VOSA VAKAIBALEBALE 22 - Ai Vola Tabu Ena Vakavakadewa Vou（FNV）

1Kevaka mo digia na rogo vinaka se na i yau levu, mo digitaka ga na rogo vinaka.

2E dua na ka oqo e rau sa tautauvata kina na vutuniyau kei na dravudravua: sa buli rau ruarua ga na Kalou.

3Na tamata yalomatua ena raica na leqa ni sa yaco mai ka na taqomaki koya, ia na tamata yalowai ena lako ga yani kina ka na qai veivutuni e muri.

4Rerevaki Jiova ka yalo malumalumu, o na qai vutuniyau, dokai ka bula balavu kina.

5Kevaka o sa lomana na nomu bula, kakua ni volekata na dai era sa coko kina na tamata ca ena bati ni sala.

6Vakavulica na gone ena sala e dodonu me lako kina, ia ni sa qase mai ena sega sara ni lako tani mai kina.

7Na tamata dravudravua sa nona bobula na tamata vutuniyau. Na tamata e dinau ena nona bobula na tamata e dinau vua.

8O koya e kaburaka na sore ni kau tawa dodonu ena tamusuka talega na veika ca, na i totogi bibi sara ena vakarusai iko.

9Mo lomasoli ka vota na kemu kakana vei ira na dravudravua, o na qai vakalougatataki kina.

10Vakatala tani na tamata dauveivakaisini, ena qai oti kina na veivala, na veileti, se na veivosacataki.

11O koya sa yalosavasava ka dau totoka na nona i vosavosa, ena yaco me nona i tokani na tui.

12Ena raica tiko ko Jiova me taqomaki na ka dina mai na nodra vosa lasu na tamata lasulasu.

13Na tamata vucesa sa dau tiko ga e vale; sa kaya ni na vesuki koya e dua na laione kevaka e lako yani ki tuba.

14Na veibutakoci e dua na dai sa dau vesuki ira na tamata ka sa cudruva ko Jiova.

15Era sa dau cakava na gone na veika lialia ka sega ni vakasamataki vinaka, ia na kuita ni veituberi ena rawa ni vakaotia.

16Kevaka o soli i loloma vei ira na vutuniyau, se tabaki ira sobu na dravudravua mo vutuniyau kina, o na yaco mo dravudravua sara.

Na Vosa ni Vuku e Tolusagavulu

17Vakarorogo mada, me'u tukuna vei iko na ka era sa tukuna na yalomatua, ka vulica na nodra i vakavuvuli.

18Ena talei sara kevaka o tugana ki yalomu ka wiligusutaka e gusumu.

19Au vinakata mo vakadinati Jiova matua sara; ni sai koya oqori na vuna ka'u sa via tukuna kina oqo vei iko.

20Au sa vola e tolusagavulu na vosa ni vuku me baleti iko; Era sa tu kina na kila-ka kei na i vakasala momona.

21Sa na tuberi iko talega mo kila na ka dina. Ia ni o sa talai mo la'ki raica mai na ka dina, o na kauta lesu mai na kena i sau dodonu.

Ai Matai ni Vosa ni Vuku

22Kakua ni via butakoca na ka era taukena na dravudravua kei na tamata malumalumu ena matamata ni koro.

23Ena totaki ira ko Jiova ka na vakacacana na nona bula na tamata e via vakacacani ira.

Na Kena i Karua

24Kakua ni veitokani kei ira na tamata yalo katakata ka yalokaukauwa.

25Ena rawa ni o vulica na nodra i vakarau ka qai dredre mo veisau.

Na Kena i Katolu

26Kakua ni yalataka mo sauma na nona dinau e dua na tamata vulagi.

27Kevaka o na mani sega ni sauma rawa, ena rawa ni ra kauta tani sara talega na nomu i mocemoce.

Na Kena i Kava

28Kakua sara ni tosoya e dua na i yalayala ni vanua makawa era sa cakava tu na qase.

Na Kena i Kalima

29Vakaraitaka mada vei au e dua na tamata dau cakava na ka vinaka, au na qai vakaraitaka vei iko e dua na tamata e uasivi sara mai vei ira e lewe vuqa ka yaga me nodra i tokani na tui.