqu ena vosa?

3O dou sa rulaki au tu ga ena veigauna,

Ka sega ni madua ena nomudou rukaki au.

4Ni kevaka mada ga ni'u sa caka cala,

E la'ki mosi vakacava vei kemudou oqori?

5O dou nanuma beka ni dou vinaka cake mai vei au,

Mo dou nanuma kina ni sai vakadinadina ni noqu cala na noqu leqa?

6E sega beka ni dou raica rawa ni Kalou ga e cakava na ka oqo?

E a vakotora koto o koya e dua na dai me'u coko kina.

7Au sa kudruvaka na nona i tovo kaukauwa,

Ia e sega ni dua me vakarorogo;

Au sa vakasaqara na lewa dodonu,

Ia e mani sega ni tiko e dua.

8Sa sogota na Kalou na gaunisala,

Ka'u sa sega ni curu basikata rawa;

Sa ubia o koya na noqu gaunisala ena butobuto.

9Sa kauta kecega na noqu i yau,

Ka vakarusa na kequ i rogorogo vinaka.

10Sa qaqiraki au mai na veiyasana kecega.

Sa cavuraka laivi na noqu i nuinui,

Ka qai biuti au tu me'u malai ka mate yani.

11Sa cudru na Kalou ka sevaki au sara ga;

Ka cakava me'u vakataka na kena meca levu duadua.

12Sa vakatala mai o koya na nona mataivalu me mai valuti au;

Era sa kelia na nodra i keli ni i valu

Ka ra tuva i valu me ra valuta na noqu valelaca.

13Sa cakava na Kalou me ra biuti au na wekaqu;

Au sa vulagi vei ira era a kilai au tu e liu;

14Era sa yali na wekaqu kei na noqu i tokani.

15Era sa guilecavi au o ira era a tiko vakavulagi ena noqu vale;

Au sa vaka e dua na tamata vou ka kai tani

Vei ira na noqu yalewa dauveiqaravi.

16Ni'u kaciva e dua na dauveiqaravi,

E sega sara ni bau rogo mai

O ya ni'u vakamasuti koya sara ga me bau mai vukei au mada.

17Sa sega ni vosota rawa na watiqu na boi ca ni noqu i cegu,

Ka ratou sega sara ni toro volekati au mai na taciqu.

18Era sa beci au na gone ka ra veidredrevaki ni ra raici au.

19Era sa vakasisilataki au na noqu i tokani voleka duadua;

Ka ra sa rubuti au o ira au a dau lomani ira vakalevu duadua.

20Sa voleka sara me veikalikali na kuliqu kei na suiqu;

Ka sa vo lailai sara me cavuka na noqu i cegu.

21O kemudou na noqu i tokani! Dou bau lomani au mai!

Sa tarai au na liga ni Kalou.

22A cava dou sa vakacacani au kina, me vaka sa ia na Kalou?

E sega beka ni se rauta na nomudou vakararawataki au?

23Au sa vinakata dina me volai na noqu vosa,

Ka me toqai ena i vola vivigi!

24Se me na ceuti na noqu vosa ena dua na vatu,

Me volai tu kina,

Ka me kakua sara ni taqusi rawa.

25Ia au kila ni sa bula tiko na noqu i Vakabula,

Ka na qai lako mai ena i vakataotioti me taqomaki au.

26Ke sa mani kanalaka sara mada ga na kuliqu na mate,

Ia ena yagoqu dina ga oqo au na raica kina na Kalou.

27Au na raici koya ena mataqu dina,

Ka na sega ni mata vou vei au o koya.

Sa yali vei au na noqu yaloqaqa baleta ni o dou kainaka,

28“E datou vakararawataka vakacava na lomana?

O dou a vakasaqara e dua na ka

Me i ulubale ni nomudou mokuti au.

29Ia oqo, dou rerevaka mada na i seleiwau

Na i seleiwau me ravuta kina na i valavala ca na cudru ni Kalou

Ka me rawa kina ni dou kila tiko e dua sa dauveilewai.