1E sauma o Jope, ka kaya,
2Kevaka e vakarautaki na bibi ni noqu leqa kei na noqu rarawa,
3Na noqu vosa vakaveitalia me kakua ni vakurabuitaki kemudou.
4Sa cacabolobolo vei au na gasau titi ni Kalou,
Na kena gaga sa robota kecega na yagoqu;
Kei na nona veivakarerei kece sara sa yatuna oti tu me'u na sotava.
5Ni kakana voli e dua na asa, ka vakakina na bulumakau,
E rau sa dui wele sara ga ka mamarau.
6Ia o cei sara mada e rawa ni kania
na kakana dranudranu e sega ni vakamasima?
Se na cava na i kanakana e tiko
ena vulavula ni yaloka?
7Sa sega ni taleitaka na yaloqu na kakana vakaoqo,
Ena vakavuna me'u tauvi mate kevaka au kania.
8A cava e sega kina ni vakayacora na Kalou na noqu kerekere?
A cava e sega kina ni sauma na noqu masu?
9Ke sa vinaka vua na Kalou me vakarusai au,
Ia me qai dodoka mai na ligana ka vakamatei au.
10Ke'u kila rawa ni sa na vakamatei au,
Au na lade ka rika ena levu ni noqu marau,
Ka veitalia na levu ni noqu mosi.
Au kila ni sa dodonu ka savasava na Kalou;
Ka'u sega mada ni se bau saqata na nona lewa.
11Na kaukauwa cava beka e tiko vei au me'u bula tikoga kina?
A cava me'u bula tale kina ni sa sega na noqu i nuinui?
12Na noqu i cegu e sega ni ka kaukauwa sara
Me vaka na kaukauwa ni vatu se na kaukauwa ni parasa.
13Sa sega na kaukauwa e vo tiko vei au
Me rawa kina ni'u vakabulai au vakataki au;
Ka sega na vanua me'u gole rawa kina me rawa ni'u bau vukei mai kina.
14Ena gauna ni leqa me vakaoqo,
Au sa gadrevi ira na i tokani yalodina,
Se'u sa qarava tikoga na Kalou se'u sa vakanadakuya.
15Ia, oi kemudou na noqu i tokani, dou sa qai vakacalai au
Me vaka na soniwai mamaca ni sa sega na uca.
16Sa vesuka na drodro ni wai na wai cevata
Ka vuvu ena waicala ni uca vulavula.
17Ni sa katakata na vanua sa qai waicala,
Ka yali yani me laki lala tu ka mamaca na botona.
18Era vaqaqara wai voli yani na i lala levu dauveilakoyaki;
Era mai seseta na sala ka lako vakaveitalia
Ka ra mani mate kecega ena vanua dravuisiga.
19Era vaqaqara wai na yavusa dauveitokiyaki ni Tima,
Ka ra lako voli ena vakanuinui na dauveivoli ni Sipa.
20Era a qai leqa ka ra veilecayaki
Ni ra a maca kece tu na veiuciwai.
21Au vakatauvatani kemudou kei na veiuciwai oqori,
Baleta ni dou sa raica na leqa e yacovi au ka qai rere.
22Au a kerea li e dua na i loloma mo dou solia vei au?
Se mo dou la'ki temaka ena veivaqumi e dua ena vukuqu?
23Se mo dou kauta nomudou i yau vei ira na meca?
Se na dauveivakasaurarataki me ra sereki au?
24Sa vinaka, au sa na tiko lo me'u vakarorogo mada,
Dou tukuna kece sara mai na cala ka'u a cakava.
25Na i le yalomatua au na rawa ni vakadinata,
Ia na nomudou i tukutuku e rui tawa macala.
26O dou nanuma ni noqu vosa na cagi wale ga;
Ia na cava ga o dou sauma tiko mai kina na noqu tagi ni rarawa?
27O ira mada na luveniyali bobula dou qai veimautaki ira,
Ka saga vei ira na nomudou i tau na i sau vinaka me ra voli kina!
28Dou raica vakavinaka mai na mataqu.
Au na sega sara ni lasu.
29Na nomudou vosa sa rui sivia.
Na nomudou veibeitaki vakailasu mo dou tinia.
Dou kakua ni beitaki au me'u ca kina.
Oi au, au tu ga ena dodonu kei na dina.
30Ia o kemudou, o dou nanuma ni'u sa lasu tikoga,
Ka nanuma ni duidui ni dodonu kei na cala au sega ni kila.
Who We AreWhat We EelieveWhat We Do
2025 by iamachristian.org,Inc All rights reserved.
